Aantu yatatu ya dhipagwa mehuliloshiwike

Opolisi oya tseyitha kutya mehuliloshiwike lya piti omwa ndhindhilikwa omaso gatatu.

Moshiningwanima shotango, omudhimba gwomulumentu inaa dhimbululwa ogwi itsuwika momudhingoloko gwaNorthern Industrial Area mOvenduka mOlyomakaya, osho omupopiliko gwopolisi moshilongo, omupevikomufala Kauna Shikwambi a popi ngaaka.
“Otaku hokololwa kutya nakusa, ngoka a adhika popepi nopate yoB1, okwa ponokelwa kaafekelwa kaaye shiwike nokwa hulitha kuuwehame,” osho Shikwambi a popi ngaaka.

Okwa gwedha po kutya nakusa ina dhimbululwa natango, ishewe aafakelwa kaye shiwike. Moshiningwanima shilwe sha ningilwa mOvenduka, omudhimba gwomulumentu keeshiwike ogwi itsuwika mEtitano mepandaanda lyedhina Ombungu, mOkuryangava.

Opolisi oya popi kutya olutu ndoka, olwi itsuwika kaakwashigwana mboka kwa li taya ende po, notaku fekelwa kutya okuli pomimvo omilongo ndatu nasha, nokwa adhika e li mokati kombinzi.

“Pamakonakono gopetameko, otashi ulike kutya nakusa okwa tsuwa nokutetwa kokukugulu kokolulyo. Kapu na ngoka a tulwa miipandeko sigo oompaka,” osho Shikwambi a popi ngaaka.

Opolisi natango oya lopota kombinga yomukulupe gwomimvo 82 ngoka a hahalwa nekatana komulumentu gwomimvo 42 sha ningilwa momukunda Oshilulu momudhingoloko gwaKahao, mEtitano lya zi ko.

Nakuhahala omukulupe otaku hokololwa kutya oku na uunkundi wopamadhiladhilo.
Nakusa otaku hokololwa a ponokelwa komufekelwa omanga a adhika a kuutumba mepya, popepi ashike negumbo lye.
Oshe etithi inashi tseyika natango, ashike omufekelwa oku na uunkundi wopamadhiladhilo.
Omakonakono gopolisi otaga pula komeho.

Pokati mpoka opolisi yoshitopolwa shaShikoto oya lopota iiningwanima iyali ya yooloka moka aanona yoomvula mbali ya mana oondjenda sho ya gwile momayemele gomeya, sha ningwa mOlyomakaya.

Oshiningwanima shotango osha ningilwa momukunda Oniimwandi, sho taku hokololwa kutya kanona ngoka okwa li ta dhana oye awike megumbo popepi neyemele lyu udha omeya, pethimbo oshiningwanima shoka sha ningwa.

“Yina yokanona okwa adhika a kothela momuti gu li megumbo nokanona oka hulithile pehala lyoshiningwanima,” osho komanda gwopolisi yaShikoto, komufala Theopoline Kalompo-Nashikaku a popi ngaaka.

Oshiningwanima oshikwawo osha ningilwa mofaalama yedhina Wendelberg tayi adhika popepi noTsumeb.
“Okanona oka adhika ta ka dhana nayakwawo kondje yegumbo omanga yina ta yogo iikutu, lwanima yina okwe ki itsa momwana a gwila meyemele lyomeya lyoolita 29 sho a galuka koku ka yaneka iikutu,” osho Nashikaku a popi ngaaka.