Kamatyona (13) i imangeleke sho a gandwa kaavali

Kamatyona gwomimvo 13 okwi imangeleke molukanda lwaTjomuise mOvenduka oshiwike sha zi ko sho taku hokololwa a nyenyetelwa kaavali ye konima anuwa kwa nongelwa ta tala uuvidio wopaihulo.

Pauyelele wopolisi, yinagona gwanakusa Man Katutundu(13) otaku hokololwa oye a tseyithile aavali ye, kutya okwa adha ta tala uuvidio wopaihulo.

Aapambele yanakusa oya tseyithilwa nale onkundana yoluhodhi, nomakonakono gopolisi otaga pula komeho.
Omuhungimwenyo Veronica Theron okwi indile aavali ya kale ya mangulukila aanona yawo ngele otashiya koku ya kumagidha kombinga yiihulo.

“Ngele okanona koye oki itsu miinima ya nika iihulo, owu mu pula kutya okwe yi mono ngiini . . . opo wu tseye ngele owa pumbwa okugandja egameno lya gwedhwa po [lyokuyanda kaamone we iinima mbyoka],” osho a popi ngaaka.

Okugwedha kwaashoka, okwa popi kutya osha simana “okushilipaleka okanona koye kutya kakeli moshiponga [shokudhengwa, uuna ka mono iinima mbyoka]”.

Theron okwa popi kutya uuna okanona ka ngungumana, opo nee omuvali ta vulu okwe eta po ehokololo lyokukumagidha kombinga yuuvidio wopaihulo.

“Okukundathana kombinga yohole niipambele yopaihulo oshinima sha simana. Ngele otashi vulika, kambadhala okukandulapo uupyakadhi mboka pamwe [nokanona],” osho a popi ngaaka.

Onkalo yaanona taya ikutha oomwenyo okwa konekiwa tayi indjipala moshilongo. MuJuni, kamatyona gwomimvo 11 Christopher Boois, ngoka a li mondondo 6 posikola Krönlein Primary School mondolopa yaKeetmanshoop, okwi imangeleke.

Pauyelele wopolisi, omukwatakanithi gomakonakono giimbuluma mopolisi ya//Kharas, Nicodemus Mbango, pethimbo ndyoka okwa popi kutya Boois okwa yapukilwa kongundu yaanasikola yaamati noya tameke oku mu hinda noku mu dhenga.

“Onzapo ye oya tuulwa po, nohema ye osho wo ombindja ye okwe yi kuthwa. Okuza mpoka otaku hokololwa Boois a tondokele kegumbo nokwa tseyithile yinagona kombinga yoshiningwanima shoka,” osho Mbango a popi ngaaka.

Boois nayinagona oya yi kosikola opo ya ka lopote oshiningwanima shoka komukuluntusikola.
Ashike, sho ya galukile kegumbo lwanima Boois okwi ikutha omwenyo.

MuJanuali, Penato Sageus(7) okwa mana oondjenda mondolopa yaMaruru sho taku hokololwa i imangeleke. Pauyelele wopolisi aavali yaSageus okwa li ya zi mo megumbo ya landule ompadhi yomufuthi ngoka a yaka oshikombo moshigunda shaandjawo – noya thigi Sageus opamwe naamwayina gumwe oku na omimvo ne gumwe ntano, megumbo.

Opolisi oya fekele kutya Sageus kali a nyanyikilwa sho ya lombwelwa ya kale megumbo omanga aavali ya landula ompadhi, naashoka oshe eta kamatyona ngoka i imangeleke. Oshiningwanima shoka osha ningwa ethimbo lyongula.