Ondjayi yetanga lyopolisi moshilongo Joseph Shikongo okwe ekelehi omapopyo kutya opolisi oyo ya kaleka mondholongo omunandjungu Michael Amushelelo, nokwa popi kutya opolisi kayi na mo olunyala.
Shikongo okwa yelitha kutya ekaleko lya Amushelelo mondholongo sigo ongashingeyi olyi li kombinga yoshipotha shoka shi li mompangu.
Ndhoka okwe dhi popi pethimbo lyoshigongipukululo shoka sha ningilwa mOvenduka omasiku ga zi ko.
“Aantu otaya popi kutya otatu tindile Amushelelo oboloha omolwehololomadhiladhilo ndyoka lya ningwa momasiku 21 Maalitsa. Hasho nande shi li ngaaak. Okukalekwa kwa Amushelelo mondholongo, opolisi kayi na mo nande olunyala, ashike okuli mondjeedhililo omolwompangu,” osho Shikongo a popi ngaaka.
Okwa popi kutya yalwe mboka kwa li ya kwatwa po oshita naAmushelelo ngaashi Dimbulukeni Nauyoma osho wo oshilyo shegumbo lyopashigwana Inna Hengari, oya pewa nale oboloha.
Oshipotha shoka kwa li tashi tamanekelwa Hengari ngashingeyi oshe ekelwahi.
“Aantu inaya tula nande iinima mumwe. Amushelelo okwa li ta popi muule konima yoshiponga shandje shoshihauto, nondiwete okukalekwa kwe mondholongo sigo oompaka kaku na sha noshiponga shandje,” osho Shikongo a popi ngaaka.
MuFebuluali numvo, Shikongo, ngoka a kalelwa po kuhahende Nambili Mhata, okwa gandja elombwelo kuAmushelelo a gandje ombili nokuyeleka edhina lye ndyoka a nyateke kiikundaneki yopankalathano nongele hasho ote mu futitha paveta oshimaliwa shoomiliyona N$1.
Shikongo okwa popi kutya ndhoka Amushelelo a popi komalungula kadhi na uushili wa sha, nokwe shi ningi owala nelalakano lyokunyateka edhina lye.
Shoka osha landula sho Amushelelo taku hokololwa kutya okwa popi kutya Shikongo ina pumbwa okukala koshipundi shuundjayi wetanga lyopolisi pompito ndjika ta ningilwa omakonakono.
Amushelelo okwa li wo a popi kutya Shikongo okwa tuma oondaadhi dhi mu dhipage.
Omananathano pokati kaShikongo naAmushelelo oga holoka sha landula oshiponga shoka Shikongo e na mo olunyala sha faalele oomwenyo dhaantu yatatu, muDesemba omumvo gwa zi ko.
Onkene Amushelelo okwa kala ta popile aakwanezimo yoonakusa nokukondjitha Shikongo a tulwe miipandeko ngaashi hashi ningilwa kehe ngoka e etitha oshiponga shoshihauto sha faalela oomwenyo dhaantu.
Shikongo ota ningilwa omakonakono ge na sha noshipotha shedhipago lyaashi lyoshiningilawina, nokuhinga nuuhasha sha landula sho oshihauto shoka a li ta hingi sha mono oshiponga sho shi idhenge omutse nomutse notuukala, sha ningilwa mopate, pwIindangungu, moshikandjohogololo shaKaku [moshitopolwa shaShana], momasiku 30 Desemba 2022.
Aantu yatatu mboka ya li motuukala ndjoka ya pumwa kuShikongo oya hulithile poshiponga nomadhina gawo oyo Sofia Natangwe Ananias (22), Frans Pombili Ndengu (27) naStefanus Hafeni Lukas.
Pauyelele wolopota yopolisi kombinga yoshiningwanima shoka, Shikongo ngoka a li ta hingi oshihauto she shopaumwene shoToyota Hilux shoondunda mbali, okwi idhenge omutse nomutse notuukala yoHyundai ndjoka ya li oonakusa mboka yatatu.
Amushelelo okwa kala mondjeedhililo okuza muMaalitsa sha landula sho kwa li ya tulwa miipandeko pamwe naNauyoma osho wo Hengari, molwashoka otaku hokololwa kutya okwa li ya kwatela komeho ehololomadhiladhilo lyaa li paveta, mEsiku lyEmanguluko.
Ehololomadhiladhilo ndyoka okwa li lyu unganekwa lyi li ompinge nonkalo yokwaana iilonga moshilongo.
Nonande Hengari naNauyoma okwa li ya pewa oboloha yooN$5 000 mu kehe gumwe, Amushelelo onkene ta tsikile nokutindilwa oboloha, nomwedhi gwa zi ko okwa li a fala oshipotha she kompangu yopombanda yaVenduka opo ku talululwe etindo lyokupewa oboloha, ashike etalululo ndyoka olye ekelwahi.
Ashike natango okwa tokola etalululo lyoboloha eli fale kompangu yashiga ko a tale ngele ta pewa ompito yokwiifutilamo.
Leave a Reply