Aafekelwa yatatu ya tulwa miipandeko omolwompangela yeyugo

Aalumentu yatatu oya tulwa miipandeko kopolisi yoshitopolwa shErongo mEtitatu sho taku hokololwa kwa li taya kambadhala okuteya nokuyuga.

Oshiningwanima shoka osha ningilwa mOmbaye naalumentu mboka oya adhika notuukala yoWV Polo ndjoka taku fekelwa oyo ya adhika taya ka longitha.

Komanda gwiipambele yoshigwana moshitopolwa shErongo, inspkta Ileni Shapumba okwa popi kutya opolisi okwa li ya yakelwa ko uuyelele kombinga yompangela yeyugo lyaafekelwa mboka yatatu, noya tokola ya tidhe oPolo okuza mondingandinga yondolopa sigo okolukanda lwaKuisebmond hoka ya kwatelwa. Sho ya kwatwa, moshihauto shawo omwa adhika oonomola ndatu dha yooloka dhokoshihauto.

Shapumba okwa popi kutya omakonakono gopetameko ogu ulike kutya aafekelwa okwa li ya thitha otuukala ndjoka yoPolo noya lundulula onomola dhokoshihauto.

Shapumba okwa popi kutya iipotha yoonkambadhala dhomayugo dhi na sha nookalyamupombo taya longitha oonomola dhokiihauto dhiifundja, oya londa, notashi limbilike.

“Otashi ulike kutya kapu na naanaa ekondololo lya kwata miiti uuna omuntu ta pewa onomola yokoshihauto. Otatu indile omahala ngoka haga nyanyangidha oonomola dhokiihauto ga nkondopeke ekondololo lyokugandja oonomola dhokiihauto. Omuntu ina pewa nande onomola yokoshihauto shila oongele pu na uumbangi okuza koNatis kutya oye shili mwene gwoshihauto,” osho a popi ngaaka.