Aakalimo yomoAussenkehr moka oyendji yomuyo aalongi yomofaalama yomandjembele oya thigwa pomutenya ongulohi yEtiyali sho oombashu dhawo dha yangatithwa po kondalu yanelyanga.
Ombashu dhi li po55 ndhoka dha dhikwa nomanenge odha thigwa momutoko, omanga omukalimo gumwe okwa kanithile mo omwenyo.
Aakalimo ya konda po110, oya kanithila mo iinima yawo mwa kwatelwa omakumbatha, iikutu noodokumente dhawo, omanga nakusa okwa hololwa kutya oye Willem Shiyoleni (27).
Aapambele ye oya tseyithilwa nale onkundana yoluhodhi.
Lukas Handuukeme (44) okwa hokolola kutya ongulohi yoshiningwanima, kuume ke ngoka haya zi naye okwe mu pendula sho yu uvu omulilo tagu yangata pondunda yaShiyoleni.
Handuukeni okwa hokolola kutya oshiningwanima shoka osha ningwa lwopotundi 23h00 sho taku hokololwa kutya Shiyoleni okwa li ta teleke nokwa kotha omanga ombiga yi li peziko. “Otwe ya po notwa tameke okumwiithana a penduke.
Kali nande ta yamukula, nokwa mbolokotelwa mo komulilo. Omulilo okwa li omunene, unene tuu kombinga ndjoka yi na omweelo gwombashu ye,” osho Handuukeme a popi ngaaka.
Okwa popi kutya okuza mpoka oya kambadhala okudhima omulilo ashike inaye shi pondola.
“Sho twa ka tala oombashu dhi li puhetatu lwaampoka odha hwama nale. Okwa li ombepo onene nokwa li tayi endeleleke etaandelo lyomulilo,” osho a popi ngaaka.
Handuukeme okwa popi kutya ombashu yawo yimwe yomwaandhoka dha kwatwa komulilo tango, nokwa popi kutya okwa kanithila mo iinima ye ayihe.Omukuluntuwiliki gwehangano lyomandjembele lyedhina Namibia Grape Company, Gideon Nuunyango okwa popi kutya ehangano lyawo olyi ipyakidhila nomalongekidho gokukwathela aaniilonga mboka ya kanithile iinima yawo momulilo.
“Aaniilonga ye li po28 yehangano lyetu oya gumwa. Otwa tokola okukutha oshimaliwa moshiketha opo tu ya landele iikulya osho wo iipeleki yokuya ningila omalukalwa gopakathimbo,” osho a popi ngaaka.
Leave a Reply