Omupolisi gwomoKavango ngoka kaali miilonga pethimbo lyoshiningwanima, okwa tulwa miipandeko sho taku hokololwa a yaha omukwashigwana, sha ningwa poontamanana ndhoka dha holoka puundingosho pethimbo ya li taya ipe mo.
Nakuyahwa, Frans Ndara (35), okwa hokolola kutya omupolisi ngoka okwe mu yaha mepunda nonande okwa li ta lalakanene oku mu dhipaga.
Okwa popi kutya nonande ina kanitha omwenyo gwe, onkene e wete a omupolisi ngoka e mu dhipaga molwashoka ita vulu we okulonga opo a tekule ofamili ye omolwoshizemo she etwa keyaho ndyoka.
Ndara okwa yahwa mepunda nombistoli komupolisi ngoka kaali e li miilonga pethimbo lyoshiningwanima nosha ningilwa momukunda Gcagcana moshikandjohogololo shaRundu kUushayi [moshitopolwa shaKavango Uuzilo], ongulohi yOsoondaha sha landula “oontamanana oonshona” ndhoka dha tukuka pokati kawo.
“Ondi na ofamili yandje ndjoka ndi na okusila oshimpwiyu, ashike ngashingeyi onda lombwelwa kutya itandi vulu we okutumba iinima iidhigu. Otandi ka hupa nee ngiini? Aanona yandje otandi ke ya etela we omboloto nomukalo guni?” osho a popi ngaaka, pethimbo e li moombete dhoshipangelo shaRundu, oshiwike shika.
Ndara okwa popi kutya okwa li “a tamanana kashona” nayinakulu puundingosho mpoka ya li taya nu. Okuza mpoka anuwa omupilisi ngoka a adhika keeli miilonga pethimbo ndyoka, okwa holokele puyo nokwe mu pula kutya oshike ta nyenyeta nomukulupe. Nolwanima oontamanana odha tukuka pokati kaalumentu mboka yaali, shoka she eta omupolisi a dhenge Ndara nenkawa nokwa gwile pevi.
Lwanima mumwayinagona okwa zi mo mondingosho opo a kwathele Ndara, naampoka [Ndara] opo e shi dhimbulula kutya nani okwa yahwa.
Ndara okwi indile epangelo li ye mo olunyala, molwashoka omupolisi ngoka okushi lela oveta noha longele epangelo.
“Oshinima shaapolisi taya longo iimbuluma, taya tulwa miipandeko nokupatelwa mo . . . epangelo onkene tali ke ya pa iikulya, nenge li ya futile opo ya ze mo moondholongo noshimaliwa shoka ohashi shuna owala mepangelo. Ngame nguka nda yahwa nokuminithwa oshiponga otandi ningwa ngiini?” osho a pula ngaaka.
“Mwene gwomukunda opamwe nookansela nayo oya pumbwa okutala oshinima shika. Onda pumbwa ekwatho kehe tali vulika. Ngashingeyi onda lemana itandi vulu we nokuli nokwiikwathela, omanga nakulemanekandje e li miilonga ye yepangelo.”
Omufekelwa, otaku hokololwa a tulwa miipandeko nota tamanekelwa oshipotha shonkambadhala yedhipago osho wo okuya iilonga yuuyuuki moshipala – sho a ndopa okulopota kutya okwa longitha ondjembo yiilonga.
Omukwatakanithi gwomakonakono giimbuluma moshitopolwa shaKavango Uuzilo, Bonifatius Kanyetu okwa koleke oshiningwanima shoka.
Ombistoli ndjoka a longitha otaku hokololwa kutya oyiilonga, nongashingeyi okwe yi kuthwa. Omufekelwa okwa holoka mompangu yamangestrata gwaRundu ohela.
Ashike onzonkundaneki yilwe ndjoka yi na owino kombinga yoshingwanima shoka, oya popi kutya omupolisi ngoka okwa li a kutha ombistoli ndjoka kiilonga opo a ye nayo kiihokolola yopamuthigululwakalo yi na sha nomupambele ngoka ta pangulwa sho a yi miihulo nomuntu gulwe omanga e li mondjokana.
Miihokolola mbyoka otaku hokololwa Ndara a tidhwa mo komupolisi ngoka sho anuwa a londodhwa kutya ngele hasho ota yahwa. Konima yiihokolola mbyoka oya tsakanene puundingosho, noontamanana odha tukuka pokati kawo.
E LI MOOMBETE … Methano ndika otamu monika Frans Ndara (35) ngoka taku hokololwa a yahwa nokulemanekwa komupoilisi ngoka kaali e li miilonga, sha ningilwa momukunda Gcagcana, moshitopolwa shaKavango Uuzilo, ongulohi yOsoondaha.
Ethano: Petrus Muronga
Leave a Reply