Oosekuliti mbali dha holoka mompangu sho ya dhenge okamatyona

Aalumentu yaali mboka haya longele ehangano lyuusekuliti lyedhina Omle Security ndyoka kwa li lya pewa oshinakugwanithwa shokukaleka po elandulathano negameno pomauliko giipindi gondolopa yEenhana, oya holoka mompangu taya tamanekelwa oshipotha shedhengo.

Shoka osha landula sho kamatyona gwomimvo 15 a dhengagulwa nokwe ehamekwa koosekuliti pethimbo lyomauliko giipindi mEenhana sho taku hokololwa kutya okwa li ta kambadhala okukengelela pakugandja okatekete okupitila mondhalate kumukwawo ngoka a li pondje opo a wape e ye meni.

Aafekelwa mboka oyo Setter Jonas Hashipala (31) osho wo Nghipulwa Fillipus Nghidinihamba (29) noya holoka mOmpangu yaMangestrata gwEenhana, mEtiyali.

Aafekelwa mboka, okwa li ya tulwa miipandeko mOmaandaha noya pewa kehe gumwe oboloha yooN$2 000 noshipotha shawo oshu undulilwa komasiku 25 Januali 2024.

Moonkundathana noThe Namibian oshiwike sha zi ko, kamatyona ngoka, okwa hokolola kutya molwashoka kuume ke kali e na oshimaliwa shooN$20 shokufuta pomweelo, oyu uvathana opo gumwe a fute nokupita a ye meni ye a vule okugandja okatekete moompangulushushu ano okupitila mondhalate kwaangoka e li pondje opo a vule okuya meni.

“Omanga ndi li pondhalate yolugumbo, sekuliti gumwe okwe ya pungame ta pula kutya pondhalate otandi ningi po shike nonde mu lombwele . . . okwa kutha mo ongola ye nokwa tameke okudhenga ndje momutse nomolutu. Onda thikama po nonkambadhala yokufadhukapo, ashike aaniilonga pamwe yoosekuliti oya kwata ndje nokutameka taya dhenge ndje, nokuthanga ndje. Onda tameke tandi zi ombinzi, ashike inaya etha ndje oya tsikile owala nokudhenga ndje,” osho kamatyona a popi ngaaka.

Yina yakamatyona ngoka oye a tulile mo aafekelwa mboka oshipotha shedhengo, nokwa holola okwaauvanawa keehameko lyomwana ngoka a dhengagulwa peha lyokutidhwa mo momauliko giipindi.

“Itashi vulika ya kambadhale okudhipaga omumwandje omolwooN$20. I ipula owala okanona ka dhengwa sigo omonkalo ndjoka, omuntu ota dhengelwa shike momutse peha lyoku mu tidha mo molugumbo lwomauliko giipindi?” osho a popi ngaaka.

Konima yoshiningwanima shoka, omupopiliko gwondolopa yEenhana, Paul Shilongo okwa popi kutya elelo lyondolopa yawo inali gandja nande elombwelo kehangano lyoosekuliti li dhenge aantu mboka taya pogola omilandu noompango dhomomauliko giipindi.

“Elelo lyondolopa okwa li lya gandja oshinakugwanithwa kehangano lyoosekuliti lyedhina Omle Security opo li kaleke po elandulathano negameno lya kehe gumwe osho wo lyomaliko,” osho Shilongo a popi ngaaka.

Omauliko giipindi gondolopa yEenhana oga li ko okuza momasiku 31 Juli sigo omomasiku 5 Auguste.