Omulumentu a fike po oshihauto she omolwongeleka

aakalimo yomOvenduka oya thigwa monkumwe komatango gEtitatu sho omulumentu a fike po oshihauto she popepi nopate momudhingoloko gwaOlympia nokwa popi kutya shoka okwe shi ningi molwashoka ongeleka yawo oya hala oku mu kutha omaliko ge.
Moonkundathana noThe Namibian mEtine, Fillemon Kashuku (38), ngoka e li omulongisikola paithano, ye ishewe omunashikunino, okwa popi kutya okwa li i itayelithwa komukiintu gwontumba opo a waimine ongeleka yedhina Sem Abiatar Ministries.

Onzonkundaneki ndjika okwa li ya kambadhala okukwatathana nomusita gwongeleka ndjoka, Abiatar, ashike onkambadhala ndjoka oya hulile muunyengwi.

Ashike nando ongaaka gumwe gomaakuluntu yegongalo mongeleka ndjoka, nokwa tindi edhina lye li tumbulwe, okwa popi kutya omulumentu ngoka Kashuku oku mu shi nawa mongeleka yawo, ashike omapopyo kutya ongeleka okwa li tayi kambadhala oku mu kutha omaliko ge, ke ga shi.

Omukuluntu ngoka gwegongalo okwa popi kutya okwa yamukula onzonkundaneki ndjika peha “lyomumati gwaKalunga” ngoka anuwa kaali ta vulu okupopya molwashoka okwa li molweendo pethimbo a kwatathanwa naye konzonkundaneku ndjika.
“Otatu mu indile mu pule kombinga yonkalo ye yopaundjolowele [yaKashuku], ngele oku li ngaa nawa. Otashi vulika pu na sha shapuka muye,” osho a popi ngaaka.

Kashuku, ngoka a yambukile komukunda Onanyege popepi nOmuthiya, okwa popi kutya kongeleka ndjoka okwa li a falwa ko komukiintu gwontumba nolwanima anuwa omusita ngoka okwa tameke te mu thiminike a hokane omukadhona gwomongeleka yawo nonande ye ineshi hala.

Kashuku okwa hokolola kutya sho a tindi okuya mondjokana nomukiintu ngoka ta thindilwa, okwa tokola a thige po ongeleka ndjoka, ashike nando ongaaka aakwanegongalo yamwe oya tameke ye mu landula.

“Oya [ongeleka] hala okukutha ndje iihauto yandje nomaliko gandje nonda tokola kutya iinima mbyoka itaye yi mono. Okwa li handi lombwele epangelo nopolisi, ashike inaya hala okupulakena ndje. Onkene onda tokola oshihauto shoka ndi shi fike po,” osho Kashuku a popi ngaaka pethimbo oshihauto she tashi pi.

“Ondati poshitaasi shomahooli, nokulanda uupalwa, nonda hingi okuya mpaka noshihauto shandje nonde shi tomeke omulilo, molwashoka oya hala okukutha ndje iinima yandje.”

“[Abiatar] Oku na wo niimaliwa yandje mbyoka inaa hala we oku yi galula. Oha kala ta thiminike ndje ndi hokane, ohaya ningile ndje omatilitho nohaya kala ya landula ndje kehe mpoka tandi yi. Oye na nokuli esipili ndyoka haya longitha okukala ya tala ndje kutya nee otandi iyogo. Kehe mpoka tandi yi, oya landula nokutala onkalamwenyo yandje,” osho a popi ngaaka.

Kashuku okwa popi kutya okwa li a ningi onkambadhala yokukonga ekwato kaakwanezimo ye ashike inashi kwatha sha.
Okwa popi kutya okwa li wo a kongo ekwatho komupolisi gwokoWalvis Bay, ashike ina mona ekwatho ta kongo. Kashuku okwa popi kutya ongeleka ndjoka oya kala tayi tumine aantu uuvidio kombinga ye ta yogo oshihauto she nokwa li wo wa tuminwa nomuhona gwe, ngoka ngashingeyi ke ena we naye. “Ashihe shoka osha ningwa omolwedhina lyaSem. Oya hala okuloga ndje. Ohaya kwata ndje uuvidio uuna tandi iyogo. Ihandi kotha we. Okwa li nda lili okukonga ekwatho, ashike kapu na ngoka a kwathele ndje. Itashi vulika, kapu na ongeleka hayi vulu okulonga ngaaka, aantu oya pumbwa ye yi konakone,” osho a popi ngaaka.

Kashuku okwa popi kutya ongeleka ndjoka yawo okwa li hayi mu kwata uuvidio uuna ta lesha Ombimbeli ye, nolwanima uuvidio mboka ohaye wu andjaganeke kiikundaneki yopankalathano komalungula unene tuu koTikTok opo a shekwe.
“Okwa li nokuli ya fala ndje koshipangelo koEros,” osho a popi ngaaka.

Mushiinda shaKashuku ngoka wo omuhona gwe, Catherin Laggner, okwa lombwele onzonkundaneki ndjika kutya [Kashuku] ohe mu longele moshikunino.

“Opo lwotango tandi uvu a ninga oshinima sha tya ngaaka. Kandi mu shile nale oshinima sha tya ngaaka,” osho a popi ngaaka.
Laggner, ngoka wo a li pehala lyoshiningwanima shoshihauto tashi pi, okwa popi kutya okwa popya nanumwayinakadhona gwe opo a kwathele Kashuku muudhigu mboka a taalela.

Omupopiliko gwopolisi moshilongo, omupevikomufala Kauna Shikwambi okwa popi kutya kapu na oshipotha sha patululilwa omuntu mekwatathano noshiningwanima shoka, nopolisi otayi vulu owala okuya mo olunyala uuna pu na sha sha nika oshimbuluma moshiningwanima shoka.

“Ngele opu na sha sha nika oshimbuluma, nashi lopotwe kopolisi,” osho Shikwambi a popi ngaaka.
Shikwambi okwa gwedha po tati: “Osha nika oshiponga kaaniihauto okuhwameka omulilo popepi nopate notashi vulu nokuli okwe eta epeya, naashoka osha nika oshiponga noonkondo.”