Epangelo tali ka kondjitha ondjala okupitila miikulya yoshikukuta

Omuprimaminista Saara Kuugongelwa-Amadhila okwa koleke kutya moshilongo omu na oshikukuta, moka aantu ya konda po695 000 kwa ndhindhilikwa ye li monkugo yi na onkambe notaya pumbwa ekwatho lyiikulya yoshikukuta.

Okwa popi kutya kapu na omuntu te ethwa a se kondjala omolweteyo ndyoka kwa li lya nkundipala numvo, molwashoka epangelo okupitila maakuthimbinga, otali ka shilipaleka kutya mboka ye li mompumbwe onene yekwatho lyiikulya, oya kwathelwa.

Kuugongelwa-Amadhila ndhoka okwe dhi popi pethimbo lyEsiku lyoPashigwana lyOkushunitha pevi oonkalo dha nayipala, sha ningilwa momudhingoloko gUukwangula, mEtitano.

“Aantu mboka otaya hupu shokadhila, onkene oya pumbwa ekwatho lyepangelo opo ya hupe. Opolohalama yoshikukuta otayi ka gandja iikulya, omeya osho wo omakwatho gaaniimuna pakugandja omahala guulithilo, iiyenditho yokufala nokugalula iimuna yawo komahala guulithilo, osho wo okulanda iikulya yiimuna,” osho a popi ngaaka

Omuprima okwa popi kutya elalakano lyopolohalama yoshikukuta okuhupitha oomwenyo nokukaleka po uuhupilo. Okwa gwedha po kutya epangelo olya gwedhela iikulya mbyoka hayi hawalekwa aakwashigwana, pamukalo ngoka kutya uushako wuusila wepungu mboka wa li pookilohalama 12,5, ngashingeyi owa gwedhelwa nokuningwa wookilohalama 20.

Ashike nando ongaaka otaku ka taliwa kaaniimuna mboka taya ka pewa omayambidhidho giimuna yawo.

“Sho tatu tameke okugandja omakwatho gopolohalama yoshikukuta, okulonga nawa osho wo okukwata nawa ethimbo oyo tayi kala iinima ya talikwa ko ya simana.

Onkene otatu ka longitha omulandu gwomauyelele gwopaungomba tagu ithanwa Commodity and Beneficiary Management Information System ngoka gwa pungula uuyelele waamboka taya pewa ekwatho lyoshikukuta.

Omulandu ngoka otagu kwathele mokugandja uukalata wiikulya mboka tawu ka pewa oohandimwe mboka ya tothwa mo ye li mompumbwe yiikulya yoshikukuta, notaya ka longitha nee uukalata mboka okulanda iikulya moositola ndhoka dha hogololwa mo.

Omulandu ngoka otagu ka kala nomauwanawa ogendji mwa kwatelwa, okuyambulapo omahupilo moshilongo, notashi ka shunitha pevi iifuta yokuthikitha omakwatho goshikukuta naashoka otashi ka hwepopeka oonkambadhala dhepangelo okugandja omayakulo ngaashi sha thamunwa momulandu gwokugandja omayakulo gepangelo,” osho Kuugongelwa-Amadhila a popi ngaaka.

Okwa popi kutya oonkalo dha yaga kegonga ngaashi ndhoka dhoshikukuta, ohadhi yi moshipala omathaneko gepangelo gomahumithokomeho, molwashoka oshimaliwa ohashi lundululilwa mokukondjitha omaupyakadhi ngoka ga taalela oshigwana.

“Onkalo dha nayipala, kutya nee odhe etwa kaantu nenge odhopaushitwe, kadhi na oongamba. Ihadhi tongola shi ikwatelela koonkalathano, komahupilo nenge komahala, ashike oshizemo ihashi gumu aantu pamukalo gwa faathana.
Ohashi kala sha guma nayi mboka taya nana nondatu kaaye na sha shokuhupa.

Omanga oonkalo ndhoka ihaadhi vulu naanaa okukeelelwa, omalongekidho nomakwatho otaga vulu okuhwepopeka oonkalo ndhoka dha holoka po notadhi vulu okupupalekwa,” osho a popi ngaaka.

Okwi indile wo aakuthimbinga, omalelo goondolopa osho wo omalelo gopamuthigululwakalo ya shilipaleke kutya aakwashigwana oya tembukapo pomahala ngoka haga dhengwa kefundja.

Omasiku ga zi ko, omupopiliko gwelelo lyoshitopolwa shaShikoto, Peter Nehale, okwa popi kutya omulandu gwegandjo lyoshikukuta otagu thamuna kutya opo omuntu a pewe iikulya yoshikukuta, megumbo lyaandjawo inamu kala nande hamu pewa nale omakwatho ga sha giikulya okuza palwe, naakalimo mboka hazi megumbo limwe naya kale ihaa ya mono ekwatho okuza kepangelo lyoshimaliwa kumwe sha konda pooN$2 800.

Ngoloneya gwoshitopolwa shaShikoto, Penda ya Ndakolo okwa popi kutya aakalimo oyendji oya gumwa koshikukuta – unene tuu aaniimuna.

“Onkene, otwa pumbwa okuninga po omalongekidho taga pumbiwa okuhupitha iimuna. Itashi holekwa kutya oshitopolwa shetu onkene sha taalelwa komashongo gompumbwe yomeya, unene tuu momikunda ndhoka dhi li kokule, hoka oshimoko hashi nyengwa okuthikitha ko omeya, nenge komikunda ndhoka dhi na omeya goshimongwa.

Onkalo ya yaga kegonga ndjoka tuna ngashingeyi oya gwedhele owala uupyakadhi womeya mboka twa kala twa taalela nale,” osho a popi ngaaka.

Onkalo yoshikukuta nondjala moshitopolwa shaShikoto omolwomuloka gwankundipala numvo, oye eta aakalimo ye li po54 000 nomagumbo ge li po13 500 ya kale mompumbwe onene yekwatho lyiipalutha momukokomoko gwoomwedhi twa taalela.

Omukuluntuwiliki mOmbelewa yOmuprimaminista, I-Ben Nashandi, okwa popi kutya epangelo okupitila mOmbelewa yOmuprimaminista, olya gandja oshimaliwa shi li poomiliyona N$100, sha nuninwa ekondjitho lyuupyakadhi wompumbwe yomeya miitopolwa mbyoka ya dhengwa kenota moshilongo ashihe.

Okwa popi kutya epangelo otali ka gandja wo iikulya yoshikukuta kaakwashigwana miitopolwa ya yooloka okuza momasiku 1 Kotoba sigo omomasiku 31 Juni 2024, omanga aaniimuna nayo otaya ka pewa omakwatho giikulya yiimuna yawo pokati kaKotoba numvo sigo omomasiku 1 Maalitsa omumvo twa taalela.