‘Gesertifiseerde’ ontwouding in Kanada onvolhoubaar
‘n Reuters ondersoek het bevind dat daar in werklikheid ‘n krisis is met Kanada se gesertifiseerde, volhoubare houtbedrywighede. Standaarde vir bosbou is reeds in die 1990’s geskep maar navorsing toon dat Kanadese woude oor die afgelope twee dekades van die wêreld se grootste afnames in ekologies kritieke primêre en ougroeiboslande aangeteken het. ‘n Ontleding in Ontario toon dat sowat 30 persent van die gesertifiseerde boreale woude wat van 2016 tot 2020 geoes is, minstens 100 jaar oud was. Dit het gelei tot die verlies van 607 vierkante kilometer, ‘n gebied so groot soos New York City en Washington D.C. gekombineer.