La ninga vali efimbo laDonald Trump lokushuna koshipundi

Pelesidente waAmerica oo a hoololwa Donald Trump ota dulu okukufa ko komavatelo omayambulepo nomayambidido opashimaliwa oo haa pewa oilongo ngaashi Namibia.

Trump okwa li a hoolululwa Etitatu, osho sha ninga ondjokonona yakula yokwaalukila keumbo lepangelo eshi a denga mo okandidate kongudu yoDemocratic Party noke li omupedu pelesidente woshilongo Kamala Harris Etitatu.

Efindano laye ole ya konima yefiku limwe eshi kwali a longifa elaka la nyika outondwe kombinga yaHarris, osho sha wedwa kondjokonona yaye yokukala ha tongola oukakwashikekookanhu.

Epangelo laAmerica ola kala la fimana mokuvatela Namibia noshimaliwa moshikondo shoundjolowele nosho yo shomidingonoko oule weedula.

Omido mbali da pita, America okwa li a yandja eengumi di dule peemiliyona heyali koministili youndjolowele nomayakulo pangahalafano opo oinima oyo i kufe po omumbwe oyo ya li po. Omukulunhu wehangano lokuninga omakonakono omilandu depangelo ledina Institute for Public Policy Reseach Graham Hopwood okwa ti oshikako shitivali shaTrump mombelewa itashi tengenekwa naana kutya otashi ka kala ngahelipi shoo otashi dulika shi ka kale shadundakana.

“Otashi dulika a ka tete omavatelo, mwa kwatelwa neepolohalama ngaashi oyo yapelesidente yedina Emergency Plan for AIDS Relief (Pepfar) neeproyeka dikwao, ngaashi kombinga yoikwanghono.

“Otu na okuteelela ndee hatu tale, ashike omapopyo aye omafiku aa okwa ulika kutya ita ka hala elelo laye li vatele Africa,” Osho a ti ngaho.

Hopwood okwa ti elelo laTrump otashi dulika ashike li ka kale tali tale moshilongo, li na outondwe wovanhu wovadjaidjai.

“Pakutala eshi a li mombelwa tete (momudo 2016 fiyo 2020), Trump ke na ohokwe muAfrica. Ashike nande ongaho, okwa li a fiya po eepolohalama domavatelo ngaashi oPepfar konima eshi kwa li a hekwa kuGeorge Bush kutya okwa li ya fimana okwaamena eemwenyo,” Osho a ti ngaho.

Hopwood okwa ti opolohalama yoPepfar oya kala tai yandje omauwa ahapu koshikondo shoundjolowele shaNamibia noya vatela unene mokulwifa ombuto yoHIV-AIDS.

“Otwa yuka mefimbo tuhe shi kutya oli li ngahelipi,” Osho a ti ngaho.

Omukalelipo mukulu waNamibia koAmerica, Tuliameni Kalomoh, okwa ti omilandu dokondje yoshilongo inadi popiwa naana unene pefimbo leekambaina domahoololo.

“Ohatu kufa onyama moshilongo, okawe noUranium, mokati ashike kaikwao ya yuka koAmerica. Omalandifo etu aa oku li koshi yokatendo koGrowth and Opportunity Act (Agoa) pakwatafano naAmerica, oko ka kala po nale nopefimbo loshikako shotete shaTrump.

“America natango oha yandje omavatelo opashimaliwa kuNamibia okupitila mopolohalama yoPepfar. Oinima aishe ei opo ya kala nale nopefimbo loshikako shotete shaTrump. Kandi wete ngee ota xulifa po nande oshimwe,” Osho a ti ngaho.

Kalomoh okwa ti Namibia ina ninga omilandu daye shelikolelela koindjemo yomahoololo oshilongo shi lili.

Kalomoh okwa ti pokati kaTrump naBiden kapu na ou kwa li e na naAfrica naana pefimbo loikako yavo yotete.

“Ashike ota [Trump] weelele nawa kombinga yokuxulifa po oita oyo i li moUkraine. Eshi osha mbadapaleka oNato neenghono,” Osho a ti ngaho.

Kalomoh okwa ti Africa ne lipule kombinga yomalaka oukwamuhoko aTrump taa hololwa komadina a nyika outondwe oo Trump ha ifana oilongo yaAfrica.

Ominista youndjolowele nomayakulo opanghalafano Kalumbi Shangula oya ti pefimbo loshikakoshotete shaTrump kakwa li naana pu na omalunduluko akula shi na sha noshikondo shoundjolowele.

“Trump keshi omunhu mupe, opo a kala nale. Otu na omukumo kutya oinima otai ka enda nawa ashike,” Osho a ti ngaho.

America okwa yandja yo oshimaliwa shihapu koshikondo shokukaleka po oimeno noinamwenyo.

Ominista yomidingonoko, omakuti nomatalelepo Pohamba Shifeta oya ti epangelo laTrump kali na omauwii koshikondo shomatalelepo.

“Omilandu daAmerica itadi lidopo momalinyengo ovatalelipo. Ohatu twikile nokunana ovatalelipo okudja koAmerica,” Osho a ti ngaho.

“Trump okwa li opelesidente nale notwa kala tu na makwatafano mawa. Namibia oku mu shi. Ofamili yaye oko hai ya oku i yashe oifitukuti.”