Epangelo lya kaleke eteto lyomiti dhomisati moKunene

Uuministili wOmidhingoloko, Omakuti nOmatalelopo owa kaleke eteto lyomisati moshitopolwa shaKunene, okuza oshiwike sha zi ko.

Shoka osha tseyithwa komukuluntuwiliki gwomakuti, Johnson Ndokosho.

Ekalelo lyokuteta po omiti ndhoka olye etwa po sha landula sho uuministili wa ndhindhilike neikwato pomutima eteto lyomisati inaali kondololwa, unene tuu moshitopolwa shaKunene.

Mombapila ndjoka ya tuminwa omukuluntu gwomakuti, Kamuhelo Lisao, Ndokosho okwa popi kutya elelo olya tokola okukaleka iinyangadhalwa ya pamba okuteta po omiti dhomisati nelalakano lyiipindi.

“Ngaashi weshi koneka kutya omiti dhomisati odha gamenwa moNamibia, opu na eikwato pomutima kombinga yekwatelopo lyomiti ndhoka,” osho Ndokosho a popi ngaaka.

Okwa popi kutya omolweikwato lyomudhingoloko osho wo etalo lyomuule kombinga yomisati moKunene, okwa ningwa etokolo opo iinyangadhalwa ayihe yi na sha nokuteta po omiti nelakano lyokuninga iipindi, yi kalekwe.

“Elombwelo ndyoka olya kwatela mo oohandimwe ayehe nomahangano ngoka haga tete omiti, haya landitha, haya fala osho wo okutuma pondje yoshilongo omiti dhomisati,” osho a popi ngaaka.

Pauyelelele wa zi kuNdokosho, omikandapitikilo dhokuteta iiti yomusati, okuhalitha, okufala nokutumina pondje yoshilongo, odha kalekwa manga sigo opo mpito tayi ka tseyithwa. “Etokolo ndyoka olya simana okushilipaleka kutya oonzo dhomiti dhomusati odha kwatelwa po opo ku yapukilwe oshizemo oshiwinayi komudhingoloko shoka tashi vulu okwe etwa konkalo yomiti tadhi tetwa po nelalakano lyomakala osho wo iikuni mongashingeyi,” osho a popi ngaaka.

Okwa popi kutya uuministili otawu ke eta po oshikonga shokutseyithila aanafaalama kombinga yomilandu dhi li nawa ndhoka dhi na okulandulwa kombinga yomiti ndhoka ye na dha tetwa po nale ye na.

“Osha simana noonkondo opo iilikolomwa yomiti dhomisati yi kale yi kwatwe nawa pamukalo gwa gamenenapo omudhingoloko,” osho Ndokosho a popi ngaaka.

“Oombelewa adhihe dhomakuti moshitopolwa otadhi indilwa dhi tule miilonga omalombwelo osho wo dhi nkondopeke omilandu dhokukalekapo ooveta opo ku hulithwe po einyengo lyomiti dhomisati okuza moshitopolwa,” osho a popi ngaaka.

Omupopiliko guuministili wOmidhingoloko, Omakuti nOmatalelopo, Romeo Muyunda okwa popi kutya elombwelo ndyoka olya nuninwa owala aanafaalama yomoshitopolwa shaKunene.

Okwa popi kutya shoka osha landula sho uuministili wa nongele onkalo yaantu taya tete po omiti shaali pamukalo gokukwaleta po uutshitwe womisati moshitopolwa shoka.

“Otwa pumbwa okuhulitha po eteto lyomisati opo tu ninge omapekapeko tse tu talulule etokolo twa tulapo,” osho a popi ngaaka.
Omiti dhomisati ohadhi longithwa moompumbwe odhindji momalandithilo ngaashi iikuni, omakala, iiti osho wo yilwe.
Komisati ohaku zi wo omagungu nomaankowa ngoka ge holike koyendji.