‘Onda ti aantu yomukunda gwetu oyo ye na onyalo’

Minista gwAaniilonga, Iipambele yIikwafabulika nEtotepo lyiilonga, Utoni Nujoma, ngoka a li moshipyu oshiwike sha zi ko megumbo lyopashigwana, sho a popi kutya mboka kaaye na uundjugo momagumbo oye na onyalo, okwa yelitha kutya shoka a popi osha kuthwa ko pambambo.

Nujoma okwa popi kutya ndhoka a popi odhi wetike a fa ta popile aakalimo yomonooli yoshilongo ongahaya longo nuudhiginini omanga mboka ye li kuumbugantu woshilongo ongaanyalo, naashoka ngaaka osha kuthwa ko pambambo.

Okwa popi kutya shoka okwe shi popi u ukilila aantu yokomukunda gwe oyo e wete ye na onyalo.

“Ngame onda popi kutya aantu yokomukunda gwetu oyo ye na onyalo [nonda popi] kutya inaya kala ya tega epangelo olyo li ya tungile okandjugo. Aantu monooli yoshilongo ohaye shi ningi [okwiitungila uundjugo],” osho minista a popi ngaaka oshiwike sha zi ko.

“Onda hala aantu ya kale haya ilongele, ndele haku kala owala ya tega epangelo li ya ningile kehe shimwe,” osho a popi ngaaka.

MPOKA SHA TAMEKELE

Nujoma ndhoka okwe dhi popi pethimbo omuleli gwongundu yoPDM, McHenry Venaani, a li ta yelitha kombinga yoshipopiwa she shoka tashi popi kutya onkalo yuuyogoki moshilongo otayi etitha ohenda. Venaani okwa li ta gandja oshipopiwa she megumbo lyopashigwana kombinga yonkalo yuuyogoki ano ompumbwe yuundjugo momagumbo ndjoka ya thiminika aantu oyendji ya longithe omilamba nenge iihwa uuna taya iwathele.

“Namibia okuli monkalo ya nayipala noonkondo yuuyogoki. Pauyelele wombaanga yuuyuni yoWorld Bank, omuntu gumwe maantu yane moNamibia ke na ompito yokulongitha okandjugo. Shoka otashi ulike kutya ohi iwathele owala pongalangala. Uuyogoki moNamibia owu li lela monkalo tayi tulitha omutse kepepe,” osho Venaani.

Manga omuleli gwoPDM i ipyakidhila nokulesha oshipopiwa she, Nujoma okwa ganeke nokupewa ompito a tye sha, nokwa thikama nokupoya kutya ita tsu kumwe naashoka Venaani ta popi molwashoka onkalo yokwaana uundjugo otayi adhika olundji kuumbugantu woshilongo omolwonyalo. Okwa gwedha po kutya konooli yoshilongo aakwashigwana oyendji oyi itungila uundjugo yoyene momagumbo, okuyelekanitha naamboka ye li kuumbugantu woshilongo.

“Tse ongaaNamibia. [Otwi ininga] Ihaatu tungu nande uundjugo tse yene, shoka oshinima ndishi shi lela,” osho a popi ngaaka.

“Inda owala monooli yoshilongo, mOwambo, hoka oto adha aantu ya tunga uundjugo wawo yoyene. Kutya nee okandjugo kopondje, hoka komayemele,” osho a gwedha po ngaaka.

“Ashike aantu yetu yaahuka [kuumbugantu] . . . uuna ndayi komahala ge li huka, ngele owa penduka mokati kuusiku to ehama mepunda, owu na okutondoka wu uka miihwa mokati komayoka, naashoka otashi ningwa molwashoka aantu yaahuka aananyalo okwe eta po sha,” osho a popi ngaaka.