Omulumentu gwomimvo 42 okwa tindilwa oboloha sho a holoka ohela mOmpangu yaMangestrata gwaRundu, ta tamanekelwa ekwatonkonga lyakakadhona gwomimvo 15, ngoka taku hokololwa kutya okwa valwa komukulukadhi gwe.
Oshininingwanima shoka osha ningilwa momukunda Gcamade moshitopolwa shaKavango Uuninginino, nomulumentu ngoka okwa tulwa muupandeko mEtine lya zi ko sho taku hokololwa kutya okwa kala ha kwatonkonga kakadhona ngoka lwiikando oyindji.
Sho a holoka komeho gamangestrata Shikongo Murray, omufekelwa okwa tindilwa oboloha omolwuunene woshipotha a taalela notaku hokololwa a kala ta kwatonkonga kakadhona ngoka pokati kaAuguste naNovemba numvo. Oshipotha she oshu undulilwa komasiku 26 Januali.
Pokati mpoka, otaku hokololwa omulumentu a kwatonkonga omukiintu ngoka a li ohondakadhona ye, sha ningwa koongulasha dhEtitano mofaalama tayi ithanwa Kudubis momudhingoloko gwaTubusis. Omufekelwa ina tulwa natango miipandeko ashike omakonakono gopolisi otaga pula komeho.
Kakadhona gwomimvo 9 otaku hokololwa a kwatwonkonga mEtitatu lya zi ko, momudhingoloko gwaTjomuise, ashike oshiningwanima shoka osha lopotwa owala mEtitano.
“Omufekelwa okwa li ohondamati ya yina yanakuninga oshihakanwa, noshiningwanima shoka osha thikithwa momake gopolisi kuhe yanakuninga oshihakanwa,” osho omupopiliko gwopolisi moshilongo, omupevikomufala Kauna Shikwambi a popi ngaaka.
Omakonakono gopolisi otaga pula komeho.
Pokati mpoka, kakadhona gwomimvo 14 otaku hokololwa naye a kwatwonkonga momukunda Uuheke moshitopolwa shaHangwena, sha ningwa mEtine sho a kwatwonkonga komushiinda. Omufekelwa ina tulwa natango miipandeko molwashoka okwa fadhukapo. Omakonakono gopolisi otaga pula komeho.
Leave a Reply