Aafekelwa yaali yeyako moPhala Phala ya holoka mompangu

Aafekelwa yaali oomvalele dhaNamibia mboka taya fekelwa olunyala meyako lyoomiliyona mofaalama yomupresitente gwaSouth Africa, Cyril Ramaphosa, yedhina Phala Phala, sha ningwa muFebuluali 2020 oya holoka lwotango mompangu yamangestrata gwaBela-Bela, moLimpopo, shaSouth Africa, ohela.

Aafekelwa mboka oyo Imanuwela David (39) naFroliana Joseph (30) notaya tamanekelwa oshipotha sheyako neteyo lyegumbo, sha landula sho ya tulwa miipandeko moSouth Africa, mOsoondaha nomOmaandaha.

MOmaandaha, oshikondo shomakonakono giimbuluma moSouth Africa sha tseyika nedhina Hawks osha pititha olopota kombinga yetulo miipandeko lyaafekelwa mboka yaali.

“Aafekelwa mboka yaali oya tulwa miipandeko mondolopa yaRustenburg osho wo moBela Bela, nosha ningwa koshikondo shomakonakono giimbuluma ya yaga kegonga shi na sha neteyo lyofaalama yaPhala Phala muFebuluali 2020. Etulo miipandeko lyomufekelwa omutitatu olyi li metifa,” osho olopota yaHawks ya popi ngaaka.

Pauyelele wiikundaneki yomoSouth Africa, aafekelwa mboka oya taalela iipotha ya kwatelamo okulongelakumwe nelalakano lyokuteya egumbo opo ya yake, okuteya egumbo nelalakano lyokuyaka, osho wo uukengeleledhi wopashimaliwa.

Otaku hokololwa kutya aafekelwa mboka otaya tamanekelwa olunyala meyako lyoshimaliwa shooU$580,000 (shi thike lwopoomiliyona N$10) megumbo lyofaalama yaRamaphosa.

Omumvo gwa zi ko, iikundaneki oya kundaneke kombinga yookalyamupombo yatano Aanamibia mboka ya yaka oshimaliwa mofaalama yaRamaphosa, nomadhina gawo oyo Imanuwela David, Erkki Shikongo, Urbanus Shaumbwako, Petrus Muhekeni osho wo Petrus Afrikaner. Joseph, ngoka oye kwa li ha longele megumbo lyomofaalama yaPhala Phala ongomwoopaleki otaku hokololwa a pambathana naDavid, noye taku fekelwa a yakeleko aafekelwa yatano kutya okwi itsa oshimaliwa sha holekwa mofaalama ndjoka.

Mbala konima yoshiningwanima shoka sheyako, aafekelwa yamwe otaku hokololwa ya tameke okulongitha po oshimaliwa shoka okulanda iihauto yondilo nomagumbo moSouth Africa.

Yamwe ngaashi David otaku hokololwa a tungitha nokuninga nawa egumbo lya yinakulu komukunda tagu ithanwa Olukekete moshitopolwa shaMusati, omanga Shikongo okwa landa ehala lyomalukalwa gaayenda mOutapi.

Konima yeyako, opolisi yaSouth Africa otaku hokololwa ya kongo nokulandula aafekelwa mboka koNamibia, sho taku hokololwa kutya Ramaphosa okwa pula omupresitente Hage Geingob opo e mu kwathele mokutulitha miipandeko David, naashoka osha ningwa mokati komumvo gwo2020.

Aakonakoni yaRamaphosa, mewiliko lyomukonakoni Wally Rhoode, okwa kundanekwa pethimbo ndyoka a lombwele omunambelewa-kuluntu mopolisi yaNamibia opo oshiningwanima shoka sheyako kaashi e twe puuyelele molwashoka okuwetike kutya oshipotha shoka osha pumbwa okukwatwa nuukeka nokuwetike kwa li tashi vulika she eta evundakano.

‘ONDA NIKA OSHIPONGA’

Shikongo ngashingeyi okuli moNamibia, nokwa tyapula oshituthi shevalo lye eti-44 mOlyomakaya.

MuAuguste numvo, Shikongo okwa koleke komutoolinkundana gwoThe Namibian, pethimbo a li mombesa okuza koCape Town a thinda kOvenduka, kutya oye gumwe gwomaafekelwa mboka ye na olunyala meyako lyoshimaliwa shomofaalama yaRamaphosa.

Okwa koleke wo kutya okwa li a mangwa po okuza mo2009 no2016 sho kwa li ya yugu oshihauto shoka sha li sha humbata oshimaliwa.

Shikongo okwa faathanitha onkalamwenyo yomondholongo nosikola.

“Mondholongo onda kalekwa mo uule woomvula heyali. Okwa li nda kutha ombinga meyugo lyoshimaliwa shoka sha li moshihauto. Naasho nda mangululwa mo, onda landa otuukala ompe yo-VW Golf 5 omanga inaatu ka yaka oshimaliwa shomupresitente. Iinima mbika yokuyuga ondeyi igilila,” osho Shikongo a popi ngaaka.

Okwa popi kutya monkalamwenyo ye okwa longela pomahala gaali gomatungo mOvenduka nomoHout Bay shaCape Town.
“Okuza mpoka, inandi konga we iilonga sigo twa yaka oshimaliwa shomupresitente. Ngame onda nika lela oshiponga,” osho a popi ngaaka.

Okwa gwedha po kutya omolwolunyala lwe meyako lyofaalama yaPhala Phala, omukanda gwe gwomalweendo ogwa ndhindhilikwa ongomuntu a nika oshiponga nonkene uuna ta zi moSouth Africa teya koNamibia, aluhe aapolisi oye na okudhengela poongamba opo ku kolekwe ngele napitikwe ngaa e ye koNamibia nenge hasho.

Konima sho oshikumungu sheyako lyofaalama yaPhala Phala sheya puuyelele nomiikundaneki omumvo gwa zi ko, momulandu gwiipambele yomatembu Shikongo okwa tulwa momusholondondo gwaantu mboka taya kongwa.

“Uuna omukanda gwandje gwomalweendo gwa minikilwa keshina poongamba, eshina ohali ulike oshinima oshitiligane . . . inaye shi kutha po. Ohaya kala nokutonatela omainyengo gandje. Uuna tandi zi moSouth Africa, opolisi yopoongamba ohayi lopota kutya onda za mo moshilongo,” osho a popi ngaaka. “Ngashingeyi onda ninga omuntu eshiwike nawa poongamba. Omumvo gwa zi ko, okwa li nda kwatwa po poongamba dhaNakop muumbugantu waNamibia. Onda kala uusiku awuhe mondholongo yopolisi”.

Shikongo okwa popi kutya okuna uumbanda wokuya koNamibia nondhila molwashoka okuwete kutya shoka otashi vulu oku mu kwatitha po mekwatathano noshiningwanima sheyako.

Okwa lombwele wo omutoolinkundana kutya okuyaka osho owala omukalo ta vulu okulongitha opo i imonenene sha shomboloto molwashoka ita vulu okukala ta longo omwedhi kehe ta futwa ooN$5 000 nenge okukala nomukanda gwokuhinga gwololi ashike ota pulwa a kale e na ontseyo yoomvula ndatu.