Aakiintu yaali ya hulitha sho ya nu omeya giihemba

Aakiintu yaali oya mana oondjenda omanga yalwe yaali oye li moombete taya mono epango lya kwata miiti konima sho taku hokololwa ya nu oshikunwa shiihemba ya lumbakanithwa mumwe, sha ningwa momukunda Okandjara moshitopolwa shaKavango Uuzilo, mEtitatu lya zi ko.

Oonakuninga oshihakanwa otaku hokololwa ya pewa oshikunwa shoka konganga lwanima sho ya yi ko ya ka konge ekwatho opo ya yogwe oombepo dha nyata ndhoka ya kala ye wete kutya otadhi ya piyaganeke moonkalamwenyo dhawo.

Onganga ndjoka yomomudhingoloko hayi ithana kutya omuprofeti, otaku hokololwa hayi itanga kutya ohayi gandja omakwatho gopambepo nogopamuthigululwakalo okutidhapo oombepo dha nyata.

Omukwatakanithi gwomakonakono giimbuluma mopolisi yoshitopolwa shaKavango Uuzilo, omupevikomufala Bonifatius Kanyetu okwa koleke oshiningwanima shoka konzonkundaneki ndjika, mEtine.

“Okwe ya pe iihemba ya tsuwa nokulumbakanithwa mumwe mbyoka a popi kutya omuti, opo ya kunge ko omupya ngoka ye na. Ashike nando ongaaka shoka oshe eta yaali yomuyo ya hulithe, omanga yalwe yaali oye li moshipangelo shaNyangana Catholic Hospital taya mono uuhaku,” osho a popi ngaaka.Kanyetu, okwa popi kutya nakuninga oshihakanwa gwotango, okwa hololwa kutya oye Josephine Shiremo (27) ngoka taku hokololwa a mana oondjenda pethimbo a thikithwa kokapangelo kaKandjara, lwanima sho a falwa ko kaapambele ye sho ya dhimbulula kutya okwa li monkalo ombwinayi sho a thiki megumbo okuza ‘komuprofeti’.

Otaku hokololwa kutya nakusa okwa li a tameke nonkungo nokwa li wo a kwatwa koshimela.

Nakusa omutiyali okwa hololwa kutya oye Shikonga Linyando (30), ngoka a mana oondjenda miihwa yi li ashike popepi negumbo lyaandjawo, lwanima sho taku hokololwa kutya megumbo okwa li a zi mo ekiiwathele. Mboka ye li moshipangelo oyo Theophila Lisundju (39) naBrigitha Mahungo (30), notaku hokololwa kutya oye li monkalo ohwepo. Pauyelele wa gandjwa kopolisi ‘omuprofeti’ ngoka gwonganga okwa li a fadhukapo opolisi sho a nongele kutya yaali yomaayakulwa oya mana oondjenda, ashike lwanima okwi ifala yemwene kopolisi.

Iihemba mbyoka a longitha osho wo iilongitho ye otaku hokololwa ya kuthwa po kopolisi.

Omidhimba dhoonakusa odha falwa kokila yoshipangelo shaNyangana Catholic Hospital, opo dhi ka konakonwe ku monika osheetithi shomaso.