Omukulupe gwomimvo 73 okwa mana oondjenda momukunda Okahuti moshitopolwa shaKavango Uuninginino konima taku hokololwa a pondwa konyama, sha ningwa mOsoondaha.
Pauyelele wolopota yopolisi, oshiningwanima shoka osha ningwa kongulohi lwopotundi 21h00.
Nakusa okwa hololwa kutya oye kuku Masiro Ndambu.
“Otaku hokololwa kutya nakusa okwa li ontumba onene ndjoka lwanima ye mu pondo pothingo. Oonkambadhala dhoku mu fala koshipangelo okwa li dha ningwa meendelelo ashike okwa mana oondjenda pethimbo a thikithwa pokapangelo kaNcuncuni Clinic moshitopolwa shaKavango Uuninginino,” osho olopota yopolisi ya yelitha ngaaka.
Monkundana yilwe, Muntengo Katjire (24) nohondamati ye, Frans Mabanze (40), oya mana oondjenda mOsoondaha sho taku hokololwa ya dhengwa kolwaadhi momukunda Mpezo moshitopolwa shaKavango Uuninginino.
Aaholathani mboka, opamwe nomwana gwoomwedhi 18 oya adhika ya lala sho ondunda yawo ya kwatwa kolwaadhi. Otaku hokololwa kutya aanegumbo yalwe okwa li ya penduka sho yu uvu okanona ta ka lilagana noya yi mo mondunda ndjoka sho ya adha aaholathani mboka ya hulitha.
Okanona ina ka mona oshiponga sha sha.
Aapambele yoonakusa oya tseyithilwa nale onkundana yoluhodhi nomakonakono gopolisi otaga pula komeho.
Pokati mpoka, mehuliloshiwike lya zi ko omwa lopotwa oonkundana ntano dhomaluhodhi gaantu mboka yi ikutha oomwenyo.
Miiningwanima mbyoka yi li itano, itatu oyaalumentu mboka yi ikutha oomwenyo.
Moshiningwanima shotango, omulumentu gwedhina Kalumbu Nahole (31) gwomomukunda Iindjinda moshitopolwa shaShana, okwa mana oondjenda mEtitano sho i imangeleke. Olutu lwe olwa falwa kokila yopolisi yaShakati. Nakusa ina thiga ko nande ombapila yetompelo lyeikuthomwenyo, naapambele ye oya tseyithilwa nale onkundana yoluhodhi.
Omusamane gwedhina, Simon Bango okwa hulitha mEtitano sho taku hokololwa i iyaha nondjembo ongulohi yEtitano molukanda lwaFreedomland, mOvenduka. Etompelo lyokwiikutha omwenyo inali tseyika molwashoka ina thiga po uuyelele wa sha, aapambele oya tseyithilwa nale onkundana yoluhodhi nomakonakono gopolisi otaga pula komeho. Atlas Kangoma (38) gwomoArandis okwi imangeleke koongulasha dhOlyomakaya, nomudhimba gwe ogwa falwa kokila yopolisi yaMbaye. Naye ina thiga po ombapila yeikuthomwenyo, naapambele ye oya tseyithilwa nale onkundana yoluhodhi. Omakonakono gopolisi otaga pula komeho.
Mesiku lya faathana, omukiintu gwedhina, Noicolla Jazama (36) okwi imangeleke mOvenduka. Nakusa Jazama okwa thiga ko ombapila yetompelo lyeikuthomwenyo, naapambele ye oya tseyithilwa nale onkundana yoluhodhi.
Omulumentu gulwe natango gwomomukunda Okaunde B moshitopolwa shaShikoto okwa mana oondjenda mOlyomakaya sho i ikutha omwenyo. Nakusa otaku tengenekwa e li moomvula 30.
OMAKWATONKONGA
Omulumentu gwomOngwediva okwa tulwa miipandeko mOlyomakaya sho taku hokololwa a ningi onkambadhala yokuyuga nokukwatonkonga omukiintu. Oshiningwanima shoka osha ningilwa momukunda Eefa Doukadona moshitopolwa shaShana.
Okupitila molopota yopolisi ndjoka ya pitithwa komupoliliko gwopolisi yaShana, Frieda Shikole okwa koleke oshiningwanima shoka nokwa popi kutya omukiintu ngoka okwa adhika e li mela lyondjila a thinda kegumbo lyohondamati ye sho a zi kelungu a kwatwonkonga.
“Nakuninga oshihakanwa okwa tameke okukondjitha omufekelwa nokwe mu tono oonkondo nokwiinaga mo nokufadhukapo. Ashike nando ongaaka okwa thigi po okandjato ke kopeke. Okuza mpoka okwa tseyithile opolisi mbala kombinga yoshiningwanima shoka nomufekelwa okwa landulwa sigo oompoka hazi. Okwa tulwa nale miipandeko, nokandjato kanakuninga oshihakanwa okwe ka galulilwa,” osho Shikole a popi ngaaka.
Okwa gwedhapo kutya omufekelwa ngoka sho a mono opolisi, okwa kutha oshikonde nokwa tameke okwi itsa mothingo nelalakano lyokwi ikutha omwenyo. “Ngashingeyi okwa taambelwa moombete dhoshipangelo shaShakati, metonatelo lyopolisi, onkene ina holoka natango mompangu,” osho Shikole a popi ngaaka.
Omulumentu gwontumba gwomomudhingoloko gwEpako moshitopolwa shaMaheke ota kongwa kopolisi sho taku hokolwa a kala ta kwatonkonga omutekulu gwomimvo 14 sha ningwa pokati kaFebuluali naKotoba numvo. Omufekelwa otaku hokololwa kutya oye hekulu ya kakadhona noya li haya zi megumbo limwe. Omufekelwa ina tulwa natango miipandeko ashike okuliwe mokashoko.
Pokati mpoka, omulumentu gwomimvo 23 ngoka taku hokololwa a kala ta tyakaleke uumatyona mOshakati sho a kala anuwa teya kwatonkonga, okwa tulwa miipandeko mEtitano.
Omupopiliko gwopolisi yaShana, Shikole, okwa popi kutya omufekelwa ngoka okwa tothwa mo koonakuninga iihakanwa pethimbo lyolukongo lwokutotha mo omufekelwa ngoka, sha ningilwa poshitaasi shopolisi yaShakati.
Shikole okwa popi kutya omufekelwa okwa patululilwa iipotha ine yomakwatonkonga nokwa tegelelwa a holoke mompangu yamangestrata gwaShakati.
Omufekelwa otaku hokololwa kutya omulongi gwiimbuluma molwashoka okwa kala a mangululwa mo mondholongo shi na sha niipotha yilwe iyali yomakwatonkonga gaanona – notaku hokololwa kutya iikoya mbyoka okwa li e yi longo manga inaa gwanitha omimvo 18.
Shikole okwa popi kutya opolisi okwa li wo ya pewa oshinakugwanithwa shokukwatapo omulumentu ngoka mekwatathano niipotha yilwe, yi na sha neteyo lyegumbo osho wo okukala niinima ya yakwa.
Momudhingoloko gwaNuwerus moAranos moshitopolwa shaHardap, omulumentu gwomimvo 48 okwa tulwa miipandkeo sho taku hokololwa a ningi onkambadhala yokukwatonkonga omukokele gwomimvo 68, mOlyomakaya ya zi ko.
Otaku hokololwa kutya oshiningwanima shoka osha ningwa koongulasha, nomukiintu okwa kugu a mone ekwatho, nomwana okwe ya okukwathela shoka she eta omufekelwa a kwatwe, nokwa gandjwa momake gopolisi. Omufekelwa okwa patululilwa nale oshipotha shonkambadhala yekwatonkonga.
Pokati mpoka omukiintu gwomimvo 29 otaku hokololwa a kwatwonkonga komulumentu gwomimvo 21, sha ningilwa momudhingoloko gwaTamariskia mOswakopo.
Omufekelwa okwa tulwa nale miipandeko nokwa holoka mompangu mOmaandaha.
Leave a Reply