Omwanakadhona gwa minista gwaaniilonga i ikutha omwenyo

Omukwanezimo gwanakusa Niita Nujoma okwa popi kutya nakusa okwa li ta monika a fa e li nawa konima sho a li a zi mokalungu kutya kutya okwa kala ta dhengwa kethindakano lyopamadhiladhilo.

Niita, omwanakadhona gwaminista gwaaniilonga Utoni Nujoma.

Pauyelele wa zi komupopiliko gwopolisi moshilongo, omupevikomufala Kauna Shikwambi, omudhimba gwaNiita ogwi itsuwika momulamba gu li momudhingoloko gwaCimbebasia mOvenduka, mEtitano notaku fekelwa kutya okwi imangeleke.

Omukwanezimo, ngoka a tindi edhina lye li tumbulwe, okwa lombwele onzonkundaneki ndjika kutya aakwanezimo okwa li ye wete nakusa Niita(37) eli nawa lwanima sho kwa li e eta puuyelele kutya okwa kala ta dhengwa kethindakano lyopamadhiladhilo.

Ashike nando ongaaka oya popi kutya molwashoka omutima gwamukweni okalongo ki ili, inaya nongela shoka sha li momadhiladhilo ge.
“Otashi uvitha nayi. Ongaakwanezimo, okwa li tushi pamwe ngashingeyi okuli nawa molwashoka okwa li a zi mokalungu kombinga yethindakano lyopamadhiladhilo, nokwa li tatu kambadhala oku mu kwathela,” osho a popi ngaaka.

Okwa popi kutya Niita ina kala ta mono eyambidhidho ndyoka a pumbwa, naashoka osho unene she eta ethindakano lye lyopamadhiladhilo. “Nonande okwa li a pumbwa ekwatho lela, ineli mona. Okwa li a mono ekwatho miinima yilwe monkalamwenyo ye, ashike okukala ke ena iilonga noshimaliwa, osha kala eshongo enene kuye opo i isile oshimpwiyu opamwe naanona ye yaamati yaali,” osho a yelitha ngaaka. Okwa popi kutya Niita okwa kala owala ta hupu moshimaliwa shopenzela sha yina, molwashoka okwa penzelwa. Okwa gwedha po kutya onkalo oya kala kaayi li nawa kaanegumbo, unene tuu okuza sho Niita a kanitha mumwayina, Utoni Nujoma Junior, mo2003 moLondon shaUnited Kingdom. “Eso lye nalyo okwa li owala lyombadhilila, lya fa ndika lyaNiita, noya valelwe owala yaali okuza mumeme gawo,” osho a popi ngaaka.

Opolisi okwa li ya tseyithilwa mEtiyali lya zi ko kutya Niita okwa kana, sho a zi megumbo lyaandjawo moRocky Crest, ashike lwanima okwi itsuwika a hulithila momulamba. Shikwambi okwa popi kutya omudhimba gwaNiita ogwa adhika momulamba gu li konima yosikola yedhina Amazing Private School, koosekuluti yaali yoposikola ndjoka sho kwa li taya kongo iikuni momulamba.