Kapitaalprojekte is bewys van Swapo se mislukking – Kosmos 94.1

Kapitaalprojekte is bewys van Swapo se mislukking

Die nuus dat rondom 43 kapitaalprojekte deur die Namibiese regering laat vaar is, lok steeds reaksie uit. Luidens ‘n verslag deur die ministerie van werke is die waarde van die projekte rondom 990 miljoen Namibiese dollar en die minister, John Mutorwa, sê die skuld lê by die kontrakteurs, al is hulle deur die regering aangestel. Onder die projekte is behuising, hospitale, skole en meer. Volgens die verslag is die konstruksie van 326 huise in die hoofstad, ter waarde van 45 miljoen dollar, reeds in 2017 laat vaar terwyl die kontrakteur wat aangestel is om die Keetmanshoop-hospitaal op te gradeer, nie die kapasiteit of vaardighede daarvoor gehad het nie. Die projek, met ‘n beraamde waarde van 23 miljoen dollar, is reeds in 2016 laat vaar. Die president van die opposisie, die PDM, McHenry Venaani sê dit bewys net weer die mislukking van die Swapo-regering.