Onkalo yokwaana iilonga moshilongo onkene yi li pombanda naashoka otashi imonika kaakwashigwana unene tuu aagundjuka mboka aluhe taya mbombolokele pomahala mpoka tapu dhumwa oompito dhiilonga.
Okuza momasiku 2 Novemba, aakalimo yomoRundu ya konda pomayovi gaali oya kala taya mbombolokele kombelewa yondolopa yaRundu opo ya thikithe omaindilo gawo giilonga yopakathimbo ya tale ngele taya ningi aanelago uuna pwa holoka oompito dhiilonga.
Ondolopa yaRundu momasiku 2 Novemba oya tseyithile oshigwana kutya oyi na omulandu gwokugandja iilonga ya yooloka yopakathimbo kwaamboka ya adha iipumbiwa, nehiyo ndyoka olya nuninwa unene mboka ye na ohokwe noyeli mompumbwe yiilonga – unene tuu aagundjuka.
Omaindilo ngoka otaga taambiwa ko kombelewa yawo nokupungulwa momulandu gwopakompiyuta nuuna pwa holoka ompito yiilonga yopakathimbo otamu tothwa mboka yi ilongelela nenge ye na ontseyo yoludhi lwiilonga mbyoka.
Etseyitho olya yelitha kutya moshikakomumvo sho2023/24 pashimaliwa, ondolopa otayi ka kala yi na oompito dhiilonga dhopakathimbo miimpungu ya yooloka ngaashi moshimpungu shomauyelele nomakwatathano gopaungomba, moshimpungu shiipambele yoshigwana, moshimpungu shomahalitho nomatalelopo, moshimpungu shiipambele yomahupilo osho wo moshimpungu shiimaliwa nomayalulo.
Omukuluntuwiliki gwondolopa yaRundu, Olavi Nathanael, okwa popi kutya oye eta po omulandu gwopakompiyuta gwokupungula omauyelele gowino noonzapo dhaamboka ye na ohokwe yokukutwa moopoosa dhopakathimbo uuna dha holoka mombelewa yawo.
“Opu na omaludhi ga yooloka goompito dhiilonga, noga yoololwa moongundu, nuuna twa pumbwa omuniilonga gwopakathimbo nena otatu tala owala mongundu moka e li noku mu ithana,” osho a popi ngaaka.
Ashike nando ongaaka aakalimo yamwe okwa li ye shi pamwe oompito ndhoka odhiilonga tayi kalelele.
Oompito dhilwe dhiilonga tashi vulika dhi ka gandjwe kombelewa yaRundu, omwa kwatelwa yoonkalo dha nika oshiponga, moshimpungu shiipambele yaaniilonga, iilonga yokwalukehe mombelewa, omathaneko gondolopa, uuindjinia, moshimpungu shomagumbo nevi osho wo omatungo nolusheno.
Esiku lya hugunina okuninga omaindilo olya li ko mEtitatu.
Ashike nando ongaaka, yamwe yomaaningi yomaindilo mboka ya holoka kombelewa oshiwike shika okwa li ye shi pamwe oompito ndhoka odhiilonga tayi kalelele.
INATU HALA IIKWAPOLITIKA NOKUHOGOLOLA
Gumwe gomwaaningi yomaindilo, nokwa li i ilongele koshiputudhilo shaInternational University of Management (IUM), okwa popi kutya okwa mono onzapo ye mo2018 ashike nonande a kala ta kongo iilonga uule woomvula ndhoka hamano onkene iilonga ineeyi mona sigo ongashingeyi.
“Ondolopa oyi na oompito dhopakathimbo ndhoka otashi vulika dhi kwathele mokukutha aailongi mboka ye na oonzapo kaaye na iilonga, ashike nando ongaaka kandi wete iilonga mbyoka tayi ka gandjwa pauyuuki. Ishewe, omolwashike oompito ndhoka dhi na okukala owala dhopakathimbo?” osho a popi ngaaka.
Pokati mpoka, Magnus Sivera ngoka e na onzapo yomasta degree muuindjinia womalusheno nomakwatathano, osho wo odegree muuindjinia womakwatathano golusheno, okwa popi kutya oonzapo ndhoka okwe dhi mono koChina mo2016 nomo2019, sho kwa li a tumwa kepangelo.
Okwa popi kutya konima sho a mana eilongo lye, ina vula okumona iilonga, unene tuu ya pamba shoka i ilongela, ishewe epangelo inali mu kwatha sha oku mu kongela iilonga.
“Omayele tandi gandja kepangelo oongoka opo li kundathane niikondo ya yooloka, unene tuu ngele otashi ya koompito dhokugandja iilonga, ko kushilipalekwe kutya kehe ngoka ta tumwa kepangelo pondje yoshilongo e kiilonge a monenwe iilonga mepangelo, nenge ku ningwe omalongekidho ya kutwe moshikondo shopaumwene, konima ya mana omailongo gawo,” osho Sivera a popi ngaaka.
Okwa popi kutya itashi ulike esimano lya sha opo epangelo li tume aailongi pondje yoshilongo ye ki ilonge ashike uuna ya galuka kapu na omalongekidho ga sha gokuya monena iilonga nenge gokuya pa oompito dhokungeshefa.
“Okwaana iilonga maagundjuka okuli uupyakadhi uunene. Omukundu ngoka ogwa tameke nale, naashoka osho she etitha aagundjuka ya kale ye wete kaaye niwe nayo kepangelo. Ashike uuna sheya pomahogololo, oya hala okuhogololwa,” osho Mathias Sikondo a popi ngaaka.
Okwa popi kutya okwaana iilonga olyo limwe lyomomatompelo aagundjuka inaaya hala okwi idhopa we miikwapolitika nenge mokuhogolola pethimbo lyomahogololo.
“Omolwashike ndina okuhogolola ngele epangelo kali na natse?” osho a pula ngaaka.
Sikondo okuna uulongelwe wonzapo yuuindjinia wiikwamalusheno okuza koshiputudhilo shedhina Namibian Training and Fisheries Institute nokwe yi mono mo2019, mOmbaye.
“Epangelo nali longe pamwe nomahangano ngoka kaageshi gepangelo opo ya tale kutya otaya eta po omulandu gu li ngiini gwokukandulapo onkalo yokwaana iilonga. Elago enene, omathimbo gamwe ohandi hupu mokupangela omasiga gokolusheno ngoka ga teka, ashike nando ongaaka okashona handi mono inaka gwana,” osho a popi ngaaka.
Uuyelele womaishangitho mondolopa yaRundu, owu ulike kutya aakongi yiilonga ya konda po3 000 oya gandja omaindilo gawo ga ndhindhilikwe yo ya tale ngele genongo taga fe gongombe ya mone iilonga mbyoka yopakathimbo.
Patrick Kamonga (33), omuningi guusikopa, okwa popi tati: “Kapu na oopoosa dha patuluka, ashike otwe ya owala okwe eta omadhina getu ga tulwe momulandu gwopakompiyuta, ya ningila ngele opwa ka kala pu na iilonga yontumba,” osho a popi ngaaka.
Kamonga okwa mono onzapo ye mo2015.
ONDJALA YIILONGA MOSHILONGO
Petameko lyomumvo nguka, oshilyo shongundu yoPopular Democratic Movement megumbo lyopashigwana Inna Hengari, oshilyo shongundu yoNamibia Economic Freedom Fighters (NEFF) Michael Amushelelo osho wo omunandjungu Dimbulukeni Nauyoma oya tulwa miipandeko momasiku 21 Maalitsa sho taku hokololwa ya kwatele komeho ehololomadhiladhilo kombinga yokwaana iilonga moNamibia.
Ehololomadhiladhilo ndyoka okwa li lya hwahwamekwa konkalo yaagundjuka omathele mboka kwa li ya holoka pehala lyomainyanyudho lyedhina Temperature Lounge and Restaurant tali adhika momudhingoloko gwaKhomasdal mOvenduka, opo ya gandje omaindilo goompito dhiilonga ndhoka dha li po.
Otaku hokololwa kutya pehala ndyoka opwa li oompito dhiilonga 16, ashike aagundjuka ya konda po2 000 kwa li ya holoka okugandja omaindilo gawo.
Hengari gwoPDM, omumvo gwa zi ko okwa gandja oshipopiwa she megumbo lyopashigwana ti indile opo onkalo yokwaana iilonga moshilongo yi talike ko kepangelo ongonkalo yopaulumwempumbwe.
Okwa popi kutya etulo miilonga lyomulandu gwekondjitho lyonkalo
yokwaana iilonga, olya nkundipala molwashoka kapu na omapungulo ga nuninwa oongeshefa dhopevi nodhopokati dhaagundjuka, okwa popi wo kutya omulandu gwelongo moshilongo ogwa nika iipa yombwa nuulingilingi wu li pombanda naashoka osho shimwe tashi etitha onkalo ya londa yaagundjuka kaaye na iilonga.
Omayalulo gonkalo yiilonga moshilongo ngoka ga ningwa koshikondo shomayalulo moshilongo sho-Namibia Statistics Agency mo2018 ogu ulike kutya moNamibia omu na aagundjuka ye li 876 908 ye li pokati koomvula 15 no34, moka yethike po310 854 (35,4%) okwa li ye na iilonga, omanga aagundjuka ye li po265 770 (30,3%) kaya li ye na iilonga.
Leave a Reply