Aapolisi yaali ya tulwa miipandeko omolwuukongo waali paveta

Aalumentu yaali oya tindilwa oboloha mOmaandaha konima sho ya tulwa miipandeko taya fekelwa uukongo waali paveta woosino dhi li ne.
Aafekelwa mboka yaali oyo Eelu Isaks naMarien Ngouabi Namoloh, noya tindilwa ompito yokwiifutila mo sho ya holoka mompangu yamangestrata gwaVenduka moKatutura.

Aafekelwa mboka oya tulwa miipandeko sho ya patululilwa oshipotha kUuministili wOmidhingoloko, Omakuti nOmatelelopo.

Omupopiliko guuministili mboka, Romeo Muyunda uunambo okwa pititha olopota yopolisi ndjoka ya yelitha kutya okwa li ya ningi oshikonga shomonanguwi sho ya nongele onyama yiiyamakuti ndjoka kwa li tayi landithwa mehuliloshiwike lya piti, kaafekelwa.

“Aanambelewa yatatu yUuministili wOmidhingoloko, Omakuti nOmatelelopo osho wo omupolisi gumwe oya kwatathana nomulandithi taya pula kutya oya hala onyama yoshiyamakuti. Omulandithi okwa yamukula kutya onyama opo yi li nokwa gandja uuyelele waampoka hazi,” osho olopota ya shangwa ngaaka. Onyama yoosino mbali oya adhika kondunda yomufekelwa, omanga oosino mbali odha adhika nale dha landwa po kaapolisi yaali ya yooloka, osho omukanda gwa tsikile ngaaka.

Otaku hokololwa kutya aapolisi mboka oya yaha oosino ndhoka kohotela yedhina Heja Lodge ndjoka yi li popepi nOvenduka noyishiwike nawa yi na iiyamakuti oyindji.

Muyunda okwa gandja elondodho neikwato pomutima lyaapolisi mboka taya kutha ombinga muukongo waali paveta nonande iiningwanima mbyoka inayi indjipala.

Pokati mpoka, aaniilonga yaali yepangelo oya pewa egeelo lyofuto yooN$15 000 mukehe gumwe, mekwatathano nuukongo waali paveta wuupundja uyali.

Aafekelwa mboka oya pewa omageelo gofuto sho ya holoka mompangu yamangestrata gwaKatima Mulilo, mEtiyali.

Aafekelwa mboka oyo Tibelelo Metelabi (55) naReagen Mubonda (50) nokwa li ya tulwa miipandeko mOlyomakaya ya zi ko pomboloka yombaadhilila, ndjoka kwa li ya tulilwa po okukwata aafekelwa yontumba mekwatathano neteyo lyegumbo.

Sho opolisi ya thikameke nokuhadha oshihauto shaafekelwa mboka, oya adha mo uupundja uyali, mboka kehe kamwe ke na ongushu yooN$5 000.

Sho ya ningilwa omapulapulo, okwa monika kutya kaya li nande ye na omukandapitikilo guukongo, nopolisi oya tsikile oku ka hadha komagumbo gawo hoka ya dha ko natango onyama yiiyamakuti.

Metelabi naMubonda oya zimine ondjo pethimbo ya holoka komeho gamangestrata Clara Mwilima noya futu omageelo gawo mEtitatu.
Epangelo okwa li lya kalelwa po komutamaneki Cynthia Matiti.