Kadiva Hamutumwa oye ta ka kwatela komesho ehangano lounona vekondjelomanguluko – Oshiwambo

Ehangano lounona vekondjelomanguluko ledina The Namibian Exile Kids Association (Neka) okwa li la ninga oshoongalele mexuliloshivike, osho vamwe tava ti okwa li olwoodi lopapolotika olo hali kala moSwapo alushe.

Ehangano, olo la teelelika opo li tambulwe ko pambelewa li ninge oshitai shongudu tai pangele, okwa li la ninga oshoongalele shotete shomahoololo kOtjiwarongo, ovanhu vahapu ovo kwa li ve li moshoongalele omu ova dja mo shaashi kave uditafane molwomananafano pokati keekandidate.

Omakulukuto okwa fininika hamushangandjai woSwapo, Sophia Shaningwa, oo naye a li moshoongalele omo Olomakaya, opo eshi ete pexulilo ta ti eekambaina dehangano odo dihe shi diwa otadi kumu oSwapo neekambaina dasho di na sha nomaahoololo oo taa ka kala ko momafiku 27 Novemba.

Ovatumwakalelipo voNeka inava landula nande omapopyo aSophia Shaningwa, ova ya komesho noshoongalele ndele tava hoolola elelo lipe.
Omundjadjukununi woikwapolotika Rui Tyitenda okwa ti ina kumwa nande komatanguno oo a li a holoka pefimbo loshoongalele shokuhoolola elelo lipe loNeka.

“Elelo loNeka ola anya omalombwelo okudja koSwapo ngee tashi ya koinima ihe li mondjila, okulikala koshi nokunukila pomutenya kombinga yokutota omilandu nomalandulafa oo taa wilike ehangano paudemokoli,” Osho a ti ngaho.

“Osha yela nawa kutya oinima aishe ya puka oya kunwa mehangano loNeka,” Osho a ti ngaho.

Tyitenda okwa ti nande pu na omanyenyeto opapolotika, oukwashili woNeka owa fiya omalipulo movanyasha ovo va itavela kutya ounona vekondjelomanguluko ohava talika unene ngee tashi ya poilonga yepangelo.

Omundjadjukununi woikwapolotika, Ndumba Kamwanyah, okwa ti omakulukuto oo e li pokati kovatumwakalelipo voNeka otashi dulika a xwaxwamekwa komatopauko oo e li moSwapo.

“Ondi wete kutya ehangano kali shi vali eshi tali ningi ndee eshi otashi etwa komatopauko oo e li moSwapo. Eshi osha eta tu mone omatopauko mehangano lounona vekondjelomanguluko,” Osho a ti ngaho.

Kamwanyah okwa ti Neka okwa ka nifa elalakano, okwa weda po vali ta ti elalakano layo okwa li okupopila onghalonawa younona vekondjelomanguluko ovo kwa li va dalelwa kombada ile kwa li va ya kombada peedula dopedu lela.

“Ngee owa tale komananafano oo e li po paife, elalakano lehangano ola undulilwashi, ndee paife otu wete ovanhu tava lwile okulela mehangano,” Osho a ti ngaho.

Omukokoli pelesidente wehangano loNeka, Benita Naakambo, oshivike eshi okwa kunghilila ehangano opo li kale li na nokuyambula po onghalo nawa noukwatya wOvanamibia ovo va kulila kombada pefimbo lekondjelomanguluko.

Okwa ti ovo va hala okulongifa ehangano opo va ye peenghatu doilonga moSwapo nave likaleke kokule nokuninga ngaho.

“Neka ina longifwa ongomukalo upu okuya peenghatu dongudu. Keshe ou a hala okuninga ngaho, ohatu ku kunghilile opo uye peenghatu doSwapo, ngaashi ovanhu aveshe va ya po,” Naakambo osho a ti ngaho.

Okwa ti Neka na kale alushe ta popile omauwa ovakondjelimanguluko puhe na oumbada ile olwaamambinga.

“Katu na efimbo lokukala ashike ovahakeli vomake, oombushe moilonga, otu li apa tu wanife po oshilalakanenwa, ndee natu diinine oshilalakanenwa osho nefimaneko. Itashi vatele sha okutya ove omufimanekwa, ashike natango kapu na osho tashi ulike efimano kombinga yoye,” Naakambo osho a ti ngaho.

ELELO LIPE

Omahoololo okwa li a danenwa komakateko, ovatumwakalelipo tava di mo moshoongalele nomapopyo a kaka”.

Konima eshi a uda oshinima shi li ngaha, Shaningwa okwa shanga omukanda wa kola, ta pula opo ovatumwakalelipo va undulile oshoongalele komesho.

“Eekambaina deni odo di i otadi kakeke oSwapo shaashi otu na ko ashike eemwedi di shona opo tu ye momahoololo, ndee odi na okukuma eekambaina dongudu yetu momukalo wii,” Osho a shanga ngaho.

Ashike nande ongaho oshoongalele osha twikila nokuninga omahoololo ovaleli vape.
Kadiva Hamutumwa oye a findana po oupelesidente woNeka nomawi e li 125, taku yelekanifwa nomawi anhe oo a dja mo naao a li nale pelesidente wongudu Rauna Amutati..

Sacky Nendongo okwa ninga omupedu pelesidente eshi a dja mo nomawi 108, omanga Elizabeth Shimwafeni kwa li a hoololwa a ninge hamushangandjai eshi a dja mo nomawi 110, Simubali Simubali okwa li a hoololwa a ninge omupedu hamushangandjai eshi a dja mo nomawi 65.