Inamu landa we iinima ya yakwa– Shikongo

ONDJAYI yetanga lyopolisi moshilongo Joseph Shikongo okwi indile aakwashigwana ya yande okulanda iinima ya yakwa molwashoka onkalo ndjoka ohayi hwahwameke uufuthi.

Okwi indile wo aapolisi ya shilipaleke kutya otaya gandja omayakulo gondjungu koshigwana.

Ndhoka Shikongo okwe dhi popi mEtitatu lya zi ko pethimbo a ningi oshigongi mOshakati sho a popi kutya opolisi otayi lalakanene okwiindjipaleka omwaalu gwaapolisi okuya paaniilonga 28 000 molwashoka mongashingeyi oye li mompumbwe onene yaapolisi.

Okwi indile oshigwana shi kalekepo aluhe elandulathano nombili.

“Otwa pumbwa okuyambulapo eliko lyetu, ashike shoka otatu shi pondola ngiini ngele katu na ombili? Ishewe otatu kalekepo ngiini egameno ngele kapu na ombili?

“Ombili oyo oshinima sha simana, inatu hala okulongwa kombinga yombili, molwashoka tse ongaaNamibia otu na ombili.

Emanguluko lyoshilongo shetu inali ya pokapala kayela – opwa tikila ombinzi – onkene shoka osho nee tatu ti itatu etha nande eyonagulo lyombili ndjoka tuna ngashingeyi,” osho a popi ngaaka.

Komanda gwopolisi yoshitopolwa shaShana, komufala Naftal Sakaria okwa popi kutya opolisi moshitopolwa shawo oye shi pondola okushunitha pevi onkalo yiimbuluma sho ya nkondopeke omilandu dhokulwitha iimbuluma osho wo dhelongelokumwe.

Okwa popi kutya momukokomoko gwomatango omanene, inaya ndhindhilika nande onkalo yi li pombanda yiimbuluma moshitopolwa shawo molwashoka opolisi oya kala yi li uupathi okutonatela nokukwathela oshigwana.

“Otu uvite etumba okupopya kutya iimbuluma moshitopolwa oya shuna lela pevi . . . Monakuziwa otwa li naantu mboka ihaaya vulu okukutha iimaliwa ondumba nenge oku yi fala kombaanga molwashoka oya kala nuumbanda kombinga yegameno lyoonkalamwenyo dhawo, ashike ngashingeyi otatu popi twa ndjangumuka kutya shoka osha ninga oshinima shonkulu yonale. Omagumbo ngashingeyi itaga teywa we ngaashi kwa li hashi ningwa monakuziwa. Iimbuluma oya shuna lela pevi mOshana notatu shi pandulile aapolisi mboka ye li uupathi ethimbo kehe,” osho Sakaria a popi ngaaka.

Ashike nande ongaaka okwa popi kutya opolisi moshitopolwa shawo oya taalelwa komashongo ngaashi gaapolisi inaaya gwana, iihauto yopolisi inaayi gwana, omahala giitaasi yopolisi omashona osho wo omwaalu gwaantu mboka taya tembukile moondoolopa.

Sakaria okwi indile Uuministili wIikwameni, Omatembu, Egameno nEpopilo lyoshigwana we ete po iitaasi iishona yopolisi momikunda opo omayakulo gopolisi ga hedhithwe popepi noshigwana.