Omikunda dhomOshikoto dha dhengwa kenota uule wiiwike itatu

Iitopolwa oyindji moshitopolwa shaShikoto unene tuu momikunda, mwa kwatelwa ndhoka hadhi pewa ootenga dhomeya okuza kepangelo otaku hokololowa ya ningi omasiku ya taalelwa kompumbwe yomeya molwashoka oya ningi iiwike inaaya etelwa komeya.

Pauyelele wa zi kaakalimo yamwe mboka ya popi nonzonkundaneki ndjika, oya hokolola kutya omikunda dhimwe odha kala uule wiiwike itatu inaa dhi mona nande eta lyomeya.

Angula Amuthenu, omukalimo gwomomukunda Amilema, okwa popi kutya omunino omunene ngoka hagu fala omeya komukunda Onamishu osho wo komikunda dhilwe dhopopepi ogwa kala itaagu thikitha we omeya, naashoka okwa li she eta aanamikunda niimuna ya ninge omasiku inaaya mona omeya.

Onkalo ndjoka oya thigi aakwashigwana osho wo iimuna nenota. “Muule woomvula dha konda po33 konima yemanguluko onkene epangelo tali nyengwa okugandja omeya ga yela koshilongo ashihe. Otatu hupu ngiini kaatu na omeya hambala uule womedhi? Otwa sa enota niimuna yetu otayi si kenota, otuli mompumbwe onene yomeya. Oshinima shoka katushi uvite ko. Ano tse katushi aantu twa fa yalwe mboka ye li kiitopolwa yilwe? Aaye, epangelo olya pumbwa okupotokonona oshikumungu shoka shompumbwe yomeya opo tu etelwe omeya, nosha pumbwa okutaliwa ko ongoshinima shomeendelelo,” osho a popi ngaaka.

Omukuluntuwiliki gUuministili wUunamapya nUuniimuna, Omeya nEtendululo lyEvi, Ndiyakupi Nghituwamata okwa koleke kutya oshitopolwa shaShikoto osha kala sha taalelwa kompumbwe onene yomeya.

“Uuministili otawu ipe ombedhi omolwonkalo ndjoka ya holoka po maakwashigwana yomiitopolwa yopondingandinga monooli yoshilongo ngaashi moshitopolwa shaMusati, mOshikoto osho wo moshitopolwa shaHangwena. Koshikandjohogololo shaDaures moshitopolwa shErongo, moshikandjohogololo shaTondoro osho wo moshitopolwa shaKavango Uuninginino opamwe noshikandjohogololo shaTjombinde moshitopolwa shaMaheke. Kombinga yeshongo lyokugandja omeya moshitopolwa shaShikoto, uuministili otawu shilipaleke aakalimo kutya epangelo itali thigi nande emanya lya londa kekwawo opo li shilipaleke kutya egandjo lyomeya olya tsikila notatu tseyitha kutya monakuyiwa otatu kala nokutseyithila oshigwana kuyele uuna pweya uupyakadhi washa megandjo lyomeya momikunda ndhoka,” osho a popi ngaaka.

Nghituwamata okwa popi kutya uuministili otawu tsikile nokugandja ootenga dhomeya opo ku shilipalekwe kutya aakwashigwana oya pewa omeya meendelelo unene tuu miikandjohogololo yomoshitopolwa shaShikoto ngaashi mOnkankolo, mEengodi osho wo muNehale lya Mipangana. Sigo oompaka, oololi dhootenga ntano dhomeya dhuunene wa yooloka odha gandjwa okuza kUuministili wEtanga lyEgameno nIipambele yOonakulwa Aakulu, okuza kUuministili wIikwameni, Omatembu Egameno nEpopilo lyoshigwana, okuza kUuministili wOmidhingoloko, Omakuti nOmatalelopo osho wo okuza kOmbelewa yIipambele yOompangu, opo dhi kwathele omaloli gootenga dhokugandja omeya ngoka tu na po nale moshitopolwa shaShikoto.”

“Otwa hala okupandula aakuthimbinga ya tumbulwa pombanda sho ye tu kwathele moonkambadhala dhetu dhokuthikitha omeya kaakwashigwana yetu. Uuministili owa tula po omilandu dhekandulopo lyomukundu gomeya nokukalekapo uuyogoki moshilongo okupitila moonkambadhala dhomeendelelo, dhopokati naadhoka dhekandulopo lyomukundu tashi kalelele. Otashi kala elalakano lyetu okushilipaleka kutya otwi itula mo mokugandja omeya nokukalekapo uuyogoki kaantu ayehe. Natango, onda hala okugandja ombili omolwonkalo ndjoka ya holoka po yekateko lyegandjo lyomeya,” osho Nghituwamata a popi ngaaka. Omasiku ga zi ko ngoloneya gwoshitopolwa shaShikoto, Penda ya Ndakolo okwa popi kutya aakalimo oyendji oya gumwa koshikukuta – unene tuu aaniimuna.

“Onkene, otwa pumbwa okuninga po omalongekidho taga pumbiwa okuhupitha iimuna. Itashi holekwa kutya oshitopolwa shetu onkene sha taalelwa komashongo gompumbwe yomeya, unene tuu momikunda ndhoka dhi li kokule, hoka oshimoko hashi nyengwa okuthikitha ko omeya, nenge komikunda ndhoka dhi na omeya goshimongwa. Onkalo ya yaga kegonga ndjoka tuna ngashingeyi oya gwedhele owala uupyakadhi womeya mboka twa kala twa taalela nale,” osho a popi ngaaka.

Oshiwike sha zi ko, omupopiliko gUuministili wUunamapya nUuniimuna, Omeya nEtendululo lyEvi, Jona Musheko, okwa popi kutya uuministili wawo, melongelokumwe noshikethahangano shomidhingoloko shedhina Environmental Investment Fund, owi ipyakidhila nokutulitha moshitopolwa shaShikoto uushina wokukutha omeya oshimongwa.

“Shoka otashi ningwa momikunda dhi li hamano. Oprojeka ndjoka oya kwatelwa komeho ko-Environmental Investment Fund, niilonga otayi pula komeho nawa,” osho a popi ngaaka.