Onkalo yaaniilonga yelelo lyamuni gwaVenduka mboka ye na oondjo dhondolopa dhi li poomiliyona N$2,5 otayi nyenyetwa koongundu dhimwe dhopapolitika.
Onkalo ndjoka oye yi tongonona “ongatayi kumitha ishewe otayi sitha ohoni”.
Yamwe oya popi kutya oye wete elelo lyondolopa tali ya sile ohenda, koombunda.
Oondjo ndhoka tadhi popiwa dhaaniilonga yamuni, odhe ya naanaa pethimbo ndika muni a gandja oshinakugwanithwa kehangano lyedhina RedForce opo li gongele oondjo dhelelo lyondolopa ndhoka dhi li maakalimo – unene tuu komalukanda ngoka ge na aakalimo oyendji ngaashi moKatutura.
Omupopiliko gwongundu yo-Independent Patriots for Change (IPC), Immanuel Nashinge, okwa popi kutya otashi kumitha okutala aaniilonga mboka haya futwa oondjambi dhi li pombanda oyo ishewe ye na oondjo dhoomiliyona dhelelo lyondolopa.
“Otu na oshilandopangelo shoka shi ikwatelela maakalimo. Kehe omumvo aaniilonga mboka, kutya nee oya longa nawa nenge hasho, ohaya mono aluhe ombonasa ashike ngashingeyi oyo ishewe ye na oondjo dhi thike mpono dhelelo lyondolopa? Otashi sitha ohoni notashi kumitha,” osho a popi ngaaka.
Nashinge okwa popi kutya Uuministili wOondolopa nOmapendulopo gOkomikunda owa pumbwa okuya mo olunyala mumuni gwaVenduka.
“Aaniilonga yangapi yelelo lyaMuni gwaVenduka ya kanitha omagumbo gawo nenge omahala gawo molwashoka inaaya futa iifuta yamuni? Elelo lyondolopa olya ninga po shike opo li shilipaleke kutya oya futa? “Ashike aaniilonga mboka oyo ngaa natango to adha ya pewa oshinakugwanithwa shoku ka teta ko omayakulo gaakalimo yalwe molwashoka oye na oondjo dhamuni,” osho a popi ngaaka.
Nashinge okwa popi kutya aaniilonga yamuni gwaVenduka oya pumbwa okugandja oshiholelwa oshiwanawa noye na okufuta oondjo ndhoka. “Shoka osho tashi eta oshilandopangelo shi kale itaashi humu komeho. Omu na omaupyakadhi ogendji, oombashu odhindji, osho wo omahala gokuthikameka iihauto kaage li nawa. Aaniilonga oye li le po owala okufutwa – kapu na shoka tashi humu komeho,” osho a popi ngaaka.
Oshilyo shongundu yoPDM momutumba gwopashigwana, Maximalliant Katjimune, okwa popi kutya endopo lyaaniilonga yamuni gwaVenduka okukala inaaya gwanithapo iifuta yawo otashi ulike uuhasha.
“Aaniilonga naya fute oondjo dhawo. Ohaya longele oshikondo shayimwe yomiikondo yepangelo mbyoka hayi futu oondjambi dhi li pombanda noonkondo moshilongo noya tulilwa po omauwanawa gokuhwepopeka omitengi dhi li komapepe gawo,” osho a popi ngaaka.
“Kashi li pauyuuki kaakalimo yalwe. Elelo lyoshilandopangelo nali tulepo omulandu ngoka tagu kala nokushilipaleka kutya aaniilonga nayo oya futa,” osho a popi ngaaka.
OONDJO INADHI PITIKWA
Momukanda ngoka gwa tuminwa aaniilonga momasiku 14 Novemba, omukuluntu gwoshimpungu shiimaliwa nomayakulo gookastoma moshilandopangelo, Jennifer Comalie, okwa lombwele aaniilonga ya gandje oshiholelwa oshiwanawa mokugwanitha po iifuta yawo yondolopa.
Okwa popi kutya ondolopa yoshilandopangelo oyi na omulandu gwekondololo lyoondjo, ngoka gwi indika aaniilonga nenge iilyo yelelo lyondolopa kaayi kale noondjo.
“Otatu indile aaniilonga ayehe ya fute oondjo dhawo nenge ya talelepo oshimpungu shoondjo opo ya ninge omalongekidho gokufuta,” osho a popi ngaaka.
Aaniilonga oyi indilwa ya fute ko oondjo ye na nenge ya ninge omalongekidho gokufuta omanga omasiku 15 Desemba inaaga pita.
Ngoka ta ka ndopa kelombwelo ndyoka otashi ke eta omayakulo gamuni ga tetwe ko komagumbo gawo nehangano lyokugongela oondjo dhamuni otali ka pewa oshinakugwanithwa shokupula ko oondjo ndhoka peha lyamuni.
Aaniilonga mboka ya popi noThe Namibian noya tindi omadhina gawo ga tumbulwe oya yelitha kutya ohaya pewa okashona komauwanawa gokufuta omalukalwa gawo, ashike oshimaliwa shoka oshishona noonkondo.
Oya popi kutya onkalo yomOvenduka oyi na ondilo noonkondo, naashoka osho she eta oyendji yomuyo ya kale moondjo shamuni.
Oya popi kutya mongashingeyi ohaya pewa owala ooN$1 800 dholukalwa. MuAuguste numvo, okwa kundanekwa aakalimo, omahangano, omahangano ga yama kepangelo osho wo iikondo yepangelo yi na oondjo kumwe dhamuni gwaVenduka dhoobiliyona N$1,2.
Oondjo ndhoka taku hokololwa dha kala po uule woomvula dha konda po20.
omayele
Oshike mbela shi na okuningwa po? Okupitila moshinyolwa she shomaiyugo shoka sha nyanyangidhwa miikundaneki omwedhi gwa zi ko, Susana David, omwiilongi gwonzapo yuumasta miipambele yoshikondo shepangelo koUnam, okwa gandja omayele gaashoka tashi vulu okuningwa po opo ku kondjithwe onkalo yaakalimo mboka ye li moondjo dhomalelo goondolopa.
Okwa popi kutya epangelo olya pumbwa okwe eta po omukuli gwokukwathela aakalimo ya fute ko oondjo ndhoka dhomeya nolusheno.
Okwa popi wo kutya omalelo goondolopa osho wo aakalimo oya pumbwa okukuutumba opo ya kundathane kombinga yekandulopo lyuupyakadhi mboka, osho wo okwe eta po omulandu gu li nawa gwekandulopo lyuupyakadhi.
“Omalelo goondolopa otaga vulu wo okunawapaleka onkalo pakulongitha omikalo dhilwe dhaakalimo mboka ye li moondjo ya vule okufuta ko oondjo dhawo, osho wo pakwe eta po olusheno nomeya ngoka haga futwa kuuketha. Omalelo goondolopa otaga vulu wo okutulila mo oshali aakulupe uuketha womafutilo, nokudhima po oondjo dhaakulupe, osho wo natango okukutha po iihohela mbyoka yi li kiifuta yaakalimo,” osho a popi ngaaka.
Leave a Reply