Shanghala ota pula oihokolola ya topoka yoFishrot

Hahendedjai mukulu noku li nayango minista mukulu wouyuki Sackey Shanghala okwa ti yee navakwao ve li vatatu ovo tva feekelelwa oFishrot oihokolola yavo inai ningilwa oshita noyavakwao shaashi kave na manga ovakalelipo vopaveta.

Shanghala okwa popya momhangu yopombada kondolongo yevyulonghalo mOvenduka Omaandaxa kutya oshibofa shoulingilingi woFishrot nashi topolwe moihokolola ivali, opo shi mu pe, James Hatuikulipi, Ricardo Gustavo naPius Mwatelulo efimbo lawana a kendabale okumona omukalelipo wopaveta.

Shanghala, Hatuikulipi, Gustavo naMwatelulo, ovo tava tamanekelwa pamwe nakwao vahamano nomahango avali, eengeshefa di li 12, nomahangano vali amwe anhe a kalelwa po kovafeekelwa mekwatafano noulingilingi weekota deeshi moNamibia, kave na ovakalelipo vopaveta pamhito ei.

Ova ti kutya oshinima eshi otave shi pula shaashi kave na itava dulu okufuta ovakalelipo vopaveta, shaashi omaliko avo okudja muNovemba 2020 okwa kufwa mo mewiliko lavo kwa longifwa omualndu wokutula omaliko momake epangelo ngaashi okatendo kokukelela oimbula ya longekidwa taka pula.

Eshi kwa li ta popi nomhupanguli Moses Chinhengo Omaandaxa, Shanghala okwa ti ina ninga endilo opo a pewe oshimaliwa okudja momaliko aye oo e li momake epangelo opo a dule okufuta omukalelipo wopaveta moshibofa shaye shoimbuluma.

Natango ina ninga eindilo lomukaleipo wopaveta ta futwa kepangelo, shaashi okushi shi kutya ite dhi dulu molwonghalo yaye yoshimaliwa, Shanghala osho a ti ngaho.

Okwa lombwela omhupanguli kutya okwa pula epangelo opo li fute oshimaliwa shomukalelipo wopaveta waye pefimbo loihokolola yaye, ashike oshinima osho inashi tambulwa ko, osho a ti ngaho.

Chinhengo mapangulo laye la dja odula ei okwa li a popya kutya ovafeekelwa moshibofa shoimbula eshi otava dulu okupula omhangu yopombada opo i yandje elombwelo kepangelo li yandje omavatelo opashimaliwa okufuta ovakaleipo vavo..

eshi a pulwa kuChinhengo kutya omolwashike ina kufa omukalo oo opo a mone omukaleipo wopaveta, Shanghala okwa ti, maliuodo aye oku na tete okukendabala eemhito dikwao omanga ina ninga eindilo yelombwelo lomhangu olo tali pula epangelo li yandje evatelo lopaveta kuye.

Okwa ti vali ke wete ngee omhangu otai dulu okwaanya okuyandja evatelo lopaveta kuye konima a ninga eenghendabala adishe ta dulu okuninga okwoongela oshimaliwa a fute omayakulo omukaleipo wopaveta pefimbo loihokolola yaye.

“Oshibofa eshi oshakula onda pumwa omukalelipo wopaveta,” Shanghala osho a ti ngaho.

Okwa ti vali ita dulu okumona oihokolola i li pauyuki ngee ke na omukalelipo wopaveta.

Okwa weda po vali: “ Okutwikila noihokolola ei puhe na omukalelipo wopaveta otashi eta ashike okuhena ouyuki kwa kula.”

shanghala okwaanya kutya eindilo lokuninga oihokolola ya topoka onghendabala ashike yokuya oihokolola yaye moshipala.