Stadige vervolging belemmer geregtigheid in stroperysake – Kosmos 94.1

Stadige vervolging belemmer geregtigheid in stroperysake

Die regering se nasionale verslag in verband met die beskerming van natuurlike hulpbronne en wetstoepassing toon dat Namibië ‘n toename van 97,9 persent in renosterstropery verlede jaar aangeteken het. Dit is die hoogste verliese sedert 2015. Met die eerste werklike vlaag van stropery wat in daardie jaar voorgekom het, het owerhede ingespring en ‘n gesamentlike reaksie met wye internasionale steun het die aandag van renostersindikate tydelik elders verskuif. Verliese was in 2016 en 2017 onderdruk, maar het weer in 2018 gestyg met dalings wat weer in 2020 en 2021 aangeteken is. Ten spyte hiervan het stropery in 2022 verdubbel. Net 5 horings van 93 diere is teruggevind maar, arrestasies vertoon goed. Daar was 47 voorkomende arrestasies uit ‘n totaal van 75 renosterverwante arrestasies. Die verslag beklemtoon ook die dringendheid daarvan om die stadige vordering met die finalisering van renosterhofsake aan te spreek, en sê dat in 2015 is altesaam 236 renosterhofsake geopen, maar slegs 25 hiervan, of 10,6 persent was teen die einde van 2022 afgehandel.