Komufalandjayi gwoondholongo dhezulonkalo moshilongo, Raphael Hamunyela okwa popi kutya moNamibia kamu na endiki lyoondholongo lya nuninwa aanona ye li kohi yomimvo 18 mboka ya longa iimbuluma, naashoka oshe etwa konkalo yomwaalu gu li pevi noonkondo gwaanona mboka taya patelwa mokakuma uuna ya longa iimbuluma.
Hamunyela shoka okwe shi yelitha konima sho olutu lwuuthemba menenevi Africa lwedhina Africa Charter lwa pula Namibia opo a tunge po endiki lyondholongo yezulonkalo lyaanona nenge pu tulwe ehala lyi kalekelwa lyondholongo yaanona mboka ya pogola.
Shoka Africa Charter okwe shi pula opo aanona ya kale yi ikalekelwa noya kuthwa maakuluntu uuna ye edhililwa mondholongo naashoka ando otashi ningwa kwi ikwatelelwa kEuvathano lyIigwanahangano kombinga yuuthemba waanona.
Komufala gwoAfrica Charter, Janet Ramatoulie Sallah-Njie, pethimbo a talelepo Namibia omasiku ga zi ko, okwa popi kutya Namibia okwa pumbwa okudhika po ondholongo yaanona opo ashike kushilipalekwe kutya aanona mboka ya longa omiyonena oya pewa ezulonkalo lyi li nawa nokugunwa ya vule okushuna moshigwana, naashoka otashi kala sha kwatela mo iikondo yelongo.
“Okwa li tu na endiki lya tungwa po nelalakano lyaanona mboka ya yona. Ashike omolwomwaalu omushona gwaanona mboka ya yona, inatu vula oku li kaleka po. Omathimbo gamwe okwa li owala to adha mo aanona inaaya konda po10,” osho a popi ngaaka.
Hamunyela okwa popi kutya ngashingeyi endiki ndyoka olya tulwa mboka ya longa iimbuluma ngaashi yomahepeko gopamilalo nenge omakwatonkonga.
“Mongashingeyi, otu na owala aanandholongo yaanona ye li yane. Aanona mboka momandiki oye li mo yi ikalekelwa, noye edhililwa moondjedhililo ndhoka dhi li popepi naampoka ya yambukile […] molwashoka ngaaka otashi kala oshipu opo ya vule okutalelwa po kaakwanezimo nokumona omakwatho galwe. Otu na owala aanandholongo yaanona ye li yane, notwe ya tula momandiki goondholongo moka mwe edhililwa aanandholongo. Ashike nando ongaaka, kaye li nande mekwatathano naanandholongo yaakuluntu,” osho a popi ngaaka.
Hamunyela okwa popi kutya ihaya tula mumwe nande aanandholongo yaakiintu naalumentu, ashike nando ongaaka aanandholongo ayehe ohaya pewa iipumbiwa yawo.
“Aanandholongo yaanona oyo hatu tala ko tango, oye li oshitopolwa shaanandholngo mboka ya sheywa nohaya ihumbatelwa sha sheywa. Ohatu uvu ko oompumbwe dhawo, mwa kwatelwa dhelongo osho wo iipumbiwa yesiku. Kehe kendiki, otu na ko aanambelewa yelongo mboka haya kwathele aanandholongo,” osho hamunyela a popi ngaaka.
Hamunyela okwa popi kutya aanandholongo oye na oku shi uva ko kutya yo aanandholongo opo owala taya vulu okutaamba ko onkalo nelunduluko ndyoka lya holoka moonkalamwenyo dhawo.
“Aakwashigwana naya tseye kutya okwe eta iinima ngaashi iingangamithi moondholongo ohashi tula moshiponga nokuyona po omuntu osho wo aaholike yawo mboka ye li moondholongo. Natu longeleni kumwe atuheni opo tu kwatheleni aantu mboka ye li momazulonkalo. Otatu ya gamenenepo, ashike aantu yamwe oya hala ishewe oku ya teya po,” osho a popi ngaaka.
Mo1994, Namibia okwa ningi shimwe shomiilongo yotango okuninga oonkundathana kombinga yuuyuuki waanona mboka ya yona.
Omundjandjukununi Ndumba Kamwanyah okwa popi kutya pethimbo ndyoka okwa li kwa monika kutya aanona oyendji mboka ya li moondholongo oomboka yoshipa oshiluudhe osho wo mboka ye li moonkalo dha nkundipala pamahupilo nopankalathano, noyendji okwa li ya pewa omageelo gondholongo omolwiinima yanathangwa ngaashi okuyaka oshinima shontumba mositola.
Leave a Reply