‘Aavali naya pule oosikola kutya iimaliwa otaye yi longitha ngiini’

Miminsta gwelongo, uunkuluntu nomithigululwakalo, Anna Nghipondoka okwa lombwele aavali ya pule oosikola dhi ya pe oolopota ndhoka dha ndjandjukununa elongitho lyoshimaliwa shoka ya pewa okuza kepangelo.

Okwa popi kutya oosikola ohadhi pula aavali ya lande iipumbiwa yomosikola yaanasikola ngaashi omambo nosho tuu, omanga hadhi pewa nale oshimaliwa okuza kuuministili sha nuninwa okulanda iipumbiwa mbyoka.

Ndhoka minista okwe dhi popi uunambo pethimbo lyoshigongi shokomitiye yOkabinete, mOvenduka.

“Ongomuvali, pula kutya osikola oya pewa ingapi okuza kepangelo, oshimaliwa oye shi longitha shike, osho wo kutya omolwashike wu na okugandja oshimaliwa kosikola [ongomuvali],” osho Nghipondoka a popi ngaaka.

“Kutha ombinga meilongo lyokanona koye ngoye wu kwashilipaleke kutya elongo tali gandjwa oli na ongushu uuna to gandja sha. Ninga ngaa shoka to vulu okuninga po [wu kwathele], ashike shoka shi ninga owala uuna wa pewa uuyelele wa nkene [oshimaliwa] sha longithwa,” osho minista a popi ngaaka.

Nghipondoka okwa popi kutya oombelewa dhelongo miitopolwa ya yooloka ohadhi topolelwa oshimaliwa opo dhi tumine oosikola sho shi longithwe moompumbwe poosikola dhawo.

“Egandjo lyoshimaliwa [koosikola] nali ningwe nuukeka, molwashoka Oveta yElongo, otayi ti egandjo lyoshimaliwa otali ningwa pakwiiyamba,” osho a popi ngaaka.

Minista okwa popi kutya okwa tseyithila aakuluntu yelongo miitopolwa ya yooloka kutya oosikola nadhi lande kehe shoka dha pumbwa.

“Oshimaliwa shoka inashi pungulwa. Kashi shi shomapungulilo . . . landeni iipumbiwa, dhengeleni aavali etamu ya yelithule kutya ingapi osikola ya pewa, naashoka mwa landa,” osho a popi ngaaka.

Nghipondoka okwa popi kutya sho oosikola tadhi tameke omumvo twa taalela, inadhi pula nande aavali oshimaliwa shokulanda iikwamambo niipumbiwa yelongo lyomulongwa shila oongele pu na etompelo tali uvikiwa ko.