Oombashu dha halakanithwa po komulilo moSwakopo

Ombepo onene ndjoka ya penduka ko komukulofuta ohela oye eta eyonagulo ndyoka lya thigi aantu ya konda po16 pomutenya moSwakopo, sha landula sho oombashu dhawo dha yangatithwa po komulilo.

Oshiningwanima shotango, osha ningilwa molukanda lwaMondesa mepandaanda lyedhina Monica Geingos, nomulilo ngoka otaku hokololwa gwa tameke mombashu yimwe nolwanima ogwa taandele noombashu dhili popepi nokwa li nokuli gwa kwathelwa kombepo onene ndjoka ya penduka ko komukulofuta ohela.

Omukuluntu gwehangano lyokugandja omakwatho gotango lyedhina Namibia Marshall Rangers, Sean Naude, okwa popi kutya kapu na ngoka a kanithila mo omwenyo moshiningwanima shoka, nonande opu na gumwe a falwa a ka mone uuhaku sho taku hokololwa a yiwa kolwiithi olundji.

“Otatu pandula molwashoka kapu na ngoka e ehamekelwa mo moshiningwanima shoka shomulilo,” osho a lombwele oThe Namibian ngaaka.

Oombashu dha konda po10 momudhingoloko gwaMondesa otaku hokololwa dha yangatithwa po komulilo.
Omanga ookadhimamulilo naakwashigwana yi ipyakidhila nokudhima omulilo moMondesa, otaku hokololwa omulilo omukwawo gwa tukuka kolukanda lwoombashu lwaDRC, mepandaanda lyopate yaAndimba Toivo Ya Toivo.

Moshiningwanima shoka otaku hokololwa omulumentu a li ta teleke pondje yombashu ye nokwa zi po mbala a ye puushiinda ashike konima yokathimbo okwa mono olwiithi talu ziilile lwokombashu nolwanima sho a yi ko okwa adha ombashu ye ya kwata omulilo, elago enene oondyoka kutya oshe endelelwa po onkene kolukanda hoka inaku halakanithwa po oombashu odhindji.

Naude okwa gandja omapandulo koshikondo shakadhimamulilo moSwakopo sho ye endelele okushilipaleka kutya omulilo ogwa dhimwa mbala.

Pokati mpoka, aakalimo oyendji komukulofuta unene tuu mboka haya zi mootenda nomoombashu dha ningwa momambolota oya thigwa pongalangala sha landula ombepo ondhigu ndjoka ya li ko.

Oyendji yomaakalimo mboka ya gumwa oomboka ya yi mootenda nomoombashu dhosheendelela dhomambolota ndhoka ya dhike po sha landula oombashu dhawo ndhoka dha yangatithwa po komulilo. Kakele komalukalwa, oopate komukulofuta nadho okwa li dhi li kohi yevi shoka she eta uupyakadhi kaaniihauto molwashoka mopate kaya li we yewete mo nawa.