Omufiyekadi waJohn Pandeni ota pewa eumbo leemiliyona nhatu – Oshiwambo

Epangelo otali yandje eumbo olo opo la wapalekwa komufiyekadi waao a li nale minista womalukalwa John Pandeni.

Ouministili wetanga leameno noipambele yoonakulwa va kulu owa kufa etokolo opo u kufe ko eumbo koministili yehongo, ounghulungu nomifyuululwakalo ndee tau li yandje komufiyekadi wanakufya John Pandeni, Julia, tau ti ota dulu okulipewa shaashi omukulukadi wanakulwa mu kulu wekondjelo manguluko laNamibia.

Eumbo olo tali tengenekwa li na ongushu yeemiliyona nhatu, oli li mOvenduka la taalelafana nongulumambo yoshiwana koEros.

Omavalulu okwa ulika kutya ponhele opo pu na eumbo eli namakwao ahamano, oi na ongushu okudja peemiliyona hetatu fiyo omulongo.

Oshinima eshi shepangelo tali yandjemo po eumbo eli natango osha eta omalipulo kombinga yokulonga pouyelele nomilandu odo da longifwa okuninga po omaliko epangelo opaumwene.

Omikanda edi da leshwa koThe Namibian oda ulika kutya epangelo ola tameka okuyandja eumbo eli komukulukadi waao kwa li omuleli woSwapo momudo 2022.

Osho osha dja komakwatafano pokati komukulunhuwiliki wetanga leameno noipambele yoonakulwa va kulu, Wilhelmine Shivute nambushe moilonga waye wokoministili yoyeendifo, Esther Kaapanda.

John Pandeni okwa xulifa momafiku 14 Marsa 2008 moshiponga shotuwa yepangelo pefimbo opo a li minista wepangelo lopaitopolwa.
Okwa xulifa e na eedula 57.

Pandeni okwa fiya ko omukulukadi waye nounona ve li vanhe, ashike odjo imwe oya ti ova kala hava di meumbo tali hiilwa.

Ofamili otaku tiwa oya kala hai di meumbo lepangelo pefimbo opo Pandeni a li ngoloneya woshitopolwahoololo shaKhomas.
EUMBO OTALI
KUFWA KO

Kaapanda momafiku 05 Aguste 2022 okwa li a shangela omukulunhuwiliki wehongo, ounghulungu nomifyuululwakalo, Sanet Steenkamp, te mu lombwele kutya ouministili woilonga otau kufa ko eumbo olo kouministili wehongo, shaashi oli li monghalo yanaipala.

Ouministili wehonga okwa li hau longifa eumbo eli opo mu dje ovanawino ovo have ya kOvenduka va vatele ouministili neesystema dokutuvikila omauyelele.

“Ouministili wehongo nau kwashilipaleke kutya owa yandja oshimaliwa sha wana shi longifwe okuwapaleka etungo opo li dule okulongifwa,” Kaapanda osho a shanga ngaho.

Okwa ti ouministili wehongo owa dopa okufila etungo oshisho.

Onghee nee, ouministili woilonga noyeendifo otau pula onghatu ya endelela opo oshinakuwanifa eshi shokuwapaleka eumbo eli shi ningwe,” Kaapanda osho a ti ngaho.

Steenkamp okwa koleka kutya etungo okwa li louministili.

“Onda hala okukoleka kutya etungo lonomola 75 li li mepandaanda Eugene Marais mOvenduka okwa li louministili.

Ashike nee, okwa li lakufwa ko kouministili woilonga ndee tali pewa ouministili wetanga leameno kutya nee okwa li shaanywa,” Osho a ti ngaho.

ONGUSHU

Ongushu yeumbo inai yela natango.

Ovanawino ova tengena kutya ongushu yeumbo eli okudja peemiliyona nhatu.

Natango inashi yela nawa kutya eumbo olo tali pewa omufiyekadi oshike li heli kumwe namakwao oo e li monhele omo.

Omishangwa dokombelewa yomatendululo omadu inadi yela nawa, ashike eembelewa delelo laVenduka oda ti eumbo oli lilile.

Ouministili wetanga leameno natango owa teelelika opo u ka hokolole kutya oolyelye hava di momaumbo akwao oo e li monhele omo.

“Omishangwa odo da dja kehangano olo hali ufa ongushu yomaliko moNamibia oda ti edu oli na ongushu i fike peemiliyona nhatu oshinghwanyu hamano pandado yelelodoolopa, omanga okuxwepopaleka omatungu ku li pemiliyona nhee, osho sha eta ondado yelelodoolopa i kale peemiliyona N$7,6.

“Dimbuka nee kutya ongushu yelelodoolopa kai shi ongushu yokulandifa … pamadilaadilo etu, ongushu yokulandifa otai dulu okukala i li peemiliyona N$8,5 fiyo N$10,” Ehangano lokuufa eendado domaliko osho la ti ngaho.

ETANGA LEAMENO

Ouministili wetanga leameno owe litula mo metokolo lao.

“Meme Julia Pandeni oku li omukondjeli manguluko waNamibia nokwa li kwa monika kutya ota dulu okumona ouwa ou kopolohalama yomaumbo yoonakulwa va kulu shaashi oku na oufemba.

“Edilaadilo lokuwapaleka etungo eli la mona oixuna lepangelo okwa li ashike opo aha longife oshimaliwa shihapu mokulanda eumbo lipe,” Omupopiliko wouministili Petrus Shilumbu osho a ti ngaho.

Shilumbu okwa ti eumbo okwa li la wapalekwa odula yandja ko ashike Mee Pandeni ota kala e na oshinakuwanifa shomeva nolusheno laye.

“Ouministili wetanga leameno noipambele yoonakulwa va kulu owa ninga omalunduluko opo u vatele oonakulwa va kulu … nakulwa mu kulu ou ta popiwa ke na nande eumbo la sha yee ke na nande omukanda tau ulike kutya oku na eumbo la sha, ngaashi naana tashi pulwa kopolohalama yokuyandja omalukalwa koonakulwa va kulu.