EHULILOSHIWIKE lyotango lyomumvo 2024 olya ndhindhilikwa iiningwanima yiimbuluma miitopolwa ya yooloka moshilongo, naashoka osha tseyithwa okupitila molopota yopolisi ndjoka ya pitithwa mOsoondaha.
Opolisi moTsumeb oya tula miipandeko aafekelwa miiningwanima iyali ya yooloka sho ya adhika taya kambadhala okupititha omalovu guuwiski woBEST mboka wi indikwa okulandithwa moshilongo.
Aafekelwa mboka oya kwatelwa pomboloka yopolisi ndjoka tayi adhika pomatsakaneno goopate ne moTsumeb, mEtitano.
Moshiningwanima shotango, omuhingi gwombesa gwomimvo 31 okwa tulwa miipandeko konima sho a kwatwa nuuwiiski wongushu yooN$52 800.
Ombesa ndjoka otaku hokololwa ya thikamekwa pomboloka noya hadhwa kopolisi sha ningwa lwopotundi 00h30.
Uuwiski mboka otaku hokololwa wa adhika wa holekwa mombesa. Moshiningwanima sha faathana, opolisi oya tula miipandeko omuhingi gwombesa gwomimvo 52 sho taku hokololwa a adhika niinima inaayi pitikwa yongushu yooN$124 700.
Shoka osha landula sho mombesa ndjoka kwa li ta hingi mwa adhika uupakete womakaya inaa ga pitikilwa moshilongo goYes osho wo uupakete womalovu gowiski yoBEST, niinima mbyoka otaku hokololwa hayi pitithwa okuza koAngola nokufalwa yi ka landithwe muushimba.
Aafekelwa ayehe oya holoka mompangu yamangestrata gwaTsumeb, mOmaandaha.
Pokati mpoka, omukiintu gwomimvo 45 okwa tulwa miipandeko sho taku hokololwa a adhika nomahooli shaali paveta nokwa ndopa okugandja uumbangi tawu ulike mpoka a landa omahooli ngoka.
Oshiningwanima shoka osha ningwa mOlyomakaya, momukunda Okatope.
Omufekelwa otaku hokololwa a adhika nomandini 45 goolita 25 gomahooli godiesel, osho wo endini limwe lyomahooli godiesel; lya pwa, okwa adhika wo nuundini utano woolita ntano womahooli godiesel.
Kumwe omandini ngoka a adhika nago ogonushu yooN$25 307.
Omufekelwa ngoka okwa holoka nale mompangu yamangestrata gwaNdangwa.
Moshiningwanima sha yooloka, oshihauto shotuukala osha kana mEtitano sho taku hokololwa kutya osha yakwa pegumbo tali adhika mEhenye mOshakati.
Pauyelele wopolisi, pehala lyoshiningwanima opwa adhika oompadhi dhaafekelwa yaali, notaku hokololwa kutya aafekelwa mboka, otuukala oye yi yaka po sho ye yi undula po nolwanima oye yi hingi po nokufadhukapo.
Oshihauto shoka otaku hokololwa kutya oshongushu yooN$40 000.
Omakonakono gopolisi otaga pula komeho nonande kapu na ngoka a tulwa miipandeko sigo oompaka.
Pokati mpoka, omulumentu gwomOtamanzi moshitopolwa shaMusati okwa mana oondjenda mOlyomakaya sho taku hokololwa a tsuwa nombele yokapi montulo sha ningilwa puundingosho.
Nambala Titus (31) okwa mana oondjenda kuuwehame woshilalo shombele. Omufekelwa okwa tulwa nale miipandeko.
Pauyelele wopolisi, pehala lyoshiningwanima opwa adhika ombele ndjoka ya longithwa komufekelwa. Omakonakono gopolisi otaga pula komeho.
Monkundana yilwe yoluhodhi, omatalelipo George Pieterse (61) okwa mana oondjenda ombaadhilila omanga e li moshihauto ongomufaalelwa sha ningilwa moHenties Bay, mOlyomakaya.
Pieterse otaku hokololwa a hulitha pethimbo ya li nakuume ke ya thinda pehala lyokuyunga oontanda dhaatalelipo tali ithanwa Mile 108, komukulofuta.
Opolisi oya popi kutya sho omuhingi gwoshihauto a dhimbulula kutya Pieterse ku uvite nawa, okwa thikameke oshihauto. Omupangi gwepangelo oye a koleke kutya omutalelipo ngoka okwa mana oondjenda, sha landula sho mwi idhopo opolisi, nomudhimba gwe ogwa falwa kokila kOmbaye.
Aapambele yanakusa oya tseyithilwa nale onkundana yoluhodhi.
Moshiningwanima sha yooloka, omufekelwa ngoka taku hokololwa kwa li ta kambadhala okuteya egumbo okwa yahwa nokusa kopolisi yoshilandopangelo sha ningilwa momudhingoloko gwaKhomasdal, mOsoondaha sho aafekelwa kwa li ya tameke oku umba opolisi. Otaku hokololwa kutya opolisi yoshilandopangelo okwa li ya tseyithilwa kutya opu na oombudhi mbali tadhi kambadhala okuteya egumbo, noye endelele ya ye pehala lyoshiningwanima shoka.
Sho opolisi ya thiki pehala ndyoka aafekelwa mboka yaali otaku hokololwa yu umbu mewangandjo oholo yelondodho nolwanima oya tameke oku umba aapolisi.
Opolisi oya yamukula sho yu umbu aafekelwa mboka naashoka oshe eta gumwe a kwatwe koholo.
Aanambelewa yekwatho lyotango oya tseyithwa kopolisi noye ya mbala pehala lyoshiningwanima noya koleke kutya omufekelwa ngoka okwa hulitha. Omufekelwa omutiyali okuliwe natango mokashoko.
Omakonakono gopolisi otaga pula komeho.
Leave a Reply