EHOKOLOLO lyawo otali shambula. Oya tseyathana manga omulumentu a li mondholongo, nolwanima oya gwile mohole.
“Eyambidhidho lye olyo lya gunu ndje ndi kale omuntu omwaanawa. Nguka okuume kandje monkalamwenyo yandje ayihe,” osho Aggrey Makendano a popi ngaaka, pethimbo ta tongonona omukiintu gwe ngoka a hokana konima owala yesiku sho a mangululwa mo mondholongo moka a kala uule woomvula 24.
Onzonkundaneki ndjika oya ningi onzapo okukala pohango yaaholathani mboka mompangu yamangestrata gwaVenduka moKatutura omasiku ga zi ko.
Aakwanezimo nookuume mboka ya li momwaalu omushona oya holoka okukala onzapo yehokano sho omusamane Makendano ta tula olinga komunwe gwomukiintu gwe meme Johanna.
“Ngashingeyi hupita nduno omufuko gwoye,” osho mangestrata a lombwele Makendano ngaaka pethimbo ta tula kumwe ondjokana yawo.
Makendano okwe egamene komufuko gwe nokwe mu hupita, nokwa landula oondigolo.
Aahokanathani mboka oye enda ondjila onde pamwe.
Omusamame Makendano (56), ngoka a li omulongisikola, okwa mangululwa mondholongo yezulonkalo yaVenduka, pwa piti owala oshiwike netata ngashingeyi, sha landula sho kwa li a tulwa miipandeko muAuguste 1999 nokupatelwamo.
Makendano opamwe nayakwawo yaali oya mangululwa mo mondholongo konima owala yoomvula hetatu sho kwa li ya pewa egeelo lyoomvula 15 konima yekuma mu kehe gumwe, mOmpangu yoPombanda yaVenduka, pehulilo lyiihokolola yawo yi na sha neidhopo lyawo monkambadhala yokutopola ko oshitopolwa shaZambezi koNamibia.
Omusamane Makendano – ngoka e na aanona yatano – okwa popi kutya kashali nande oshipu okulala mondholongo oomvula dhi thike mpoka, ashike okwa popi kutya oshe mu longa okukala e na omikalo, okukala nomukumo osho wo okulonga nethimbo.
“Onda thikama kungame mwene opo ndi ilonge . . . Ino hulithapo okwiilonga . . ,” osho a popi ngaaka.
“Okwa kwa silandje oshimpwiyu noonkondo. Ondi mu hole noonkondo nosho nee nda tokola opo ndu mu kaleke monkalamwenyo yandje mbala sho nda mangululwa mo mongali,” osho a popi ngaaka.
Meme Johanna (43), ngoka a yambukile komukunda Onkurenkuru moshitopolwa shaKavango Uuninginino, okwa tsakanene naMakendano kiilonga hoka kwa li ha longele nale, omimvo ne dha piti.
Okwa hokolola kutya okwa kala eshi shi okuza petameko kutya oye omulumentu e mu opalela.
“Okutsakanena nomulumentu nguka osha li sha fa ondjodhi yandje ya tsu. Inandi mona nale ndi holike ngaashi e shi ningile ndje,” osho a popi ngaaka.
Meme Johanna okwa popi kutya okwa kala he mu landele ethimbo lyokongodhi opo ya kale aluhe haya kwatathana nokupopya pangodhi.
“Onda kala handi ke mu talelapo aluhe mpoka tandi vulu, kandali nompumbwe yokuya komuntu gulwe,” osho a popi ngaaka.
“Onda kala nda ngungumana nonda tega a mangululwe mo, nongashingeyi osha fa owala ondjodhi. Oye kuume kandje gwopothingo,” osho a popi ngaaka.
“Onda putuka othigwa nokukala pamwe naye ngashingeyi ohashi pendje lela ombili.” osho a popi ngaaka.
Manga inaaya tulwa miipandeko mo1999, Makendano okwa adhika e na onzapo yodegree.
Konima sho a tsikile neilongo mondholongo, okwa mono odegree yohonours nomasta mElongo, omanga mo2020 okwa mono onzapo yuundohotola.
Ngashingeyi oti ilongele natango onzapo ontiyali yuundohotola.
Johanna okwa popi kutya oha longo nuudhinginini opo a mone oshimaliwa sha gwedhwapo shokufuta eilongo lyomusamane gwe.
Makendano okwa popi kutya okwa pyakudhukwa okutameka iilonga nokwa tinda oku ka longela pondje yoshilongo molwashoka okwa hala okugandja uunongo we megumbo moka omo a mono elongo lye.
Muulethimbo lyiihokolola ye yomompangu pethimbo a kala mondholongo, omusamane Makendano okwa kala moluhodhi sho a
kanitha aavali ye osho wo aanona ye yatatu mboka ya mana oondjenda.
Omukuluntu gwoondholongo dhomazulonkalo moshilongo, komufalandjayi Raphael Hamunyela okwa popi kutya omusamane Makendano okwa kala oye gumwe gomaanandholongo mboka ye na omikalo nohaya ihumbata nawa.
“Oye gumwe gwomaanandholongo mboka kwa li nda pe epitikilo ya longithe omalungula pethimbo lyeilongo lye opo a vule okuninga omapekapeko. Ompito ndjoka ohayi pewa owala aanandholongo mboka taya ihumbata nawa lela,”osho a popi ngaaka.
Meme Johanna okwa popi kutya okwa kala ha shekwa nokuyolwa sho i itula momulumentu e li mondholongo, ashike shoka inashi mu shololitha.
“Otandi pandula ofamili yandje opamwe naasita mboka ya kala nokuyambidhidha ndje muule woomvula ne dha piti,” osho a popi ngaaka.
“Aanona yandje, gumwe okuna omimvo 26 nomukwawo 15, oye hole lela omusamane gwandje, noye mu talaka ko ongatate gwawo,” osho a gwedha po ngaaka.
Leave a Reply