Swapo ta shekwa eshi a handuka molwoshoongalele shaItula noEuropean Union – Oshiwambo

Omunawino moinima yopamakwatafano opaunyuni nomundjadjukununi womilandu depangelo, Marius Kudumo okwa sheka Swapo konima eshi omupedu pelesidente waye, Netumbo Nandi-Ndaitwah, a yandja elondwelo komutumwakalelipo woEuropena Union (EU) opo ehe lidope moinima yaNamibia.

Eshi oshe ya konima omutumwakalelipo waGerman Thorsten Hutter kwa li a longekida omusha ta fimaneke omuleli nomukwateli komesho wongudu yoIndependent Patriotis for Change (IPC) Panduleni Itula ponhele yoEuropean Union mOvenduka oshivike sha dja ko mEtivali.

Opo kwa li pa holoka ovatumwakalelipo vamwe ngaashi owaSpain, Portugal naFrance.

Oshinima eshi shaNandi-Ndaitwah oshe ya konima eshi minista womakwatafano nomalongelokumwe opaiwana, Peya Mushelenga, a ninga oshoongalele novatumwakalelipo vaEurope ndee te va takele omunwe kombinga yoshoongalele osho kwa li va ninga novaleli voIPC.

Kudumo okwa ti: “Ehandu kombinga yopolotika tali di kovanapolotika inali pumbiwa nokuli. Pamaliudo ange, eshi ehandu, ashike ngeno inashi kala ngaho ngeno okwa li shihe shi odula yomahoololo.”

Okwa ti oveta otai ti omakwatafano opaiwana omwa kwatelwa, eeveta, oilonga, eenghatu nomaliumbato oilongo shi na sha nomakwatafano.

“Ovatumwakalelipo ongovakaleleipo voilongo yavo ove na oshinakuwanifa shokulopota oinima yopolotika, eliko noinima yopamakwatafano moshilongo yoilongo omo ve li koilongo yavo.

“Onghee nee, ohava shakene nomapangelo eengudu dopolotika nomahangano oo inaa paba epangelo opo va longe oilonga yavo ndee tava lopota oinima koilongo yavo,” Osho a ti ngaho.

Omundjadjukununi woikwapolotika Henning Melber, okwa ti omapopyo aSwapo okwa li a teelelika, pakutala kutya oshoongalele okwa li tashi li dopo momilandu dopashiwana. Okwa ti oikundafanwa ina sha noinima yepangelo nai kale ashike tai li kundwa kepangelo loovene.