Itula okwa udaneka okutota Okabinete ka kwatela mo ovanhu aveshe

. . . A hala okulonga noohandimwe ovo ‘vayela’ okudja keengudu dimwe

Omuleli wongudu yoIndependent Patriots for Change (IPC) Panduleni Itula okwa ti okwa manguluka okutota Okabinete noohandimwe okudja keengudu dimwe dopolitika ngee IPC okwa findana omahoololo oo twa taalela omutumba wopashiwana.

Eshi kwa li ta popi koshikonga shongudu ‘Go out and Vote’ Olomakaya koMbaye, Itula okwa ti ota toto epangelo la tala kowino noushili.

“Itatu ka kala tu na opaliamente ile Okabinete koilyo ashike yoIPC. IPC ke na ovanhu ovo ve na ashishe osho sha pumbiwa okulela oshilongo.

Ohatu ka tala keshe mongudu, shama ashike owa yela, shama ashike kutya ino kwatelwa nande omoulingilingi, shama ashike kutya ku na oukwamuhoko noshama ashike kutya ou na Namibia komutima,” Itula osho a ti ngaho.

Itula okwa ti ovo va hoololwa nave lilongekide okulonga noudiinini.

“Ohatu ka tala keshe mongudu yopolitika, shama ashike kutya owe lilongekida okulonga noudiinini, shama ashike kutya owe lilongekida okulonga ndee to pewa ondjabi yoye u ka lande ohauto yoye mwene – itatu ke mu pa nande eetuwa mepangelo letu – shama ashike kutya oto ka hoolola ovanhu to tale kouhongelwe wavo, shama ashike kutya ove, tete tete, owe lipaka mo mukuuda ko kutya opo tu tunge oshilongo eshi otu na okulongela kumwe ongOvanamibia opo tu kwashilipaleke kutya ohatu dulu okuya komesho,” Osho a ti ngaho.

Omundjadjukununi woikwapolitika Henning Melber okwa ti omanga oshinima eshi tashi dulika shi kale shidjuu, otashi dulika Itula a ninge omupelesidente waNamibia ta shikula ko.

“Otashi dulika sha fa shidjuu ashike otashi dulika Itula a hoololwe a ninge omutwe woshilongo.

Pamhito ei, otashi dulika omutumba wopashiwana u kale nomwaalu wakula woilyo yoSwapo yomopaliamente nosho yo eengudu dikwao dihapu,” Melber osho a ti ngaho.

Okwa ti kutya opaliamente iha di oIPC itai shiva, okuninga elongelokumwe pokati kapelesidente ehe shi woSwapo noilyo yopaliamenet yoSwapo okwa fimana.

“Eshi nda ti ngaha, omupelesidente mupe ehe shi woSwapo ota, kutya nee okwa hala ile ina hala, oku na okulikolelela keyambidido okudja keengudu dikwao noilyo yopaliamente. Itula okwa popya ashike oshinima tashi dulu okuningwa ngee okwa hoololwa oye a ninge pelesidente ta shikula ko,” Melber osho a ti ngaho.

Okwa weda po vali kutya elongelokumwe leengudu otali dulu yoo okunghonopeka oudemokoli nokuxwaxwameka epangelo liwa.

“Itula ita dulu okulongifa eenghono dombelewa yapelesidente unene ngee ina mona eyambidido okudja koilyo yopaliamente ihapu.

Epulo eli li li apa oleli, moshinima shi li ngaho Swapo ota hale ngaa okulongela kumwe napelesidente eheshi woSwapo,” Melber osho a ti ngaho.

Okwa kunghilila kutya ngee Swapo okwaanye okulongela kumwe napelesidente eheshi woSwapo, otashi dulika shi ka ete epangelo lihe na eenghono.

“Eshi otashi dulika shi ete omhito yokunghonopeka oudemokoli we likolelela kelongelokumwe leengudu shi na sha nelelo liwa.

Ngee hasho, otapu kala pu na oupyakadi wepangelo lihe na apa tali i notashi teya po epangelo, osho tashi ka xulila moupyakadi wokuhaya komesho waalushe,” Melber osho a ti ngaho.