OONGUNDU dhopapolitika dha yooloka odha waimine ewawa lyaagundjuka mongundu yoSwapo [Swapo Party Youth League (SPYL)] okwiindila epangelo li gwedhele omasiku gomaishangitho guukalata womoongodhi.
Oongundu ngaashi oRally for Democray and Progress (RDP), Popular Democratic Movement (PDM) osho wo oIndependent Patriots for Change (IPC) nadho odhi li ompinge netetwo ko lyuukalata mombepo konima yomasiku 31 Desemba.
MEtitano, Uuministili wOmauyelele nOmakwatathano gOpaungomba owa gandja omatilitho kutya nonande oveta oya pitika opo omaishangitho guukalata ga gwedhelwe noomwedhi ndatu, onkene ya ndjika oonyala kutya uukalata owu na okutetwa mombepo konima yomasiku 31 Desemba ngaashi sha thanekwa.
Uuna uukalata wa tetwa mombepo konima yomasiku ga tumbulwa nena otaku ka gandjwa ethimbo lyoomwedhi ndatu opo omuntu a shangithe okakalata ke nongele okwa ndopa nena ota ka kanitha thilu onomola ye yongodhi, yo yi ka gandjwe po komuntu gulwe monakuyiwa.
OMOLWASHIKE TASHI ENDELELEKWA?
Omupopiliko gwoIPC, Immanuel Nashinge okwa popi tati: “Omatilitho ngoka taga ningilwa aakwashigwana kutya uukalata wawo otawu tetwa mombepo itaga longo. Gwedheleni ashike omasiku ne mu pitike aantu ya shangithe uukalata wawo nombili, nonethimbo. Omolwashike tashi endelelekwa ano?”
Okwa popi kutya okuteta mombepo uukalata woongodhi otashi kaya moshipala uuthemba waakwashigwana.
“Oto ka kala to popi kombinga yehumokomeho lya dhenga mbanda ngiini omanga to tindile aantu ompito yokumona omauyelele?” osho Nashinge a popi ngaaka.
Okwa popi kutya omulandu gwokushangitha uukalata nagu ningwe omupu nokuthika paantu ayehe ngaashi unene kiitopolwa yokuushayi.
Pauyelele wa gandjwa kehanganokwatakanithi lyopangodhi lyoMTC mEtitano, sigo oompaka aakwashigwana owala ye li pondjele yoopelesenda 45 ya shangitha uukalata wawo.
Amushangandjayi gwewawa lyaagundjuka moSwapo, Ephraim Nekongo mEtine lyoshiwike sha zi ko okwa shengele minista gwomauyelele Peya Mushelenga ontumwafo moka a pula omaishangitho guukala ga gwedhelwe noomwedhi 12.
Mombapila ndjoka, Nekongo okwa popi wo kutya omahanganokwatakanithi ga yama kepangelo (oMTC noTelecom) otaga ka kanitha iiyemo oyindji noonkondo ngele uukalata owa tetwa mombepo naashoka otashi ti epangelo otali ka kanitha iiyemo, okwa gwedhapo wo kutya shoka otashi ke eta wo omahangano ngoka ga mbangolote.
“Aantu oyendji, otaya nana nondatu okuthika pomahala ngoka taga ishangithwa uukalata,” osho a popi ngaaka.
Nekongo okwi indile MTC naTelecom ya ninge oonkambadhala dhokutumina aanambelewa yawo kiikandjohogololo ayihe 121 moshilongo opo ku shilipalekwe kutya aakwashigwana oya shangitha uukalata wawo unene tuu komikunda sho shi shunithe pevi omwaalu gwomangundumano ngoka ga kaalela iitayi yomahanganokwatakanithi moondolopa.
Ngoka a yambidhidha eindilo lya Nekongo, omupresitente gwoRDP Mike Kavekotora ngoka a popi tati: “Itashi ti kutya aantu inaya hala, ashike onkalo oondjoka kutya kapu na omahala ga gwana gwokushangitha uukalata. Kandi wete tashi kala uupyakadhi ngele omasiku oga gwedhelwa.”Kavekotora okwa popi kutya uuministili, oshikondowiliki shomakwatathano moshilongo sho-Communications Regulatory Authority of Namibia (Cran), MTC noTelecom nayo naya kwashilipaleke kutya oya adha pomahala agehe opo kehe gumwe a mone ompito yokwiishangitha.
“Aantu oyendji unene tuu mboka ye li komikunda, otaya pitililwa po molwashoka inaya tseyithilwa nawa. Yamwe kaye shi nokuli ngele opu na oshinima sha tya ngaaka,” osho a popi ngaaka.
Kavekotora okwi indile omahanganokwatakanithi gopangodhi ga shilipaleke kutya oga thika komikunda opo aantu ya vule okushangitha uukalata wawo. Oshilyo shongundu yoPDM megumbo lyopashigwana, Maximalliant Katjimune, okwa popi kutya okwa li indila opo omasiku gomaishangitho ga gwedhelwe, ashike sigo oompaka ina mona eyamukulo lya sha.
Katjumine muSeptemba okwa popi kutya esiku lya hugunina lyomaishangitho ndyoka lya tulwa po olya pumbwa okugwedhelwa molwashoka natango opu na oshigwana oshindji shoka inaashi tseyithilwa kombinga yomaishangitho ngoka.
Moonkundathana nonzonkundaneki ndjika uunambo, Katjimune okwa popi kutya okuteta mombepo uukalata otashi kala eyono lyuuthemba womuntu wokumona omauyelele.
“Oshinima tashi tulitha omutse kepepe oshooka kutya uuministili, oMTC, oTelecom noCran oya ndopa okukala inaaya andjaganeka uuyelele nomayelithilo ga gwana koshigwana, osho a popi ngaaka.
“Oshinima tashi kala owala nawa uuna uuministili wa gwedhele omasiku,” osho Katjimune a gwedha po ngaaka.
Leave a Reply