Epangelo lya gandja ombili komukwaniilwa gwOukwanyama

Uuministili wIipambele yOpaigwana nElongelokumwe owa gandja ombili komukwaniilwa gwoshitunda shOukwanyama meekulu Meekulu Martha Mwadinomho Kristian Nelumbu konima sho a kuutumbikwa koshipundi shoplastika pefumviko lyelenga enene Hadino Hishongwa, mOlyomakaya.

Hishongwa oye a li elenga enene lyoshikandjo shaMhedi melelo lyopamuthigululwakalo lyOukwanyama nokwa mana oondjenda mepipi lyomimvo 80, momasiku 31 Auguste numvo.

Hishongwa, ngoka wo a li omupeviminista nomukalelipo gwaNamibia moBotswana, okwa fumvikwa pomawendo gomapendafule mEenhana.

Nakusa okwa li wo oye omugandjimayele gwomukwaniilwa Mwadinomho.

Melandulathano lyefumviko, aalilasa mboka ya talika ko oyo aanenentu okwa li ya pewa iipundi yuuhumi ano omatyofa, nokwa li ya kuutumbikwa komeho, ashike shoka she eta oohapu moshigwana ethano ndyoka lya andjaganekwa koyendji kiikundaneki yopankalathano komalungula nomaipulo kutya omolwashike omukwaniilwa gwOukwanyama a tulwa koshipundi shoplastika.

Methano tali ingaana komalungula meekulu Mwadinomho okuwetike a kuutumba komeho pamwe naanenentu mboka ye li komatyofa ashike ye okwa kuutumba koshipundi shoplastika sha faathana naambyoka ya kuutumbwa kaalilasa ayehe mboka ya li metsali.

Ashike mOmaandaha, omupeviminista gwIipambele yOpaigwana nElongelokumwe, Jenelly Matundu, okwa pititha omukanda gwiikundaneki moka a gandja ombili peha lyuuministili omolwelandulathano inaa lyu uka lyokukuutumbitha omukwaniilwa koshipundi shoplastika omanga aalilasa yalwe mboka ya talika ko ongaanenentu ya kuutumba komatyofa.

“Elandulathano lyokukuutumba olye eta meekulu Mwadinomho a kuutumbe koshipundi shoplastika nonande inashi ningilwa owina, peha lyokukala a kuutumba koshipundi shuunenentu ngaashi shi na okuningwa,” osho a popi ngaaka.

“Oshiningwanima shoka inaashi ningilwa owina, osha kumitha noonkondo aalilasa osho wo aakwashigwana momumbwalangandjo mboka kwa li taya endele pamwe nefumviko kiikundaneki ya yooloka,” osho a popi ngaaka.

Matundu okwa popi kutya epangelo, unene tuu ministili mboka owo wa li noshinakugwanithwa shomalongekidho gaanenentu owa tala ko oshiningwanima shoka ongoshinima oshinene.

“Otwa hala okugandja ombili kumeekulu Mwadinomho osho wo koshigwana ashihe shaHangwena,” osho a popi ngaaka.

“Uuministili wIipambele yOpaigwana nElongelokumwe owi ipyakidhila nomakonakono goshinima shoka notawu ka katukila onkatu mboka ya li noshinakugwanithwa opo ku shilipaleke kutya oshingwanima sholudhi ndoka inashi endululwa we monakuyiwa,” osho Mutundu a popi ngaaka.

Omupopiliko gwongundu yo-Independent Patriots for Change (IPC) miitopolwa yomonooli yoshilongo, Eino Heelu okwa popi kutya okwa kondema shoka sha ningilwa meekulu Mwadinomho mefumviko ndyoka.

Okwa popi kutya meekulu Mwadinomho okwa li e na okukala a kuutumba popepi nomuprimaminista, ngoka oye a li a kalelapo omupresitente Hage Geingob.

“Shoka twa mono, eshundulo nokwaasimaneka omukwaaniilwa okuza kaakwatelikomeho. Ishewe omuntu ngoka a li omuwiliki gwoshituthi shoka, ominista gwetanga lyegameno niipambele yoonakulwa aakulu, Frans Kapofi, ngoka nokuli Omukwanyama. Okwa li e na okukala oye a dhimbulula tango oshipundi hoka kwa kuutumbikwa omukwaniilwa gwetu,” osho Heelu a popi ngaaka.

“Omolwashike omukwaniilwa e na okuningwa ngawo? Omolwaashoka omukiintu? Otwa mona uumentu, mboka hawu ithanwa oominista, wa kuutumbikwa komatyofa guuhumi, omanga meekulu a kuutumba koshipundi shoplastika,” osho a popi ngaaka.

Sho a kwatathanwa naye, Kapofi okwa popi kutya ina nongela ngele omukwaniilwa okwa li a kuutumbikwa koshipundi shoplastika molwashoka ye okwa li owala ta wilike oshituthi. “Kanda li tandi kuutumbike aantu, ando okwa li tandi kuutumbike aantu ando onda mona kutya okwa li a kuutumba koshipundi shoplastika. Oshipundi shoka inandi shi guma molwashoka okwa li sha zalekwa elapi,” osho Kapofi a popi ngaaka.

Okwa popi kutya nonande ongaaka ngele opu na mboka ya hala okushimupela ombedhi, naye shi ninge owala.