Aanapolitika ya yambidhidha epango lyaGeingob koAmerika

Omupresitente Hage Geingob okuli koAmerika ta mono epango li na sha nokankela, nokwa yi ko oshiwike sha zi ko. Oyendji oya kwatwa komaipulo kutya olye ta futile epango lyomupresitente molwashoka ombelewa yomupresitente oya popi kutya epangelo halyo tali mu futile.

Omuleli gwongundu yompilameno onene moshilongo yo-Popular Democratic Movement, McHenry Venaani okwa popi kutya omupresitente gwoshilongo ina pumbwa ekwatho lyopashimaliwa oku ka pangwa, nokwa popi ishewe kutya ndika halyo ethimbo tali opalele okwiipulathana kombinga yuundjolowele waGeingob.

Geingob mEtitatu lya zi ko okwa tseyitha kutya okwa taamba eindilo lyoku ka pangwa kaanawino noondohotola koLos Angeles shaAmerika, shi na sha nepango lyokankela. Geingob koAmerika, ota kala ko uule womasiku gaheyali ta mono epango. Omupevipresitente Nangolo Mbumba oye a pewa oshinakugwanithwa shokukeelela ponkatu yuupresitente wongundu pethimbo ndika Geingob a za mo moshilongo. Ombelewa yomupresitente omasiku ga zi oya tseyitha kutya Geingob okwa li a ningilwa omakonakono nokwa monika e na okankela molutu.

“Uuna omulumentu te ehama, otatu simaneke ethimbo lye opo a aluke. Otatu ka kala nethimbo lyokupula omupresitente Geingob omapulo kutya olye e mu pe omayakulo. Mongashingeyi na tye po hwepo ye a aluke.

“Oshi li mondjila okupopya kutya kapu na omupresitente gwoshilongo ta pumbwa ekwatho lyopashimaliwa okuza komuntu opo a ye koshipangelo,” osho Venaani a popi ngaaka. Omupopiliko gwongundu yoLandless People’s Movement (LPM), Lifalaza Simataa, okwa popi kutya ongundu yawo kayi na uupyakadhi waGeingob ta pewa ekwatho lyokupangwa pondje yoshilongo.

Omupresitente gwongundu yoUnited Democratic Front (UDF), Hendrik Gaobaeb, okwa popi kutya okupopya kombinga yuundjolowele waGeingob oshinima shoka sha puka ishewe kasha li pauntu. Okwa popi kutya iinima yoludhi ndoka oyi na okukala yopaumwene noya pumbwa esimaneko nonande Geingob oye omutse gwoshilongo. “Inandi hala okupopya kombinga yoshinima shoka. Omapulo ngoka ohwepo ga pulwe ombelewa yomupresitente,” osho a popi ngaaka. Ombelewa yomupresitente oya popi kutya uuahaku owundji mboka Geingob ota ka kala ta mono, otashi kala nokuningilwa meni lyshilongo.

“Omanga oopelesenda 95 dhepango lyokankela ye tali ningilwa moNamibia, Ombelewa yomupresitente oya hala okukoleka kutya epango ndyoka omupresitnete ta ka mona koAmerika, otali kala owala omasiku inaaga konda puhagehali,” osho omukanda gwa popi ngaaka.

Omukanda ngoka ogwa gwedha po kutya: “Olweendo, epango nolukalwa lwe hoka [koAmerika] italu futwa nande okuza moshigandhi shepangelo.” Omapulo ga pulwa Ombelewa yOmupresitente kutay olye ta futu epango lyomupresitente sho a yi koAmerika, inaga yamukulwa.

Omunawino miikwapolitika Joseph Diescho oshiwike sha zi okwa pula kutya omolwashike Geingob a zimine okuya koAmerika a ka pangwe, nokwe shi popile wo momutono gonkalo yiipangelo moshilongo mbyoka yi li monkalo ya nayipala. “Omanga tatu halele omupresitente gwetu eyaluko, inatu dhimbwa kombinga yuuwehame nemono lyiihuna ndyoka aaleli yetu muAfrika ye ethela aakwashigwana. Iikondo yuuhaku moNamibia kayi li we kumwe,” osho Diescho a popi ngaaka.