Ongula yesiku lyomaigidho gohango ye, Matheus Iilongeni (43), oye gotango a dhengele oshikumbi she oshinene oku mu dhimbulukidha kombinga yokuya kongeleka.
“Okwa li nda nyanyukwa noonkondo kombinga yesiku lye enene,” osho oshinkumbi oshinene, Jafet Andreas a popi ngaaka.
Ayihe oya li pomahala – aantu okwa li ya hiywa, oshuta yomufuko okwa li ya longekidhwa, nomufuko gwomukadhona okwa li i ilongekidhila okuya mofeyi ye. Okwa li owala ku na omasiku gaali omanga Iilongeni nomufuko gwe inaaya tya “Eeno onda hala”.
Andreas okwa dhimbulukwa nkene Iilongeni okwa li a nyanyukwa noonkondo omanga inaa kana, nolutu lwe olwe ki itsuwika konima yegumbo lyaandjawo momukunda tagu adhika moshikandjohogololo shaAnamulenga moshitopolwa shaMusati, momasiku 27 Kotoba.
“Mesiku lyomaigidho, Iilongeni oye gotango a pendulandje ndi mu fale kongeleka. Kanda li nande ndi shi ngele okuna uupyakadhi washa nenge ngele ota piyaganekwa kethindakano lyopamadhiladhilo,” osho Andreas a popi ngaaka.
Opolisi oya popi kutya Iilongeni okwa mana oondjenda sho i imangeleke yemwene.
Pauyelele wopolisi kombinga yeso ndyoka, Iilongeni okwa monika lwahugunina mEtitatu, nomEtine, ookuume naakwanezimo oya adhika yi ilongekidhila okufala okoofa yomufuko gwomukadhona, ndjoka hayi kala ofeyi nayilwe mbyoka hayi pewa omukadhona.
Ashike, manga aantu ye li momalongekidho gohango, mEtitatu Iilongeni okwa zi mo megumbo sho a popi kutya otayi kOshakati a ka tale iinima iishona yomohango.
Ashike nonande okwa li a tegelelwa a galuke esiku ndyoka, ineshi ninga naashoka oshe eta omalimbililo kukehe gumwe, noya tameke oku mu konga.
Olutu lwe olwe ki itsuwika mepya, ethimbo lyongula mEtitano.
Omukunda aguhe okwa li gwa tilithwa konkundana ndjoka, noya thigwa nomaipulo kaage na omayamukulo kutya okwi ikuthile shike omwenyo.
Okwa fumvikwa mEtine momukunda Onekukumo. “Okwa li a ningi omasiku i ipyakidhila nokwa li a ningi omalongekidho agehe. Ayihe oya li nawa sigo omEtine. Pompito yimwe okwa li nokuli tatu ipula kutya ngiika okwi ipyakidhila notetu galukile kongodhi ngele a mana. Esiku alihe otwa kala twa tegelela opo etu galukile kongodhi. Sigo opaife katu shi uvite ko kutya oshe ende ngiini opo a longe oshilonga shoka tashi uvitha nayi,” osho Andreas a hokolola ngaaka.
‘OMUMWENI’
Onzonkundaneki ndjika oya talele po aakwanezimo ya nakusa Iilongeni, momukunda Onekukumo mehululiloshiwike lya piti.
Mumwayina omushona gwanakusa, Matheus Kaitungwa, okwa hokolola kutya Iilongeni okwa li omulumentu omumweni nokwa li e na omashendjo.
“Otwa kanitha omuntu itoo mu pewa lwaali. Iilongeni kali ha popi, ashike okwa li omuntu omwaanawa. Okwa li ehole aakwanezimo nookuume ke. Sigo oompaka onkene kaatushi kutya oshike she eta a katuke onkatu ndjoka ondhigu mesiku ndyoka lya li li na okukala olyo esiku nyenyu kaakuna we monkalamwenyo ye. Aluhe okwa kala a hala okukala e na ofamili ye. Kali nande u ulike omandhindhiliko ga sha kutya pamwe okwa li ta hepekwa kethindakano lyopamadhiladhilo, onda kala naye oshiwike ashihe shoka sha landula omaigidho, ashike ina ulika nande omandhindhiliko gomuntu a geyithwa kusha, ishewe kapuna nande ogumwe e mu ninga nayi,” osho a popi ngaaka.
Iilongeni okwa thigi ko aanona ye yatatu, naamwayina yane. Kaitungwa okwa popi kutya Iilongeni ina thiga ko ombapila yetompelo lyeikuthomwenyo, ishewe ke na ngoka a lombwela sha, sho i ikutha omwenyo.
“Otwa hadha mondunda ye tu tale ngele okwa thiga mo ombapila yasha, ashike inatu mona mo sha. Opolisi oye mu hadha moondjato dhombulukweya ye, ashike inaya mo na mo sha. Okwa li wo twa popi nomufuko gwomukadhona, ashike okwa popi kutya ina koneka Iilongeni gwe e na ethindakano lyopamadhiladhilo. “Otwe mu mona mEtitatu ethimbo lyongula . . . Ayihe oya kalekwa notwa tseyithile aakwanezimo yomufuko gwomukadhona kutya omufuko gwomumati okwa kana, ishewe katu mu wete,” osho Kaitungwa a popi ngaaka.
Okwa gwedha po kutya lwa hugunina a popya naIilongeni, omEtitatu sho ya popi kongodhi, nokwa li a nyanyukwa omolwesiku lyohango ye ndjoka a tegelela.
“Inandi nongela sha tashi limbilike momaihumbato ge molwashoka okwa li owala a nyanyukwa, nomesiku lyomaigidho Iilongeni oye gwotango okupendulandje ndi mu thindikile kongeleka. Kanda li nande ndi shi ngele okuna uupyakadhi washa.
Otwa li netegameno kutya ota galukile kegumbo e na omwenyo. Kashi shi nande oshipu kaakwanezimo mboka ya thigwa po. Iilongeni okwe tu thigi po mbala,” osho a popi ngaaka.
Kaitungwa okwa popi kutya nakusa Iilongeni kali ehole omalovu nolundji okwa li ha kala megumbo naapambele ta ningi omashendjo, ishewe okwa li omupenda.
Leave a Reply