KOMANDA ta kwathele gwopolisi yoshitopolwa shaKavango Uuzilo, omupevikomufala Eino Nambahu okwi indile aapolisi yi ilonge okukwata nawa oshimaliwa opo kaaye ki iyadhe kaaye na oshimaliwa shokufuta olefa yokuthika kiilonga, osho wo okuyanda oondjo.
Okwi indile wo aapolisi ya hulithepo onkalo yokuhehela omikuli.
“Otamu shi ningi epitilila noonkondo. Hulithiipo okukutha omikuli . . . Uumbapila weni woondjambi owu utha owala oondjo. Oondjambi dheni dhi kalekeni nawa nye mu shunithe pevi onkalo yomikuli.
Ohamu iyadha nokuli kaamuna noshimaliwa sholefa omanga hamu pewa oshimaliwa sha nuninwa olefa,” osho a popi ngaaka.
Nambahu ndhoka okwe dhi popi pethimbo lyokugandja oombandi kaapolisi mboka ya yelwa mopolisi, sha ningilwa moRundu oshiwike sha zi ko.
Aapolisi ye li 147 yomoshitopolwa shoka oya yelwa, moka ye li 54 aakiintu osho wo aalumentu ye li 93.
Nambahu okwa popi kutya mboka ya yelwa otashi ti kutya noondjambi dhawo odha gwedhelwa nonkene okwa popi kutya onkalo yoondjo oya pumbwa okuhulithwa po molwashoka ohayi vulu wo nokuya moshipala iilonga yawo.
“Oondjo ohadhi gumu nayi iilonga yaapolisi, molwashoka ohadhi kala odhindji noonkondo. Etheni okukakutha omikuli nye mu hupe nokashona hoka hamu mono. Kala ashike naashoka to vulu, etheni okuya koLetsego . . . onda tala uumbaapila woondjambi dheni molwashoka ongomukuluntu owu na okutala kutya mbela oshike tashi etitha iilonga ya nkundipala maaniilonga nowu na oku shi talela moonkalo dha yoolooka. Onkene, uuna omuntu e li konima niifuta nenge e na omukuli, iilonga ye ohayi kala ya nkundipala,” osho a popi ngaaka.
Nambahu okwa popi kutya otashi shambula okutala oshitopolwa shaKavango Uuzilo sha mona aapolisi ye li 147 mboka ya yelwa.
“Okupewa onkatu ohashi e ta iinakugwanithwa ya gedhwepo osho wo eitulemo, onkene omwa tegelelwa mu longe mwa tula ombunda moshihwa, mu longe nomikalo omiwanawa lela osho wo mu humithe komeho egandjo lyomayakulo. Omwa tegelelwa mu longele oshigwana pwaana uumbanda washa nenge egamombinga molwashoka aakwashigwana ohaya kala taya nyenyeta kombinga yomayakulo ga nkundipala nonande onkene elelo lyopolisi moshitopolwa hali longo nuudhiginini okushilipaleka kutya aapolisi oya tsuwa omukumo noya pyakudhukwa okugandja omayakulo.”
Nambahu okwa popi kutya okuyela aapolisi shimwe shomoonkambadhala ndhoka tadhi ningwa okutsa omukumo aapolisi ya longe nuudhiginini. Okwa gwedhapo kutya mboka inaaya mona ompito yokuyelwa pethimbo ndika lyolweetho lwotango naya kale ya ngungumana molwashoka otaku ka landula olweetho olutiyali.
Omasiku ga zi ko, ondjayi yEtanga lyOpolisi yaNamibia, Joseph Shikongo okwa popi kutya opolisi ngashingeyi oyi li pokwa adha elalakano lyuuthekepamwe wopaukwashikekookantu moonkatu dhelelo, sho a popi kutya mongashingeyi aakiintu ye li poopelesenda 40 oye li moonkatu dhelelo mopolisi.
Aapolisi ye li 4 682 oya yelwa okuza momasiku 1 Desemba pethimbo lyolweetho lwotango lwokuyela aaniilonga yopolisi.
Momaalwu ngoka, ye li 2 638 aalumentu omanga ye li 2 044 aakiintu, naashoka otashi ti oopelesenda 44 dhaakiintu oya yelwa okupewa oonkatu dhopombanda.
“Otuli poku shi adha, molwashoka ngashingeyi otu na ko owala oopelesenda 10 opo tu adha uuthikepambwe wo50/50 okwiiyutha ketokolo lyOkabinete mokuyela aaniilonga ayehe paukwashikekookantu.” Aapolisi ye li 1 930 otaya ka yelwa okuza ponkatu yuukonstable okuya puushisande 2; aapolisi ye li 1 445 otaya ka yelwa okuza ponkatu yuushisande 2 okuya puushisande 1; ye li 600 otaya yelwa okuza puushisande 1 okuya puuwarrant 2; omanga ye li 707 oya pewa onkatu yuuwarrant 1 okuza puuwarrant 2.
Shikongo okwa gwedha po kutya omutungilo omupe gwopolisi ogwa pewa eptikilo nogwa shainwa kuminista gwiikwameni, omatembu, egameno nepopilo lyoshigwana momasiku 21 Auguste, naashoka oshe eta omadhina goonkatu dhimwe ga lundululwe, yamwe ya yelwe, okutula mumwe oonkatu dhimwe, okwe eta po oompe osho wo okulundulula iinakugwanithwa miimpungu yimwe.
Lwahugunina opolisi kwa li ya yele aaniilonga oyendji, omuDesemba 2020. Olweetho olutiyali lwokuyela aapolisi opo talu ka tseyithwa.
Leave a Reply