Omupeviperesitente gwongundu yoSwapo ngoka wo oye minista gomakwatathano gopaigwana nelongelokumwe Netumbo Nandi-Ndaitwah okwa holola okwaauvanawa kombinga yaanambelewa yOmelelo lyOshitopolwa shaShana mboka taku hokololwa ya mangwa omolwuulingilingi.
Nandi-Ndaitwah okwa popi kutya “uulingilingi mboka uunene” owa monika melelo lyoshitopolwa shoka sha landula sho aanambelewa yamwe ya ningi onkambadhala yokutula moondjato dhawo oshimaliwa kwa li sha nuninwa okutunga oondama dhomeya ntano momikunda dhomoshitopolwa shaShana.
Okwa popi oondama ndhoka okwa li dha nuninwa okuhwepopeka onkalo yompumbwe yomeya moshitopolwa unene tuu kaanamikunda mboka taya lili enota, nokwa li wo tadhi vulu okutegeka omeya pethimbo lyefundja opo omeya ngoka ga vule wo okulongithwa kaakwashigwana monakuyiwa.
Ndhoka, Nandi-Ndaitwah okwe dhi popi pethimbo lyoshigongi oshinene shongundu yawo shoka sha ningilwa mOshakati, moshitopolwa shaShana, mOlyomakaya.
“Uulingilingi mboka uunene owa monika, ishewe itandi pitike nande onkalo ndjoka yi tsikile. Moondama 11 ndhoka dha li dhi na okutungwa moshitopolwa shaShana, iilonga yokutunga oondama ne oya kalekwa molwashoka opwa monika pwa longwa uulingilingi uunene, omanga oondama dhilwe odhi li metifa lyokutungwa. Okwa li ndu uvanekele okutungitha ondama momukunda gwaKaku. Onda gandja oshimaliwa okuza mondjato yandje opo shi tungithe ondama yomOkaku, ashike etungo olya kalekwa omolwuulingilingi. Okwa li ya hala okutunga oondama ndhoka okupitila muulingilingili opo yi imonene omauwanawa. Uulingilingi omo wu li moshilongo, nonda hala okupandula elelo lyoshitopolwa shaShana ndyoka lya dhimbulula uulingilingi mboka . . . onda hala okulombwela ngoloneya gwoshitopolwa shaShana a ye koohahende mbala opo ku shilipalekwe kutya oondama ndhoka odha tungwa mbala omanga omuloka inaagu tameka,” osho a popi ngaaka.
Pauyelele wonzonkundaneki ndjoka ye eta uulingilingi mboka pongalangala, aanambelewa mboka taya gandja otendela mombelewa yelelo lyoshitopolwa shaShana, otaku hokololwa ya gandja ootendela dhokutunga oondama kookuume kawo nokaapambele mboka nokuli kaaye na ontseyo yokutunga yo ishewe kayena iilongitho.
Otaku hokololwa nokuli kutya gamwe gomomahangano ngoka ga pewa ootendela dhokutunga oondama, opo owala ga totwa po konima yoomwedhi mbali, manga egandjo lyootendela inaali ningwa.
Aanambelewa mboka taku hokololwa ye na olunyala lwegandjo lyootendela Aakwaswapo.
Elelo lyoshitopolwa shoka okwa li lya longekidha oshimaliwa shoomiliyona N$15 okuza kUuministili wUunamapya nUuniimuna, Omeya nEtendululo lyEvi opo ku tungwe oondama dhomeya miikandjohogololo ya yooloka okukwatelapo omeya gomvula nogefundja.
Nandi-Ndaitwah okwa popi kutya omeya ogo omwenyo nonkene oomwenyo dhaantu inadhi pumbwa okudhanenwa.
“Ongiilyo yongundu, oshi na okukala oshinakugwanithwa shetu okugandja omayakulo ge na ongushu. Otashi ku kumitha ngele aantu mboka ye na olunyala muulingilingi wokugandja ootendela ndhoka dhoondama Aakwaswapo ngaa shili. Kayeshi Aakwaswapo yoshili. Aakwaswapo yoshili oye na eitaalo lyuukwawowanankali, ishewe ito vulu okukengelela ngele owu na uukwawowanankali. Onkene ookamarada, inamu dhengela pevi aantu mboka ye na einekelo munye. Otwa hala okukondjitha uulingilingi moshilongo muka, oshoka owala omathimbo gamwe aantu haya kala ya tila okupopya, ashike uulingilingi mbuka owa pitithwa mo,” osho a popi ngaaka.
Onzonkundaneki ndjika monakuziwa oya kundaneke kombinga yomukuluntuwiliki gwoshitopolwa shaShana, Teopolina Hamutumwa ngoka a popi kutya oshimaliwa shokutungitha oondama osha kwatela mo okulafulula evi moondama, okutunga osho wo okuninga nawa oondama ndhoka dhi li miikandjohogololo ya yooloka unene tuu pomahala ngoka haga dhengwa kefundja.
“Otendela yoondama dhi li ntano okwa li ya pitithwa opo iilonga yokutunga nokuninga nawa oondama yi tameke, ashike nando ongaaka oya kalekwa mbala molwashoka opwa dhimbululwa pwa longwa iilonga inaayu uka. Ayihe okwa li ya pwa, notwa adhika tuli pokugandja otendela kwaangoka a yauka mo, ashike otwe yi kaleke omolwuupyakadhi wu na sha negandjo lyotendela. Oshikumungu shoka otwe shi gandja momake gokomisi yokukondjitha uulingilingi moshilongo opo ku ningwe omakonakono ga gwedhwa po,” osho a popi ngaaka.
Nandi-Ndaitwah okwi indile iilyo yongundu yawo yi ilongekidhile omahogololo gopaupresitente nogegumbo lyopashigwana ngoka ge li ko mo2024.
Leave a Reply