Oshiwana shihapu osha itavela kutyaomulumenhu oye omutwe weumbo – Oshiwambo

… Rosa Namises naye okwa hala okukufa ombinga momahoololo oupelesidente

Omahoololo oupelesidente nomutumba wopashiwana ee na oomeme vahapu tava ka kufa ombinga, ashike ovandjadjukununi voikwapolotika otava ti eitavelo olo li li moshiwana shihapu kutya tate oye ashike omutwe weumbo otashi dulika li ka piyaaneke eemhito doomeme, unene ngaa ovo ve lifikamena po voovene.

Oo a waimina eekandidate dikwao nhatu, omupopili wouyuki wopanghalafano noufemba wovanhu Rosa Namises, Etitano okwa shiivifa pambelewa kutya ota ka kufa ombinga momahoololo oupelesidente oo taa ka kala ko muNovemba neudo ongokandidate ye lifikamena po yoovene.

Namises ota ka waimina omuulikwa pelesidente woSwapo Netumbo Nandi-Ndaitwah, okandidate ke likalela po koovene Ally Angula napelesidente wongudu yedina Nationala Unity Democratic Organisation (NUDO) Esther Muinjangue, ngee natango okwa kala ngaa oye pelesidente wongudu yaye konima yoshoongalele osho hashi hoolola pelesidente wongudu.

Eemhango dokakomisi komahoololo kaNamibia otadi ti, ehoololo leekandidate de likalela po doovene otali ka ningwa momafiku 14 Kotomba.

Ovanawino moikwapolotika ova tambula ko eyambulepo loomeme, ashike nee, otava ti otashi dulika eitavelo lokutya tate oye ashike omuleli muwa olo li yadi mOvanamibia li kale oshiimbi sha kula kuvo.

Omundjadjukununi woikwapolotika Rakkel Andreas, okwa ti pamufyuululwakalo, ekufombinga loomeme mopolotika ova talika ko kutya kave na eudeko la wana ngaashi ovalumenhu.

“Paushili woovene, ngee omukainhu okwa i momahoololo, ohapa kala omapulo ngee ota dulu ngaa, ashike ngee omulumenhu kapu na ou ha pula ngee okuna ngaa osho sha pumbiwa opo a ye ponhele opo,” Andreas osho a ti ngaho.

Andreas okwa ti ngee ovakainhu otava dulu okuyambula po oshiwana ashishe, natango navo otava dulu ashike okulela oshilongo.

“Eshi handi ti osheshi ashike kutya ovakainhu nava kale ve lilongekinda okupulwa ngee otava dulu ngaa, osho oshi na okukala sha kula lela. Natango nava kale ve lilongekinda okushekwa medina leedula davo shaashi molwomatomeno amwe opu na oshinima shokudina ovaleli ovakainhu medina leedula davo,” Andreas osho a ti ngaho.

Omundjadjukununi woikwapolotika Erika Thomas, okwa ti ovakainhu ovo tava i mopolotika ove na okushakeneka omikundu molwomaitavelo oo e li moshiwana shaNamibia naao e li momudingonoko wopolotika mwoovene kutya ovalumenhu ovo ashike tava dulu okukulela.

Thomas okwa ti ovakainhu ove li mo nai shaashi ova talika ko unene kutya voo ovafilishisho ashike, ponhele yovaleli.

“Opolotika oihadi unene ovaleli vovalumenhu. Ngee ovalumenhu ve wete omukainhu a hala kulela, ohava dilaadila kutya ova hala okuvalyatela pedu. Opu na eemhito dihapu, ashike omikundu edi ovakainhu ve na okutaalela mopolotika odihapu,” Thomas osho a ti ngaho.

Omundjadjukununi woikwapolotika umwe vali Ndumba Kamwanyah okwa ti omwaalu vovakainhu oo tau ningi uhapu momafiyafano oupelesidente woshilongo otau tu unene ounona voukadona omukumu.

“Nande nee oudemokoli, natango oshiwana shetu otashi lelwa unene kovalumenhu, ndee osho otashi monika momikalo nopeenghatu dihapu. Okumona kutya ehalo lovakainhu otali i pombada oshiwa nai,” Kamwanyah osho a ti ngaho.