‘Omasiku gokushangitha uukalata itaga gwedhelwa’

OMUKULUNTUWILIKI gUuministili wOmauyelele nOmakwatathano gOpaungomba, Audrin Mathe, okwa lombwele iikundaneki mEtitano lya zi ko kutya omasiku gokushangitha uukalata woongodhi itaga gwedhelwa molwashoka Aanamibia oye na onkalondjigilile yokuninga iinima komunute gwa hugunina.

“Sigo oompaka Aanamibia ye li poopelesenda 45 oye shi pondola okushangitha uukalata wawo, onkene okuna natango oopelesenda 55 dha hupa ko,” osho Mathe a popi ngaaka.

“Onkalo ndjoka ohayi holoka molwashoka Aanamibia oye na onkalondjigilile yokwiinyenga uuna ethimbo lya pwa ko,” osho a gwedha po ngaaka.

Esiku lya hugunina lyokushangitha uukalata womoongodhi olyi li popepi naakwashigwana oyendji moshilongo otaya mbombolokele kiitayi yomahangano gomakwatakanithi goongodhi dhopeke opo ya shangithe uukalata wawo.

Esiku lya hugunina lyokushaningitha uukalata o31 Desemba, nongele okatetwa mombepo nena omuntu ota pewa ethimbo lya ngambekwa opo e ka shangithe nongele hasho otashi vulika a kanithe thilu onomola ye yongodhi, yo yi ka gandjwe po komuntu gulwe monakuyiwa.

Omukuluntu gwiipambele yaaniilonga, iipindi osho wo iipambele yehangano moMTC, Tim Ekandjo, okwa popi kutya opo ku pupalekwe onkalo yomangundumano ngoka ge li piitayi yawo okushangitha uukalata wawo, ehangano lyawo olye eta po omulandu gwokushangitha uukalata pamalungula.

“Otwe eta po omilandu dhokushangitha uukalata pamalungula shoka tashi ti ookastoma otadhi vulu okuya kondjukithi yetu komalungula nokutula mo omauyelele gawo nokuza mpoka otaya vulu okwiishangitha yoyene. Omulandu ngoka omupu noonkondo,” osho Ekandjo a popi ngaaka.

Omulandu gwokomalungula gwaMTC ngoka tagu gandja omayakulo gokwiishangitha opo owala gwa tulwa miilonga oshiwike sha zi ko, nonkene ogu natango omaunkundi.

Kombinga yaamboka kaaye na ompito yokuya komalungula, onkene taya indilwa okuya kiitayi yoMTC miitopolwa ya yooloka.