Minista gwaaniilonga Uutoni Nujoma mEtiyali lya zi ko okwa nyanwa noonkondo megumbo lyopashigwana pethimbo lyoshipopiwa shi na sha nuuyogoki sho a popi kutya Aawambo ohaya longo nuudhiginini molwashoka monooli yoshilongo omagumbo ogendji otaga adhika nuundjugo, okuyelekanitha naangoka ge li kuumbugantu woshilongo.
Nujoma ndhoka okwe dhi popi pethimbo omuleli gwongundu yoPDM, McHenry Venaani, a li ta yelitha kombinga yoshipopiwa she shoka tashi popi kutya onkalo yuuyogoki moshilongo otayi etitha ohenda.
Venaani okwa li ta gandja oshipopiwa she megumbo lyopashigwana kombinga yonkalo yuuyogoki ano ompumbwe yuundjugo momagumbo ndjoka ya thiminika aantu oyendji ya longithe omilamba nenge iihwa uuna taya iwathele.
“Namibia okuli monkalo ya nayipala noonkondo yuuyogoki. Pauyelele wombaanga yuuyuni yoWorld Bank, omuntu gumwe maantu yane moNamibia ke na ompito yokulongitha okandjugo. Shoka otashi ulike kutya ohi iwathele owala pongalangala. Uuyogoki moNamibia owu li lela monkalo tayi tulitha omutse kepepe,” osho Venaani.
Manga omuleli gwoPDM i ipyakidhila nokulesha oshipopiwa she, Nujoma okwa ganeke nokupewa ompito a tye sha, nokwa thikama nokupoya kutya ita tsu kumwe naashoka Venaani ta popi molwashoka onkalo yokwaana uundjugo otayi adhika olundji kuumbugantu woshilongo omolwonyalo.
Okwa gwedha po kutya konooli yoshilongo aakwashigwana oyendji oyi itungila uundjugo yoyene momagumbo, okuyelekanitha naamboka ye li kuumbugantu woshilongo.
“Tse ongaaNamibia. [Otwi ininga] Ihaatu tungu nande uundjugo tse yene, shoka oshinima ndishi shi lela,” osho a popi ngaaka.
“Inda owala monooli yoshilongo, mOwambo, hoka oto adha aantu ya tunga uundjugo wawo yoyene. Kutya nee okandjugo kopondje, hoka komayemele,” osho a gwedha po ngaaka.
“Ashike aantu yetu yaahuka [kuumbugantu] . . . uuna ndayi komahala ge li huka, ngele owa penduka mokati kuusiku to ehama mepunda, owu na okutondoka wu uka miihwa mokati komayoka, naashoka otashi ningwa molwashoka aantu yaahuka aananyalo okwe eta po sha,” osho a popi ngaaka.
Monakuziwa epangelo okwa li lya longitha oshimaliwa shoomiliyona okutungitha uundjugo momagumbo gokomikunda, ashike sigo ongashingeyi owa thikama owala ihaawu longithwa sha.
Momumvo 2011/12 epangelo olya longithwa oshimaliwa shoomiliyona N$181,5 okutungitha uundjugo wu li nawa miitopolwa ine yomonooli yoshilongo.
Ndhoka dha popiwa kuNujoma, odhe eta evundakano momutumba gwopashigwana esiku ndyoka sho oyendji ya nyana Nuujoma kutya ota hwahwameke uukwamuhoko.
Aaleli yoLPM ngaashi Bernadus Swartbooi, Henny Seibeb osho wo Utaara Mootu yamwe yomoongundu dhoompilameno mboka ya nyana shoka sha popiwa kuNujoma.
Omupeviminista guuthikepamwe, ekondjitho lyoluhepo nonkalonawa, Bernadette Jagger naye okwa holola okwaauvanawa kombinga yaashoka sha makukwa kuNujoma.
Lwanima omunashipundi gwomutumba gwoshigwana Peter Katjavivi okwa gandja elombwe kuNujoma opo e ekelehi ndhoka a popi.
Leave a Reply