Pet Shop Boys kondig nuwe musiek en ook ‘n fyn porselein-teestel aan ter viering van 40 jaar
Die Pet Shop Boys het ‘n eksklusiewe fyn porselein-teestel aangekondig om 40 jaar sedert die vrystelling van hul debuut-enkelsnit te herdenk. Die teestel is ontwerp deur hul langtermyn-spanmaats, Farrow, in samewerking met die duo Neil Tennant en Chris Lowe, en vervaardig deur Duchess China in Stoke-on-Trent, Engeland.
Dit is ‘n beperkte uitgawe wat ‘n teepot, koppies en pierings, ‘n melkbeker en ‘n suikerbak insluit. Die stel is in koningsblou en wit, elke stuk met die hand afgewerk, en kom met ‘n egtheidsertifikaat en produkboekie. Stelpryse begin vanaf £200, oftewel N$4 600.
Die items is gemaak volgens tradisionele prosesse wat Duchess China al meer as 130 jaar volg en sal vanaf 20 November te koop wees.
Afgesien van die teestel, beplan Pet Shop Boys ook om ‘n uitgebreide uitgawe van hul 15de ateljee-album, Nonetheless, bekend te stel. Hierdie album, wat deur James Ford vervaardig is en in April verskyn het, het treffer-enkelsnitte soos “Loneliness” en “Dancing Star” ingesluit en was hul suksesvolste sedert 1993.
Verder sal ‘n nuwe dubbel A-kant enkelsnit, “New London Boy” / “All The Young Dudes”, op 7 November digitaal beskikbaar wees en vanaf 15 November as CD-enkelsnitte verskyn.
Die groep het vroeër vanjaar hul Europese en VK-toer afgesluit met uitverkoopte vertonings by die Royal Opera House in Londen en is bevestig om by die eerste London Soundtrack Festival in 2025 op te tree.
Foto verskaf