Ongelekaotai topolaomukunda – Oshiwambo – The Namibian

Ovanhu vomomukunda Oshuudhi namwene womukunda ove li meenamanana dongeleka oyo taku tiwa otai eta omapiyaano momukunda.

Petameko lomwedi ou, opolifi novanambelewa va dja kelelo laUkwambi, opamwe novanamukunda okwa li va longela kumwe opo va kufe po ongeleka imwe keenghono momukunda omo ya kala i li okudja nghee ya totelwe momudo 2021.

Omukulunhu wopolifi koMusati Ismael Basson okwa koleka oshiningwanima eshi Oshoondaxa sha dja ko.

“Opolifi okwa li ashike ya ya ko opo i ka tule po elandulafano nombili, oinima ikwao okwa li ya ningwa kelelo lopamufyuululwakalo,” Basson osho a ti ngaho.

Omupopiliko welelo laUkwambi, Kalimba Othitukuti, okwa ti elelo lopamufyuululwakalo ola ya mo moshinima eshi shaashi ovanhu ova lopota kutya ongeleka okwa li tai piyaaneke ovanhu.

“Ovakwashiwana okwa li ve ya kushe shi na sha nomapiyaano oo ongeleka tai eta. Ounona kakwa li vali ve na ohokwe nofikola ile nelihongo lavo. Okwa li ashike va hala okukala kongeleka fiyo omaufiku neweelelo olo hali di oko okwa li hali piyaaneke ovanhu nai. Okwa li twa pulwa opo tu ke i kufe po ponhele opo ya li,” Osho a ti ngaho.

Oshilyo shimwe shomomudingonoko Kaimbi Kashitweni osha nyenyeta kutya ongeleka okwa li hai ningi omaweelelo neenghono.

“Otwa pula elelo opo li va kufe po, ashike paife otu wete kutya inali shi ninga. Oshike itava ka ninga ongeleka yavo mOshana?”
Ongeleka ohai ifanwa Omwene Tumenge.

Okukufa po ongeleka okwa eta elelo laUkwambi opo li kufe ko omukunda kuElia Lazarus konima eshi a hoolola opo a yandje onhele mepya laye kongeleka oyo tai tewaatewa.

Lazarus okwa lombwela oThe Namibian kutya ke wete kutya omolwashike ovanhu ve na okukala ve na oupyakadi nongeleka oyo a pa onhele mepya laye.

“Ei onhele yange, ovanhu ovo ove na oupyakadi wa shike lela? Ei onhele yange nohandi dulu okwiidilila mo keshe umwe omu. Opu na eengeleka keshe pamwe moshilongo omu, ashike paife ova hala ashike okuweelela nongeleka i li mepya lange. Omaweelelo oo e li koukamba oko hava kala keshe fimbo otaa ningwa ngahelipi?”
Mwene wongeleka e shiivike nawa nedina Apostoli ‘One Way’, okwa ti oshinima eshi oteshi twa la komhangu shaashi elelo ola teyaula po ongeleka yaye.

“Eshi oshinima shopamhepo nohatu twikile nomailikano etu. Ove ya oku, tava teya po ongeleka yetu ndee tava i noinima yetu, mwa kwatelwa okuhanauna po oikulya yetu ndee okwa li ashike nda mwena handi tale ko.

Olye a yandja oufemba kelelo laUkwambi opo li uye ndee tali teyaula ashike? Ngee ove shi shi kutya kandi li po paveta apa, ngeno ova ya komhangu. Ongeleka keshe efimbo oi yadi ovanamukunda ndee paife ova hala okuvalongifa opo va kale ve yele ongeleka,” Apostoli osho a ti ngaho.

Okwaanya vali kutya ovanhu vatatu ovo va xwika po eumbo lameme wavo muDesemba okwa li have ya kongelaka yaye.

“Inandi va mona nale mongeleka yange. Ovanhu ove na ashike oupyakadi nongeleka ei medina leengeshefa davo.

Ovanhu otave ya kongeleka ponhele yokuya koukamba vavo,” Osho a ti ngaho.