Omukiintu gwomimvo 54 okwa mana oondjenda mOmbaye sho oshihauto shobakkie shi idhenge mombashu ye, sha ningwa mOlyomakaya momudhingoloko gwaKuisebmond mOmbaye lwopotundi 10h00.
Komanda gwiipambele yoshigwana mopolisi yErongo, inspekta Ileni Shapumba okwa popi kutya oshihauto shoka oshehangano lyoosekuliti nopethimbo shi idhenge mombashu ndjoka, omukulukadhi okwa adhika a kotha.
Omukiintu ngoka okwe ehamekelwa mo noonkondo naashoka oshe eta a hulithe. Nakusa okwa hololwa kutya oye Emilia Kuhafi Shuudifonya.
Omuhingi – gwomimvo 28 ngoka a adhika e li miilonga pethimbo ndyoka – okwa tulwa miipandeko nokwa holoka mompangu ohela.
Pokati mpoka, omukiintu gwomimvo 48 gwomomukunda Ompugulu moshitopolwa shaShikoto okwa mana oondjenda mEtitano sho taku hokololwa a pondwa konyama.
Pauyelele wa zi kopolisi, nakusa okwa li e li moosa pethimbo lyoshituthidhimbuluko, sho ya pewa iikulya yi na onyama opamwe naalilasa ooyakawo.
“Konima sho taku hokololwa a pona onyama onene, okwa pondwa nokwa tameke okukolola noonkondo nolwanima okwa kambuka. Okwa falwa meendelelo koshipangelo shaNandjokwe hoka lwanima a kolekwa kutya okwa hulitha,” osho komanda gwopolisi yaShikoto, komufala Theopoline Kalompo-Nashikaku a popi ngaaka.
Moshitopolwa shaMusati, okanona komwedhi gumwe oka mana oondjenda omanga ka adhika ka tulwa mondhikwa, sha ningwa mOlyomakaya momukunda Ontoko tagu adhika moshikandjohogololo shaNesi.
Otaku hokololwa kutya okanona hoka okali mondhikwa ya mumwayinakadhona gwomimvo hamano omanga yina a li i ipyakidhila niilonga yomegumbo.
Otaku hokololwa kutya lwanima, yina okwi ithana omwana ngoka opo a kuthe mo okanona mondhikwa nokwa dhimbulula kutya okanona okahulitha. Omakonakono gopolisi otaga pula komeho moshiningwanima shoka.
Moshiningwanima shilwe natango sha ningilwa mOmusati, opolisi mOkahao otayi ningi omakonakono geso lyomusita gwoongombe ngoka omudhimba gwe gwi itsuwika miihwa momukunda Olumpelengwa, mEtitano.
Pauyelele wopolisi, omudhimba ngoka ogwi itsuwika kaalithi yiimuna mboka kwa li taya kongo iikombo ya kana momudhingoloko ngoka, nolwanima oya tseyithile opolisi yoshitaasi shUutsathima.
Otaku hokololwa kutya nakusa okwa li ha longele kohambo yi li popepi nomudhingoloko gwaLumpelengwa.
Pethimbo uuyelele mboka wa thiki momake gonzonkundaneki ndjika, aapambele yanakusa kaya li ya tseyithilwa onkene edhina itali vulu okutseyithwa. Nakusa okwa yambukile komukunda Oshilulu moshikandjohogololo shaKahao.
Momudhingoloko gwaKahandja, omukiintu gwomimvo 22 okwa tulwa miipandeko mOlyomakaya sho taku hokololwa a ningi onkambadhala yokudhipaga omwanamati gwoomwedhi 11.
Omupopiliko gwopolisi moshilongo, omupevikomufala Kauna Shikwambi okwa popi mOsoondaha kutya okanona hoka okahupithwa kumumwayinamati gwayina, sho a teya po omweelo gwombashu moka taku hokololwa okanona kwa li ta ka kambadhalwa okudhipagelwa.
Shikwambi okwa popi kutya oshiningwanima shoka osha ningilwa kolukanda lwoombashu lwedhina Uitkomst, momudhingoloko gwaKahandja.
“Nakuninga oshihakanwa okuli monkalo yi li nawa nota pewa omakwatho gopaunamiti ngoka ta pumbwa,” osho Shikwambi a popi ngaaka.
Okwa gwedha po kutya omufekelwa okwa tulwa miipandeko nokwa holoka mompangu ohela ta tamanekelwa onkambadhala yedhipago.
Moshiningwanima sha yooloka, Shikwambi okwa popi kutya omulumentu gwomimvo 47 okwa tulwa miipandeko konima sho taku hokololwa a yaha omulumentu gwomimvo 25 sha ningwa mOlyomakaya momudhingoloko gwaGreenwell Matongo, mOvenduka.
Shikwambi okwa popi kutya nakuyahwa okwa mona oshiponga oshinene sho a yahwa kombunda.
“Nakuninga oshihakanwa okwa taambelwa moshipangelo shaKatutura. Omakonakono gopolisi moshiningwanima shoka otaga tsikile,” osho a popi ngaaka.
Moshiningwanima shilwe, omukiintu gwomimvo 20 otaku hokololwa a tomeke ondunda yohondamati ye onkulu omulilo, sha landula oontamanana ndhoka kwa li dha tukuka pokati kawo yaali.
Shikwambi okwa popi kutya oshiningwanima shoka osha ningwa mOlyomakaya molukanda talu adhika moTsumeb.
Okwa popi kutya omulilo ngoka ogwa kwata omalapi gaali gopekende, ondjato yiikutu osho wo uundjato wopeke uyali womukiintu ngoka. Kumwe iinima ayihe mbyoka ya gumwa komulilo oyongushu yooN$1 500. Omufekelwa kali natango a tulwa miipandeko sho uuyelele mboka wa thiki momake gonzonkundaneki ndjika. Omakonakono gopolisi otaga pula komeho.
Moshiningwanima sha yooloka, omuhingi gwololi omuTanzania okwa tulwa miipandeko ongulohi yOsoondaha, sho taku hokololwa a adhika nookilohalama 24,4 dhiingangamithi yocannabis.
Omufekelwa ngoka e na omimvo 37 okwa tulwa miipandeko lwopotundi 20h00, momudhingoloko gwaNorthern Industrial Area mOvednuka.
Inspekta omukuluntu mopolisi, Elifas Kuwinga, okwa popi kutya ololi ndjoka oya zi koSouth Africa noya thikamekwa nokuhadhwa.
“Omwa adhika omapakete omanene gatatu giingangamithi yocannabis pethimbo lyokuhadhwa, gongushu yooN$1,2,” osho Kuwinga a popi ngaaka.
Omufekelwa okwa tegelelwa a holoke mompangu yamangestrata gwaVenduka nena.
Pokati mpoka, aamwayina Leonard naTeresia Leopard oya holoka mompangu ohela taya tamanekelwa oshipotha kOhi yOveta yomahepeko gomomagumbo, oshipotha shomulilo, osho wo shedhengo nelalakano lyokwe ehameka kolutu.
Ashike nando ongaaka Teresia ina holoka palutu komeho gompangu molwashoka otaku hokololwa e li moombete molwashoka okwa li a dhengwa.
Aamwayinathana mboka oya tulwa miipandeko oshiwike sha zi ko sho Teresia a lopota mumwayina kopolisi yoshitaasi shaNomtsoub kutya okwe mu dhenga.
Pethimbo ndyoka, okwa lombwele opolisi kutya mumwayinamati ngoka okwe mu lundile kutya oku na ohondamati, nolwanima konima yomapulapulo gopolisi, okwa popi oshili kutya okwa kala mekwatathano lyopaihole naLeonard muule woomvula mbali dha piti.
Ayehe yaali otaku hokololwa haya zi molukanda lwoombashu lwaSaamstaan.
Leornard okwa holoka komeho gamangestrata Boyd Namashinga, noshipotha she oshu undulilwa komasiku 4 Auguste.
Esiku lyokuholoka mompangu lyaTeresia inali tseyithwa natango
Pauyelele wa zi komutameneki gwepangelo Sakaria Mupuma, aanona mboka yaali aamwayinathana lela muhe nomuyina gumwe. Mupuma okwi indile epangelo opo kaali pe Leonard oboloha omolwuumbanda kutya otashi vulika a kwatathane nomufekelwa pamwe.
Leave a Reply