Ookoondoma dha pumba moshitopolwa shaHangwena

“ITO adha mo ookondoma miipangelo ayihe, kutya nee omuupangelo muka mEenhana.”

Mbyoka oyo iitya nomatumbulo gaSondy Kamanya, omukalimo gwomondolopa yEenhana moshitopolwa shaHangwena.
Okwa popi kutya aakwashigwana ohaya ende oondjila oonde okuya kiipangelo opo ya pewe ookoondoma dhoshali, ashike uuna ya thiki ohaya lombwelwa owala kutya odha pwa po.

Okwa popi kutya oshinima shoka osha ninga onkalondjigilile.

“Ohandi zi popepi nonda kala handi piti po omalupita ndi tale ngele omu na ookoondoma moshipangelo, ashike aluhe kamu na sha. Uuna nda piti omweelo ndele kapu na okapakete hoka ha ka kala ookondoma, ihandi pula we nokuli molwashoka ondi wete kutya kadhi mo,” osho Kamanya a lombwele onzonkundaneki ndjika ngaaka, oshiwike sha zi ko.

Aakwashigwana yamwe oya popi kutya onkalo ndjoka oya kala ngaaka uule woomwedhi ndatu dha piti, notayi ya tula moshiponga shokukwatwa komikithi dhopaihulo ngaashi oHIV.

Ookoondoma dhoshali ohadhi gandjwa piipangelo yepangelo osho wo pomahala galwe ngaashi poondingosho, poohotela nosho tuu okuza kUuministili wUundjolowele nOmayakulo gOnkalonawa.

Aaniilonga yomoshipangelo shEenhana, mboka ya tindi omadhina gawo ga tumbulwe, oya lombwele onzonkundaneki ndjika kutya aakwashigwana oyendji kaye na iimaliwa yolulanda ookoondoma.

“Oto ipula kutya ando omuntu ota vulu okulongitha po ooN$30 okulanda ookoondoma? Ngele owa tala momapandaanda gomEenhana, oto adha mo konyala aakadhona aashona ye na omategelelo,” osho omuniilonga a popi ngaaka.

“Ngiika ando uuministili okwa li hawu gandja ookoondoma kehe ethimbo ando ngiika onkalo hasho yi li ngeika,” osho a gwedha po ngaaka.

Omunandjugu gwopankalathano mEenhana, Salomo Elifas okwa popi kutya aagundjuka momudhingoloko ohaya nu omalovu epitilila.
“Shoka ohashi ya thiminike ya ye miihulo inaayi gamenwa. Kashi na nande egameno opo iipangeli yi kale kaayi na ookoondoma,” osho a popi ngaaka.

Elifas okwa popi kutya onkalo ndjoka oye eta eikwato pomutima, molwashoka kayi li owala mondolopa yEenhana.

“Otandi ku lombwele kutya oshitopolwa ashihe [shaHangwena] onkalo oya faathana. Osha simana wo ndi popye kutya aantu yamwe oyi ihole noonkondo ohaya vulu okukutha po epakete lyookondoma, uuna dhi li po molwashoka oye na ekwatathano naamboka haya longele miipangelo,” osho a popi ngaaka.