Aalumentu yatatu yi ikutha oomwenyo moshitopolwa shaShana

Opolisi yoshitopolwa shaShana oshiwike shika oya tseyitha kombinga yaalumentu yatatu mboka ya mana ondjenda sho yi imangeleke, miiningwanima ya yooloka.

Molopota ndjoka ya pitithwa komunambelewa gwiipambele yoshigwana, mopolisi yaShana, Frieda Shikole, iiningwanima mbyoka oya ningwa mOshakati osho wo mOngwediva, mehuliloshiwike lya zi ko.

Moshiningwanima shotango, Oloho Julius Vathina (25) okwi imangeleke momukunda Onawa tagu adhika mOngwediva mOlyomakaya ya zi ko, lwopotundi 19h00. Vathina okwa yambukile koshitopolwa shaKunene nokwa li omusita gwiimuna momukunda gwa tumbulwa pombanda. Nakusa ina thiga po ombapila ya sha yeikuthomwenyo, naakwanezimo ye oya tseyithilwa nale onkundana yoluhodhi.

Moshiningwanima shilwe, omulumentu gwomimvo 32 otaku hokololwa i ikutha omwenyo mOlyomakaya lwopotundi 09h00 molukanda lwaNew Reception mOngwediva. Nakusa okwa hololwa kutya oye Kalumbu Horeb Hafeni, nokwa li momvula yotango koshiputudhilolongo shaInternational University of Management (IUM), mOngwediva. Nakusa otaku hokololwa a thigi po ombapila yetompelo lyeikuthomwenyo, naapambele ye oya tseyithilwa nale onkundana yoluhodhi. Omakonakono gopolisi otaga pula komeho.

Oshiningwanima oshikwawo osha ningilwa molukanda lwUupindi mOshakati, mOlyomakaya ya zi ko sho omulumentu gwomimvo 43 i imangeleke, sha ningwa kongulohi lwopotundi 22h00.

Nakusa okwa hololwa kutya oye Mutumbulwa Nestor Tunamukwathi, nokwa li omukeeleli gwomaliko mOshakati. Aapambele ye oya tseyithilwa nale onkundana yoluhodhi.

Onkalo yaantu taya ikutha oomwenyo onkene tayi indjipala moshilongo nokwa ndhindhilikwa kutya Pauyelele wopolisi, Aanamibia ye li 1 542, oyi ikutha oomwenyo pokati komasiku 1 Apilili 2020 nomasiku 31 Maalitsa numvo.

Shoka otashi ulike kutya moNamibia ohamu lopotwa omuntu i ikutha omwenyo konyala esiku kehe, noyendji yomaaikuthimwenyo aalumentu, mboka ya thikama po moopelesenda 82 dhaantu mboka yi ikutha oomwenyo momwaalu gwa tumbulwa pombanda.

MuJuli numvo, onzonkundaneki ndjika oya lopota kombinga yaantu ye li 679 mboka yi ikutha oomwenyo pokati kaJanuali 2021 naMei 2022.

Momwaalu ngoka, ye li 559 aalumentu, ye li 91 aakiintu omanga ye li 29 aanona.

Omupopiliko gwopolisi moshilongo omupevikomufala Kauna Shikwambi omasiku ga zi ko okwa popi kutya oya ndhindhilike omashongo ngaashi onkalo yokwaana iilonga, ondjala, ethindakano lyopamadhiladhilo, okwaana etegameno, omakwatathano gopaihole, omaupyakadhi gomoofamili ongayimwe mbyoka tayi thiminike aantu yi ikuthe oomwenyo.