Bielie van ‘n mosiehofrol vandag hanteer – Kosmos 94.1

Bielie van ‘n mosiehofrol vandag hanteer

Regters Boas Usiku en Hannelie Prinsloo het vandag ‘n bielie van ‘n mosiehofrol hanteer met altesaam 140 aansoeke. Kommersiële banke het 67 aansoeke om verstekvonnisse vanoggend in die mosiehof gebring. Daar was agt reël 108-aansoeke op die rol. Daar is 31 eiendomslenings ter waarde van ‘n allemintige 37,54 miljoen Namibiese dollar wat nou betaalbaar is, met 28 lenings waarop 8,436 miljoen dollar geskuld word. Vier voertuie moet ook terugbesorg word. In Maandag se sessie sal regter Herman Oosthuizen 36 onverdedigde egskeidings hanteer.